"قازاۆتوجول" ۇلتتىق كومپانياسى قازاقستاندا اۋا رايى كۇرت وزگەرىپ جاتقانىن ەسكە سالدى. ءبىرقاتار وڭىرلەردە العاشقى قار ءتۇسىپ، كوكتايعاق بولاتىنىن ەسكەرتتى، دەپ حابارلايدى Aqshamnews.kz ءتىلشىسى كومپانيا دەرەگىنە سىلتەمە جاساپ. وسىعان بايلانىستى جۇرگىزۋشىلەرگە كولىكتەرىن قىسقى ماۋسىمعا الدىن الا دايىنداۋ ۇسىنىلدى.
كومپانيا ماماندارىنىڭ ايتۋىنشا:
"جولداردا كوكتايعاق باستالادى، ال تەجەلۋ قاشىقتىعى بىرنەشە ەسە ارتادى. ءوزىڭىزدىڭ جانە اينالاڭىزداعى ادامداردىڭ قاۋىپسىزدىگىن ويلاڭىز"، - دەلىنگەن ەسكەرتۋدە.
"قازاۆتوجول" جۇرگىزۋشىلەرگە مىناداي كەڭەس بەرەدى:
- كولىكتى قىسقى دوڭگەلەكتەرگە اۋىستىرۋ جولداعى تايعاقتان تەجەيدى.
- تەجەۋ جۇيەسىن، اككۋمۋلياتوردى جانە جارىق قۇرالدارىنىڭ دۇرىستىعىن تەكسەرۋ.
- قىسقى وتىن پايدالانۋعا جانە انتيفريز دەڭگەيىن باقىلاۋعا كوڭىل ءبولۋ.
- جىلدامدىق رەجيمىن جانە ءقاۋىپسىز اراقاشىقتىقتى ساقتاۋ، كۇرت مانيەۆرلەردەن اۋلاق بولۋ.
"ەسىڭىزدە بولسىن، اۋا رايىن ەسكەرمەسە، تاجىريبەلى جۇرگىزۋشىنىڭ ءوزى قيىن جاعدايعا تاپ بولۋى مۇمكىن. ءوز-وزىڭىزدى جانە جاقىندارىڭىزدى قورعاڭىز. الدا قىس، ءبارى ءسىزدىڭ ۇقىپتىلىعىڭىز بەن جاۋاپكەرشىلىگىڭىزگە بايلانىستى"، - دەپ اتاپ ءوتتى كومپانيا.
سونىمەن قاتار، جول قىزمەتتەرى تاۋلىك بويى قوزعالىس قاۋىپسىزدىگىن قامتاماسىز ەتۋدى جالعاستىرىپ جاتقانى حابارلاندى. سۇراقتار تۋىنداعان جاعدايدا جۇرگىزۋشىلەر 1403 قىسقا نومىرىندەگى جەدەل جەلىگە حابارلاسا الادى.