جانۋ پروبلەمالارى ينستيتۋتىنىڭ عالىمدارى ق ر بعم «عىلىم قورى» اق قولداۋىمەن بيولوگيالىق ۇيلەسىمدى كالسيي گيدروكسياپاتيتىن قۇرۋ بويىنشا زاماناۋي مەديسينادا كەڭىنەن قولدانىلاتىن يننوۆاسيالىق تەحنولوگيانى ازىرلەدى، دەپ حابارلايدى almaty-akshamy.kz ق ر بعم باسپا ءسوز قىزمەتىنە سىلتەمە جاساپ.
بۇرىن-سوڭدى قازاقستاندا بۇل ءونىم وندىرىلمەي، شەتەلدەن اكەلىنگەن بولاتىن. ەندى عالىمداردىڭ بۇل جاڭالىعى كورسەتىلەتىن مەديسينالىق قىزمەتتەردىڭ قۇنىن تومەندەتۋگە مۇمكىندىك بەرەدى. ويتكەنى اتالعان ءونىم گەوگرافياسى بويىنشا دا، قارجىلىق جاعىنان دا قولجەتىمدى بولادى.
«وتاندىق ءونىم قازىرگى زامانعى حيرۋرگيالىق ستوماتولوگيادا جانە جاق-بەت حيرۋرگياسىندا، كوسمەتولوگيادا جوعالعان كولەمدى قالپىنا كەلتىرۋ ءۇشىن تولتىرعىش رەتىندە قولدانىلاتىن بولادى. يننوۆاسيا فارماكولوگيادا جانە مەتالل يمپلانتاتتارىنا جابىن رەتىندە قولدانىلادى. تەحنولوگيانىڭ بىرەگەيلىگى — مەديسينادا تالاپ ەتىلەتىن كالسيي گيدروكسياپاتيتىن ءبىز بيولوگيالىق قالدىقتاردى وڭدەۋ ناتيجەسىندە الامىز»، — دەپ اتاپ ءوتتى ق ر بعم عىلىم كوميتەتى جانۋ پروبلەمالارى ينستيتۋتىنىڭ جەتەكشى عىلىمي قىزمەتكەرى شىڭعىس داۋىلبايەۆ.
ەندى عالىمدار وتاندىق ستوماتولوگيالىق نارىقتىڭ قاجەتتىلىكتەرى ءۇشىن ونەركاسىپتىك ۇلگىلەردى ءوندىرۋدى جوسپارلاپ وتىر. جوبانىڭ پراكتيكالىق جانە كوممەرسيالىق ماقساتتا ماڭىزدىلىعى زور.
«بيولوگيالىق قالدىق ماتەريالدى پايدالانۋ شەتەلدىك انالوگتارمەن سالىستىرعاندا ستوماتولوگيالىق قىزمەتتەردىڭ وزىندىك قۇنىن ايتارلىقتاي تومەندەتۋگە مۇمكىندىك بەرەدى. مىسالى، ءبىزدىڭ ماتەريال نەگىزىندە ارنايى پلەنكالار شىعارىلادى. بۇل پلەنكالار دارى-دارمەكتەرمەن بايىتىلادى. وسىلايشا، بۇل ءتىس اۋرۋى نەمەسە قابىنۋ ورنىن دارى-دارمەكپەن قامتۋدىڭ وڭاي ءادىسى بولادى. بيوسايكەستىك اسەرى بولعاندىقتان، ادام اعزاسى بۇل ماتەريالدى جەڭىل قابىلدايدى»، — دەدى عالىم شىڭعىس داۋىلبايەۆ.