كورەيانىڭ ەكىنشى ءىرى قالاسى قازاقستاندىق جوبالاردى ينۆەستيسيالايدى
بۇل تۋرالى ەلىمىزدىڭ كورەياداعى ەلشىسى باقىت دۇيسەنبايەۆتىڭ ىسكەرلىك ساپارى بارىسىندا بەلگىلى بولدى. قازاقستاندىق دەلەگاسيانىڭ پۋسان باسشىلىعىمەن كەزدەسۋىندە قازاقستاننىڭ باس كونسۋلدىعىن اشۋ ماسەلەسى تالقىلاندى. ءتيىستى جارلىققا بيىل تامىز ايىندا پرەزيدەنت قاسىم-جومارت توقايەۆ قول قويعان، دەپ حابارلايدى Almaty-akshamy.kz.
وڭىردەگى ءىرى كومپانيالاردىڭ قاتىسۋىمەن وتكەن دوڭگەلەك ۇستەلدە رەسپۋبليكامىزدىڭ ينۆەستيسيالىق مۇمكىندىكتەرى تانىستىرىلدى. ىسكەرلىك توپ وكىلدەرى اياقكيىم ءوندىرىسى، لوگيستيكا، مۇناي-حيميا جانە اۆتوموبيل قۇرال-جابدىق بولىكتەرى سالالارىندا ىنتىماقتاستىق ورناتۋعا مۇددەلى.
«قازاقستاندى ورتالىق ازياداعى ۇلكەن ترانزيتتىك مۇمكىندىكتەرى بار باستى مەملەكەت رەتىندە بىلەمىز. ءبىز لوگيستيكامەن اينالىسامىز. ەگەر مۇمكىندىك بولسا، وسى سالاعا ينۆەستيسيا سالعىمىز كەلەدى. ويتكەنى كورەيادان ەۋروپاعا تاۋاردى تەڭىزگە قاراعاندا قازاقستان اۋماعى ارقىلى 3 ەسە جىلدام جىبەرۋگە بولادى»، - دەيدى لوگيستيكا كومپانياسىنىڭ پرەزيدەنتى يان دجە سەن.