«ءبىر اۋىل – ءبىر ءونىم» باستاماسى تابىستى تۇردە جۇزەگە اسىپ كەلە جاتقانىنا ون جىلعا جۋىق ۋاقىت بولدى.
قازاقستاندىق فەرمەرلەر مەن اۋىل شارۋاشىلىعى ونىمدەرىن وندىرۋشىلەر فرانسيانىڭ تۋر قالاسىندا وتكەن الەمدىك سىر بايقاۋى Le Mondial du Fromage-دە بەدەلدى ماراپاتتارعا يە بولىپ، جاھاندىق قوعامداستىقتىڭ نازارىن وزدەرىنە اۋداردى، - دەپ حابارلايدى Aqshamnews.kz اۋىل شارۋاشىلىعى مينيسترلىگىنە سىلتەمە جاساپ.
الەمدەگى ەڭ بەدەلدى سىر وندىرۋشىلەر بايقاۋلارىنىڭ بىرىندە قازاقستاندىق قاتىسۋشىلار 32 ەلدەن كەلگەن ۇمىتكەرلەرمەن ب ا ق سىناپ، ءۇش التىن، ءبىر كۇمىس جانە ەكى قولا مەدالعا قول جەتكىزدى.
التىن مەدالداردىڭ ءبىرىن كوكشەتاۋلىق بەس بالانىڭ اناسى ەلۆيرا مۇقاشيەۆا يەلەندى. ەلۆيرا ءۇي جاعدايىندا تابيعي يوگۋرت، ايران جانە ىرىمشىك وندىرۋدەن باستاعان. ۋاقىت وتە كەلە حوببي كاسىبي ىسكە اينالىپ، ول كۇنىنە 100 ليترگە دەيىن ءسۇت وڭدەدى. كەيىنىرەك مەملەكەتتىك گرانتتارعا يە بولدى — اۋەلى 1،4 ملن تەڭگە، ودان كەيىن 5 ملن تەڭگە. بۇل قاراجات توڭازىتقىش جابدىعىن، سەپاراتور مەن كاسىبي ىرىمشىك قايناتاتىن قازان ساتىپ الۋعا جۇمسالدى.
«قازاقستاندى الەمدىك دەڭگەيدە تانىتا العانىما ماقتانامىن. ءبىزدىڭ ەلىمىزدىڭ الەۋەتى زور، اسىرەسە اگروسەكتوردا»، — دەپ ءبولىستى كاسىپكەر.
ەكىنشى التىن مەدالعا ماڭعىستاۋدان شىققان «جەتى لاق» فەرماسىنىڭ نەگىزىن قالاۋشىلار يە بولدى. قوبزيەۆتەر اۋلەتىنىڭ فەرماسىندا پاستەرلەنگەن ەشكى ءسۇتى، يوگۋرت، ايران، قايماق، سۇزبە جانە 12 ءتۇرلى ىرىمشىك وندىرىلەدى. اي سايىن مۇندا 3،5 تونناعا دەيىن ەشكى ءسۇتى وڭدەلەدى.
«ءبىز مەملەكەتتىك گرانتتىق باعدارلامالارعا جانە «اۋىل اماناتى» سياقتى باستامالارعا بەلسەندى قاتىسامىز. مەملەكەتتىك قولداۋسىز اۋىلداعى اگروبيزنەستى دامىتۋ وتە قيىن بولار ەدى. قازاقستاننىڭ حالىقارالىق سىر ارەناسىنداعى جەڭىسى – ءبارىمىزدىڭ ورتاق ماقتانىشىمىز»، — دەدى فەرما وكىلى الەكساندر گريگولوۆ.
ءۇشىنشى التىن مەدالعا بۋراباي اۋدانى قاتاركول اۋىلىنىڭ تۇرعىنى رۋسلان سوكولوۆ ءوزىنىڭ اۆتورلىق «بۋرا» ىرىمشىگىمەن قول جەتكىزدى.
«Le Mondial du Fromage» ماعان ەرەكشە شابىت سىيلادى. بايقاۋعا قاتىسۋ جانە الەمنىڭ تۇكپىر-تۇكپىرىنەن كەلگەن ىرىمشىك وندىرۋشىلەرىمەن تاجىريبە الماسۋ – باعا جەتپەس مۇمكىندىك. التىن مەدال – بۇل تەك قۋانىش ەمەس، سونىمەن بىرگە ۇلكەن جاۋاپكەرشىلىك»، — دەپ اتاپ ءوتتى سوكولوۆ.
قازاقستاندىق ىرىمشىكشىلەردىڭ جەتىستىگى اۋىل شارۋاشىلىعىن قولداۋ، ۇلتتىق ونىمدەردى ناسيحاتتاۋ، اۋىل كاسىپكەرلەرىن ىنتالاندىرۋ جانە اگرارلىق ەكونوميكانى دامىتۋ باعىتىنداعى كەشەندى مەملەكەتتىك ساياساتتىڭ تيىمدىلىگىن ايقىن كورسەتتى.