س.امانجولوۆ اتىنداعى شىعىس قازاقستان ۋنيۆەرسيتەتىنىڭ عالىمدارى جاتىر موينى وبىرىن كەشەندى دياگنوستيكالاۋ ءۇشىن ەرىتىندى جاساپ شىعاردى. ەكى جىل بويى عىلىمي قىزمەتكەرلەر ساۋىقتىرۋ ورتالىعىنىڭ وكىلدەرىمەن بىرلەسە سيتولوگيا سالاسىندا سۇرانىسقا يە سۇيىقتىق قۇرامىن ازىرلەدى دەپ حابارلايدى almaty-akshamy.kz
ق ر بعم باسپا ءسوز قىزمەتىنىڭ مالىمەتىنشە، ناتيجەسىندە ولار بۇرىن-سوڭدى شەتەلدەن اكەلىنگەن وتاندىق ءونىمدى جاساي الدى. ەندى عالىمداردىڭ بۇل جاڭاشىلدىقتارى مەديسينالىق قىزمەتتىڭ قۇنىن تومەندەتۋگە مۇمكىندىك بەرەدى. ويتكەنى ول قارجىلىق جاعىنان دا، گەوگرافيالىق جاعىنان دا قولجەتىمدى بولا تۇسپەك. عالىمداردىڭ ايتۋىنشا، ەرىتىندىنىڭ ساپاسى شەتەلدىك انالوگتاردان كەم تۇسپەيدى.
«ءبىزدىڭ عالىمدارىمىزدىڭ جاساپ شىعارعان تۋىندىسى يمپورتتى الماستىرۋ ماسەلەسىن شەشەدى. وسى زەرتتەۋدىڭ ناتيجەسىندە بيوماتەريالدى ساقتاۋعا ارنالعان بەكىتۋشى ەرىتىندىنىڭ وڭتايلى قۇرامى جاسالدى. بۇل بيوماتەريالداردى تۇراقتاندىرۋعا جانە تاسىمالداۋعا مۇمكىندىك بەرەدى، ياعني ونكولوگيالىق اۋرۋدى ودان ءارى دياگنوستيكالاۋ ءۇشىن جاتىر موينىنا جاقپا رەتىندە پايدالانىلادى. بۇل ازىرلەمەنىڭ بىرەگەيلىگى – قاتەرلى ىسىكتى تەز دياگنوستيكالاۋ ماسەلەلەرىن كەشەندى تۇردە شەشۋ بولىپ تابىلادى»، – دەدى س.امانجولوۆ اتىنداعى شىعىس قازاقستان ۋنيۆەرسيتەتى ۇلتتىق عىلىمي زەرتحاناسىنىڭ كىشى عىلىمي قىزمەتكەرى ايدانا يماشيەۆا.
ايتا كەتەيىك، عالىمدار توبى وزدەرى ازىرلەگەن بەكىتۋشى ەرىتىندىگە پاتەنت الدى. ناتيجەسىندە بۇل ءونىم قازاقستان رەسپۋبليكاسىنىڭ دارىلىك زاتتار مەن مەديسينالىق بۇيىمدار تىزىلىمىنە ەنگىزىلدى. قازىرگى تاڭدا جوبا كوممەرسيالاندىرۋ ساتىسىندا. سونىمەن قاتار عالىمدار باسقا دا بيولوگيالىق ماتەريالداردى ساقتاۋ ەرىتىندىسىنىڭ قۇرامىن جاقسارتۋ بارىسىندا جۇمىس ىستەۋدە.