قالامىزدىڭ مەملەكەتتىك ورتالىق مۋزەيىندە «كوشپەندىلەر» تريلوگياسى – «تاۋەلسىزدىك جارشىسى» اتتى كورمەنىڭ اشىلۋ سالتاناتتى ءوتتى. ءىس-شارا تاۋەلسىزدىكتىڭ 30 جىلدىعىنىڭ قارساڭىندا «كوشپەندىلەر» تريلوگياسىنىڭ جارىققا شىققانىنا 50 جىل تولۋىنا وراي ۇيىمداستىرىلدى، دەپ حابارلايدى almaty-akshamy.kz.
كورمە اياسىندا ءىلياس ەسەنبەرليننىڭ 6 تومدىق تولىق شىعارمالار جيناعى ۇسىنىلدى. باسىلىمعا جازۋشىنىڭ بارلىق شىعارمالارى، ونىڭ ىشىندە «كوشپەندىلەر» جانە «التىن وردا» تاريحي ەپوپەيالارى، سونىمەن قاتار سوۆەتتىك كەزەڭدە جارىق كورمەي قالعان روماندارى كىردى. اتالمىش ءىس-شاراعا مەملەكەت، عىلىم، ونەر قايراتكەرلەرىمەن قاتار، الماتى قالاسى مادەنيەت باسقارماسىنىڭ وكىلدەرى مەن كورنەكتى جازۋشىنىڭ نەمەرەلەرى قاتىستى. سونىمەن قاتار قالامىزداعى ءى.ەسەنبەرليننىڭ ەسىمى بەرىلگەن 25-مەكتەپ-گيمنازياسىنىڭ مۇعالىمدەرى ءسوز سويلەدى.
ق ر مەملەكەتتىك ورتالىق مۋزەيىنىڭ ديرەكتورى نۇرسان الىمبايەۆ ءوز سوزىندە: «ءى.ەسەنبەرليننىڭ شىعارمالارىنىڭ تاريحي، عىلىمي تاعىلىمى ءوز الدىنا بولەك اڭگىمە، ال يدەالوگيالىق تۇرعىدان قاراستىرعاندا وزىندىك ەرەكشەلىككە تولى. «ءولدى دەۋگە بولا ما ايتىڭدارشى، ولمەيتۇعىن ارتىندا ءسوز قالدىرعان» دەپ ۇلى اباي ايتپاقشى، قازاق باردا ونىڭ ەڭبەكتەرى تاسقا قاشاپ جازعانداي عاسىردان-عاسىرعا ساقتالاتىنىنا كۇمان جوق»، - دەپ توقتالدى.
جالپى، «كوشپەندىلەر» تريلوگياسى الەمنىڭ 30 تىلىندە جارىق كورىپ، 50 رەت قايتا باسىلعان. ەلباسى نۇرسۇلتان نازاربايەۆ «كوشپەندىلەر» تريلوگياسىن «قازاق حالقىنىڭ ەنسيكلوپەدياسى» دەپ اتاپ، جازۋشىنىڭ شىعارماشىلىعىن جوعارى باعالاعان. ال پرەزيدەنت قاسىم-جومارت توقايەۆ: «ءىلياس ەسەنبەرليننىڭ ەڭبەكتەرىنە تەرەڭ بويلاماعان ادام ۇلت تاريحىن جەتىك بىلەمىن دەپ ايتا الماسا كەرەك»، - دەيدى. كورمەنىڭ اشىلۋىندا ءسوز سويلەگەن اقىن ولجاس سۇلەيمەنوۆ ءى.ەسەنبەرليننىڭ ەسىمى قازاق ادەبيەتى مەن تاريحىندا التىن ارىپپەن جازىلىپ، ەل ەسىندە قالاتىنىن ءسوز ەتتى.
ال تاريح عىلىمدارىنىڭ دوكتورى زيابەك قابىلدينوۆ:
«بۇكىل ەلدىڭ تاريحشىلارى، سونىڭ ىشىندە، شوقان ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ۇجىمى وسى جەتى توم اكادەميالىق باسىلىمدى دايىنداۋعا كىرىسىپ كەتتى. وسى باعىتتا ءىلياس ەسەنبەرليننىڭ تاريحي تۇجىرىمدامالارىن مىندەتتى تۇردە پايدالانامىز. ءىلياس ەسەنبەرلين – سەنزۋراعا قاراماي، سول زاماننىڭ دەرەك بازاسىنىڭ ازدىعىنا قاراماي، قازاقتىڭ شىن تاريحىن كوركەم ادەبيەتتە جەتكىزە بىلگەن قازاقتىڭ ءبىرتۋار ازاماتى»، – دەدى.
كورمەگە جيناقتان بولەك قالامگەردىڭ عۇمىرىنان سىر شەرتەتىن فوتوماتەريالدار مەن قۇجاتتار، ماراپاتتار مەن قولجازبالار، جەكە حاتتارى قويىلدى. كورمە قاراشا ايىنىڭ سوڭىنا دەيىن جالعاسادى.