نيۋ-دەليدە تەننيستەن قازاقستان جاسوسپىرىمدەر قۇراماسى Davis Cup كۋبوگى (الەم چەمپيوناتى) ىرىكتەۋ كەزەڭىنىڭ شيرەك فينالىنا شىقتى.
جارىستىڭ ەكىنشى كۇنى قازاقستاندىق جاسوسپىرىمدەر ۆەتنام قۇراماسىن 2:1 ەسەبىمەن ۇتتى. ءبىرىنشى ويىندا ءامىر ومارحانوۆ قارسىلاسىنا ەش مۇمكىندىك قالدىرعان جوق – 6:0، 6:0، دەپ حابارلايدى Almaty-akshamy.kz ۇلتتىق وليمپيادا كوميتەتىنە سىلتەمە جاساپ.
تارتىستى وربىگەن ەكىنشى ماچتا دانير قالدىبەكوۆ تە ءۇمىتتى اقتادى – 2:6، 6:2، 6:3. ەشتەڭەنى شەشپەيتىن ءۇشىنشى باسەكەدە ءا.ومارحانوۆ پەن ۆيتاليي زاسەپين ۇتىلىپ قالدى. وسىلايشا قازاقستان جاسوسپىرىمدەر قۇراماسى مەرزىمىنەن بۇرىن شيرەك فينالعا جولداما الدى. ەرتەڭ قازاقستاندىقتار D توبىنداعى سوڭعى ماچىن تايلاندپەن وتكىزەدى. شيرەك فينال جەرەبەسى 13 ءساۋىر كۇنى كەشكىسىن تارتىلادى.