قازاقستاندىق كومپوزيتور اۆستريانىڭ تەودور كەرنەر اتىنداعى پرەمياسىنىڭ يەگەرى اتاندى

وتاندىق كومپوزيتور سەرگەي كيم اۆستريانىڭ ونەر جانە عىلىم سالاسىنداعى بەدەلدى سىيلىعىنىڭ يەگەرى اتاندى.

جەرلەسىمىز بايقاۋعا قاتىسۋ ءۇشىن ءوزىنىڭ 40 مينۋتتىق اۆتورلىق پەساسىن ۇسىنعان. ايتا كەتەيىك، تەودور كورنەر اتىنداعى پرەميا تالانتتى ءارى جاس ونەر يەلەرىنە 1954 جىلدان بەرى جىل سايىن بەرىلىپ كەلەدى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.

تەودور كورنەر اۆستريانى باسقارعان جىلدارى ونەر مەن عىلىمداعى ازاماتتاردى قولداۋ ماقساتىندا ءوز اتىنان پرەميانى ويلاپ تاپقان. مىنە، سودان بەرى جارتى عاسىرعا جۋىق بەدەلدى سىي تەك مەملەكەتتىڭ قازىرگى پرەزيدەنتىنىڭ قولىنان تابىستالىپ كەلەدى.  

«بىرىنشىدەن، بۇل سىيلىق 35 جاسقا دەيىنگى جاس مۋزىكانتتارعا ارنالعان. ءبىر جىل بۇرىن ۇيىمداستىرۋشىلار انونس جاسايدى. باستى تالاپتاردىڭ ءبىرى – كومپوزيتور ءوزىنىڭ دايىن شىعارماسىن ەمەس، جازىلىپ جاتقان شىعارماسىن ۇسىنۋى ءتيىس. ال ونى اياقتايتىن ۋاقىتى ءدال سىيلىق بەرىلەتىن كەز. بۇل ءبىرىنشى تالاپ، ەكىنشىسى جازىلعان پەسا  اۆستريا ەلىنىڭ شىعارماشىلىعىنان، ونەرى مەن مادەنيەتىنەن سىر شەرتۋى كەرەك»، - دەيدى كومپوزيتور سەرگەي كيم.

ايتا كەتەيىك، اتالعان بايقاۋ جەڭىمپازدارى ادەتتە جىل سوڭىندا بەلگىلى بولادى. ءبىراق كوروناۆيرۋس ىندەتىنىڭ ورشۋىنەن سىيلىقتى تابىستاۋ ءراسىمى بيىلعا قالدىرىلعان.