بۇگىن، 18 قىركۇيەك كۇنى، ساعات 19:00-دە رەسپۋبليكا سارايىنىڭ الدىنداعى اباي الاڭىندا «مۇرا» اتتى كلاسسيكالىق مۋزىكا كەشى وتەدى، - دەپ حابارلايدى Aqshamnews.kz.
كونسەرت الماتىنىڭ قالا كۇنى قارساڭىندا ۇيىمداستىرىلىپ، مەگاپوليس تۇرعىندارى مەن قوناقتارىنا اكىمدىك پەن اباي اتىنداعى قازاق ۇلتتىق وپەرا جانە بالەت تەاترىنىڭ سىيى بولماق. تەاتر ءوز كەزەگىندە 92-ماۋسىمىن اشىپ وتىر.
اشىق اسپان استىنداعى ساحنادا شتراۋس پەن ءپۋچچينيدىڭ شىعارمالارىنان باستاپ، اباي مەن حاسانعالييەۆتىڭ اندەرىنە دەيىن الەمدىك جانە قازاق كلاسسيكاسىنىڭ جاۋھارلارى ورىندالادى. باعدارلامادا اريالار، رومانستار جانە ەلدىڭ ەڭ تاڭداۋلى داۋىس يەلەرىنىڭ شەرۋى بار. ولاردى حور، سيمفونيالىق وركەستر جانە بالەت ارتيستەرى سۇيەمەلدەيدى. ەۋروپا ساز ونەرىنىڭ نازىك ورنەگى مەن ۇلتتىق اۋەننىڭ باي قازىناسى توعىسىپ، ونەردىڭ ۇلكەن مەرەكەسىنە اينالادى. ءىس-شاراعا كىرۋ تەگىن.
ۇيىمداستىرۋشىلار كورەرمەندەردى ءداستۇرلى كلاسسيكا مەن زاماناۋي تەحنولوگيالاردىڭ ۇيلەسىمىمەن تاڭقالدىرۋدى كوزدەپ وتىر. ءار نومىرگە فۋتۋريزم ەلەمەنتتەرى بار ەكسكليۋزيۆتى كوستيۋمدەر مەن ەرەكشە سەنوگرافيالىق شەشىمدەر دايىندالعان. جارىق بەرۋ ەففەكتىلەرى مەن جىلجىمالى قۇرىلىمدار قازاقستاندا بۇرىن-سوڭدى بولماعان ەرەكشە كورىنىس جاسايدى. بۇل كەشتە ۇلتتىق جانە الەمدىك وپەرادان بولەك، ايگىلى ميۋزيكل مەن بالەت قويىلىمدارىنان ءۇزىندى ورىندالىپ، كونسەرت شىن مانىندە ۇمىتىلماس وقيعاعا اينالادى.