بۇل ءادىس جاڭا تۋعان نارەستەنىڭ جاتىردان «وزدىگىنەن» شىعۋىنا مۇمكىندىك بەرەدى.
قازاقستاندىق دارىگەرلەر «تابيعي» كەسار تىلىگىن موديفيكاسيالاۋ بويىنشا شەبەرلىك ساباعىن وتكىزدى، دەپ حابارلايدى اlmaty-akshamy.kz.
دەنساۋلىق ساقتاۋ مينيسترلىگىنىڭ حابارلاۋىنشا، قازاقستاندا بۇل ءادىستى س.ج. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتى اكۋشەرلىك جانە گينەكولوگيا كافەدراسىنىڭ پروفەسسورى گ.ك. وماروۆا جەتىلدىرىپ، پراكتيكالىق اكۋشەرلىككە «تابيعي» كەسار تىلىگىنىڭ موديفيكاسياسى رەتىندە ەنگىزدى.
وسى ءادىس بويىنشا العاشقى وپەراسيا الماتى قالاسىندا وتكەن ەدى.
بۇگىنگى تاڭدا جەتىسۋ وبلىسىنىڭ دارىگەرلەرى بۇل تاجىريبەنى وبلىستىق پەريناتالدىق ورتالىقتىڭ بازاسىندا قولدانادى.
«تابيعي» كەسار تىلىگىنىڭ موديفيكاسياسى فيزيولوگيالىق بوسانۋدىڭ بيومەحانيزم قاعيداتتارىن ۇستانىپ قانا قويمايدى، بۇل ءادىس جاڭا تۋعان نارەستەنىڭ جاتىردان «وزدىگىنەن» شىعۋىنا مۇمكىندىك بەرەدى. سونىمەن قاتار ايەل بوسانا سالىپ بالاسىمەن تىكەلەي بايلانىستا بولادى.
«جاڭا تۋعان نارەستەنىڭ انانىڭ تەرىسىمەن ەرتە بايلانىسىن حيرۋرگ ونى وپەراسيالىق كيىمدە ارنايى جاسالعان «تەرەزە» ارقىلى انانىڭ كەۋدەسىنە اۋىستىرۋ ارقىلى قامتاماسىز ەتەدى، وسىلايشا بالا مەديسينا پەرسونالىمەن بايلانىسپايدى. وپەراسيا كەزىندە بوسانعان ايەل جاڭا تۋعان نارەستەمەن باستاپقى جانە تىكەلەي بايلانىستا بولادى، پسيحوەموسيونالدى قاناعاتتانۋدى سەزىنەدى، ونى ءومىردىڭ العاشقى مينۋتتارىنان باستاپ كورەدى»، - دەيدى پروفەسسور.
«تابيعي» كەسار تىلىگىنىڭ موديفيكاسياسى ارتىقشىلىقتارىنىڭ ءبىرى – فيزيولوگيالىق بوسانۋدىڭ بيومەحانيزم قاعيداتتارىن ساقتالادى، ياعني ينتەروپەراسيالىق كەزەڭنەن باستاپ اكۋشەر مەن نەوناتولوگتى اينالىپ ءوتىپ، انا مەن بالا بىرگە بولادى، جاڭا تۋعان نارەستە فيزيولوگيالىق جاعىنان تەز بەيىمدەلەدى.
«2022 جىلى پروفەسسور گ. وماروۆا «انا مەن بالا» كونفەرەنسياسىندا ءوزىنىڭ بىرەگەي ادىستەمەسىن تانىستىردى. جەتىسۋ وبلىسىنىڭ دارىگەرلەرى قىزىعۋشىلىق تانىتتى، ال 2023 جىلى ءبىز قازاقستاندا ءبىرىنشى بولىپ تابيعي كەسار تىلىگى ءبولىمىن قولداندىق»، - دەپ ءبولىستى جەتىسۋ وبلىسىنىڭ دەنساۋلىق ساقتاۋ باسقارماسى باسشىسىنىڭ ورىنباسارى ايگەرىم باۋىرجان قىزى.
«تابيعي» كەسار تىلىگىنىڭ موديفيكاسيالانعان ءادىسى جوسپارلى تۇردە جۇرگىزىلدى جانە ءۇش كۇننىڭ ىشىندە دارىگەرلەر 10 ايەلدى بوساندىردى.