بۇل ۋنيۆەرسيتەت ينفراقۇرىلىم مەن كولىكتى قوسا العاندا، ءارتۇرلى سالالارداعى زەرتتەۋلەر مەن يننوۆاسيالار شوعىرلانعان الەمدىك ورتالىق سانالادى
مەملەكەتتىك تاپسىرما شەڭبەرىندە تاجىريبە الماسۋ ماقساتىندا قازاقستان جول عىلىمي-زەرتتەۋ ينستيتۋتىنىڭ ماماندارى كاليفورنياداعى بەركلي ۋنيۆەرسيتەتىمەن ستراتەگيالىق ماڭىزدى ىنتىماقتاستىق ورناتتى، دەپ حابارلايدى اlmaty-akshamy.kz. اتاپ ايتقاندا، ۋنيۆەرسيتەتتىڭ زياتكەرلىك ينفراقۇرىلىم ورتالىعىنىڭ ديرەكتورى، پروفەسسور شاحزود تاحيروۆپەن بىرلەسكەن جۇمىس تۋرالى كەلىسىمگە قول قويىلدى.
بۇگىندە PhD دوكتورى ش.تاحيروۆ سەنسورلىق قوندىرعىلاردى زەرتتەۋ مەن جول ينفراقۇرىلىمىنا ەنگىزۋگە باعىتتالعان تەحنولوگيالاردى ازىرلەپ جاتىر. حالىقارالىق دەڭگەيدەگى جولشىلاردىڭ پىكىرلەرىنە سۇيەنسەك، بۇل تەحنولوگيا اقاۋلاردى الدىن-الا بولجاۋعا جانە انىقتاۋعا مۇمكىندىك بەرەدى، سونىمەن بىرگە اۆتوجولداردى كۇتىپ ۇستاۋ مەن پايدالانۋدىڭ تيىمدىلىگىن ارتتىرۋعا كومەكتەسەدى.
«وسى ىنتىماقتاستىقتىڭ ناتيجەسىندە ەلىمىزدىڭ اۆتوموبيل جولدارىنا يننوۆاسيالىق تەحنولوگيالاردى ەنگىزۋگە بولادى. بۇل كولىك ينفراقۇرىلىمىن دامىتۋعا جانە ونىڭ سەنىمدى تۇردە پايدالانۋعا ىقپال ەتەدى. قول قويىلعان كەلىسىمدەر اۆتوموبيل جولدارىن مونيتورينگىلەۋ جانە ولارعا قىزمەت كورسەتۋ، سونداي-اق كولىك ينفراقۇرىلىمىن دامىتۋ، جول قۇرىلىستارىنىڭ قاۋىپسىزدىگى مەن سەنىمدىلىگىن قامتاماسىز ەتۋ سالاسىنداعى جاقسى كورسەتكىشتەرگە ىقپال ەتۋى مۇمكىن»، دەپ اتاپ ءوتتى قازجولعزي ۆيسە-پرەزيدەنتى ەرىك امىربايەۆ.
سونىمەن قاتار قازاقستاندىق جولشىلار اقش-قا جۇمىس ساپارى بارىسىندا Sensor Fusion and Monitoring Technologies كومپانياسىنا باردى. وتاندىق ماماندار جول قۇرىلىمدارىن مونيتورينگتەۋ جانە تەستىلەۋ سالاسىنداعى وزىق تەحنولوگيالارمەن تانىستى.