قازاقستاندىق كۋالىككە ساۋساق ءىزى ەنگىزىلۋى مۇمكىن

ءىىم ءتيىستى زاڭ جوباسىن ازىرلەدى.

ۆەدومستۆو قازاقستان ازاماتىنىڭ پاسپورتىن، جەكە كۋالىگىن، شەتەلدىكتىڭ رەسپۋبليكادا تۇرۋىنا ىقتيارحاتتى، ازاماتتىعى جوق ادامنىڭ كۋالىگىن، بوسقىن كۋالىگىن جانە جول ءجۇرۋ قۇجاتىن رەسىمدەۋ، بەرۋ، اۋىستىرۋ، تاپسىرۋ، الىپ قويۋ جانە جويۋدىڭ جاڭا قاعيدالارىن دايىندادى، دەپ حابارلايدى Almaty-akshamy.kz

وعان سايكەس جەكە باستى كۋالاندىراتىن قۇجاتتار كەلەسى دەرەكتەردى قامتىماق:

تەگىن، اتىن، اكەسىنىڭ اتىن (ول بولعان جاعدايدا)؛

تۋعان كۇنىن، ايىن، جىلىن جانە جەرىن؛

جىنىسىن؛

قاي ۇلتقا جاتاتىنىن - وسى قاعيدالاردىڭ 2-تارماعىنىڭ 4)، 5) تارماقشالارىندا كورسەتىلگەن جەكە باستى كۋالاندىراتىن قۇجاتتاردا يەسىنىڭ قالاۋى بويىنشا؛

ازاماتتىعىن؛

فوتوسۋرەتىن؛

قۇجاتتى بەرگەن ورگاننىڭ اتاۋىن؛

قۇجاتتىڭ بەرىلگەن كۇنىن، ايىن، جىلىن، ءنومىرىن، قولدانىلۋ مەرزىمىن؛

قۇجاتتار يەسىنىڭ قولىن؛

جەكە سايكەستەندىرۋ ءنومىرىن (بوسقىننىڭ كۋالىگىن قوسپاعاندا)؛

16 جاسقا تولعان جانە ودان اسقان، سونداي-اق "داكتيلوسكوپيالىق جانە گەنومدىق تىركەۋ تۋرالى" زاڭىمەن بەلگىلەنگەن جاعدايلاردا 12 جاستان باستاپ 16 جاسقا دەيىنگى قۇجات يەسىنىڭ قول ساۋساقتارىنىڭ ىزدەرىن.

"جەكە باستى كۋالاندىراتىن قۇجاتتاردى رەسىمدەۋ سەبەبىنە قاراماستان، قۇجاتتالاتىن (ون ءتورت جاسقا تولعان) ادامداردىڭ تۇراقتى تىركەلگەنىن راستاۋدى ۋاكىلەتتى ورگان اقپاراتتىق جۇيەلەر ارقىلى الادى. شەتەلدىكتىڭ ەلدە تۇرۋىنا ىقتيارحاتتى، ازاماتتىعى جوق ادامنىڭ كۋالىگىن قۇجاتتاندىرىلاتىن ادام تۇراقتى تىركەلگەن جەردەگى ۋاكىلەتتى مەملەكەتتىك ورگان بەرەدى"، - دەلىنگەن قۇجاتتا.

قازاقستان رەسپۋبليكاسى ازاماتىنىڭ پاسپورتى، قازاقستان رەسپۋبليكاسى ازاماتىنىڭ جەكە كۋالىگى رەسىمدەلگەن كۇننەن باستاپ جەدەلدەتىلگەن تارتىپپەن استانا، الماتى، اقتوبە، شىمكەنت قالالارىندا - ءبىر جۇمىس كۇنىنە دەيىن، وبلىس ورتالىقتارىندا - ءۇش جۇمىس كۇنىنە دەيىن، وبلىستاردىڭ اۋداندارى مەن قالالارىندا – جەتى جۇمىس كۇنىنە دەيىن بەرىلەدى.

رەسپۋبليكا ازاماتتارىنىڭ قالاۋى بويىنشا جەكە باستى كۋالاندىراتىن قۇجاتتار دا جەدەلدەتىلگەن تارتىپپەن رەسىمدەلگەن كۇنىنەن باستاپ ءۇش جۇمىس كۇنىنە دەيىن (استانا، الماتى، اقتوبە، شىمكەنت قالالارىندا) جانە بەس جۇمىس كۇنىنە دەيىن (وبلىس ورتالىقتارىندا) بەرىلەدى.

قۇجاتتى جاريا تالقىلاۋ "اشىق نقا" پورتالىندا 13 ساۋىرگە دەيىن جالعاسادى.