وتاندىق ديزاينەر ەتنيكالىق ستيلدە پىشىلگەن كويلەكتەرمەن شەتەلدى باعىندىرىپ ءجۇر.
ەتنيكالىق ستيلدەگى قالىڭدىقتىڭ سالتاناتتى كويلەكتەرىن ءپىشىپ جۇرگەن اناستاسيا رومانوۆانىڭ ءار ۋاقىتى ساناۋلى، ءار كۇنى باعالى. قىركۇيەك ايىندا وتاندىق ديزاينەر يتاليانىڭ ميلان قالاسىنداعى شوۋعا، ال ودان بۇرىن تۇركيادا 20 كيىم ۇلگىسىنەن قۇرىلعان جەكە توپتاماسىن ۇسىنادى، دەپ حابارلايدى Almaty-akshamy.kz
ۇلتتىق ناقىشتاعى العاشقى كويلەگىن ول وسىدان 6 جىل بۇرىن دۇنيەگە اكەلگەن.
«مەن كيىم ۇلگىلەرىنىڭ ءوز بويىنا ۇلتتىق ناقىش پەن زاماناۋي ءسان ۇلگىسىن ۇيلەستىرگەن ەرەكشە مانەردە بولعانىن قالادىم. سوندىقتان جۇمىستارىمىز قازاقستان نارىعىندا ۇسىنعان وزگە ۇلگىلەردەن ەرەكشەلەنىپ تۇرادى»، - دەيدى قالىڭدىق كويلەكتەرىنىڭ ديزاينەرى اناستاسيا رومانوۆا.
شەبەر ۆەليۋر جانە بارقىت سياقتى تىعىز ماتالارمەن جۇمىس ىستەۋدەن باس تارتقان. كيىم ۇلگىسى تاپسىرىس بەرۋشىنىڭ تالعامىنا ساي جاسالادى. ياعني، وزگەدە كەزىكپەيتىن، قايتالانباس دارا ۇلگىدە بولادى. ولاردىڭ بىرىندە نازىك قىزدارعا ارنالعان «قالىڭدىقتىڭ تاسى» دەپ اتالىپ كەتكەن راۋشان كۆارسىن كەزىكتىرسەڭىز، ەندى ءبىرى وزىنە سەنىمدى ءسانقويلاردىڭ تالعامىنان شىعاتىن اسەم نەفريتپەن بەزەندىرىلگەن. بۇنداي كيىم ۇلگىلەرىنە تاپسىرىس ەل ىشىمەن قاتار شەت مەملەكەتتەردەن ءجيى ءتۇسىپ جاتادى.
كوزدىڭ جاۋىن الاتىن قازىنالى قازاق مادەنيەتى ءوزىنىڭ بىرەگەيلىگىمەن الەمدى وزىنە باۋراپ الدى. اقش، رەسەي، فرانسيا ءتىپتى وڭتۇستىك افريكا سىندى الىس سىرت مەملەكەتتەر قازاقستاندىق زەرگەر گەورگيي مارينيچەنكونىڭ ەرەكشە جۇمىستارىمەن جاقسى تانىس. جاڭا ەتنيكالىق باعىتتا جاسالاتىن اشەكەي بۇيىمدارى كەڭگە تانىمال. شەبەر تەك قازاقستان اۋماعىنان تابىلعان باعالى تاستاردى زاماناۋي قۇرالداردىڭ كومەگىنسىز ءداستۇرلى تۇردە قولمەن وڭدەيدى.
«مەن ءبىزدىڭ جاڭا ەتنيكالىق بۇيىمداردى جاساۋعا دەن قويامىن. باي مادەنيەتىمىزدى شەتەلگە تانىتۋ ءۇشىن ولاردى گەرمانيا، امەريكا سىندى ەلدەردەگى كورمەلەرگە شىعارعىم كەلەدى. وتانداستارىمدى جاقسى ءتۇسىنۋ ءۇشىن ءقازىر قازاق ءتىلىن مەڭگەرۋدى قولعا الدىم»،- دەيدى زەرگەر گەورگيي مارينيچەنكو.
.