بۇگىن قازاقستان رەسپۋبليكاسى پارلامەنتىنىڭ سەناتىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتىق قورعاۋ، ەلەكتر ەنەرگەتيكاسى جانە مەملەكەتتىك مۇلىكتى باسقارۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى تالقىلاۋ بويىنشا پلەنارلىق وتىرىس ءوتتى.
زاڭ ازاماتتىق قورعاۋ جۇيەسىن كەشەندى جەتىلدىرۋگە، ازاماتتىق قورعاۋ ورگاندارى قىزمەتكەرلەرىنىڭ الەۋمەتتىك جانە قۇقىقتىق مارتەبەسىن جاقسارتۋعا، ءورت جانە ونەركاسىپتىك قاۋىپسىزدىك سالاسىنداعى نورمالاردى وزەكتەندىرۋگە، ازاماتتىق قورعانىس تەتىكتەرىن دامىتۋعا جانە توتەنشە جاعدايلاردىڭ الدىن الۋ مەن ولاردى جويۋ جونىندەگى شارالاردىڭ تيىمدىلىگىن ارتتىرۋعا باعىتتالعان، دەپ حابارلايدى aqshamnews.kz.
زاڭ قاۋىپ-قاتەرلەرگە دەن قويۋدىڭ قۇقىقتىق جانە ۇيىمداستىرۋشىلىق نەگىزىن كۇشەيتۋگە مۇمكىندىك بەرەدى، قازاقستان رەسپۋبليكاسىندا ازاماتتىق قورعاۋ جۇيەسىنىڭ ورنىقتى جۇمىس ىستەۋى ءۇشىن جاعداي جاسايدى.
زاڭ مەملەكەت باسشىسىنا قول قويۋعا ەنگىزىلەتىن بولادى.
زاڭدا ءورت جانە ونەركاسىپتىك قاۋىپسىزدىك، ازاماتتىق قورعانىس جانە سەيسميكالىق قاۋىپسىزدىك سالاسىنداعى جەكەلەگەن تالاپتار كۇشەيتىلدى. زاڭناماداعى نەگىزگى وزگەرىستەر:
ءورت قاۋىپسىزدىگى: ەندى بيىكتىگى 28 مەتردەن اساتىن ادامدار كوپ باراتىن وبەكتىلەر مەن عيماراتتار پايدالانۋعا بەرىلگەن كەزدە تجم ءورت قاۋىپسىزدىگى تالاپتارىنا سايكەستىگى تۋرالى قورىتىندى بەرەدى. ءورت سالدارىنان ءۇشىنشى تۇلعالارعا زيان كەلتىرىلگەن جاعدايدا، ادامدار كوپ باراتىن وبەكتىلەر يەلەرىنىڭ ازاماتتىق-قۇقىقتىق جاۋاپكەرشىلىگىن ساقتاندىرۋ جۇيەسى ەنگىزىلۋدە.
ەرىكتى ورتكە قارسى قۇرالىمدار: زاڭ ەرىكتىلەردىڭ جاراقاتتانۋى نەمەسە قازا تابۋى كەزىندە تولەمدەردى بەلگىلەيدى، سونداي-اق ولاردىڭ جالاقىسىن ساقتايدى جانە ءورتتى ءسوندىرۋ كەزەڭىندە نەگىزگى ەڭبەك مىندەتتەرىنەن بوساتادى.
ونەركاسىپتىك قاۋىپسىزدىك: تج مينيسترلىگىنە ءقاۋىپتى وندىرىستىك وبەكتىلەردى جاڭارتۋ مەن تەحنيكالىق قايتا جاراقتاندىرۋدىڭ جيىنتىق جوسپارىن، سونداي-اق پايدالى قازبالاردى ءوندىرۋ بويىنشا تاۋ-كەن جۇمىستارىنىڭ جوسپارىن كەلىسۋ وكىلەتتىكتەرى بەرىلەدى. كاسىبي اۆاريالىق-قۇتقارۋ قىزمەتتەرىن عيماراتتار مەن قۇرىلىستاردىڭ مامانداندىرىلعان كەشەنىمەن، وقۋ-جاتتىعۋ پوليگونىمەن، شاڭ-گاز تالداۋ زەرتحاناسىمەن، ارنايى تەحنيكامەن جانە جابدىقپەن جاراقتاندىرۋ تالاپتارى ەنگىزىلەدى. سونىمەن بىرگە ءقاۋىپتى وندىرىستىك وبەكتىلەرگە قاتىستى مەملەكەتتىك باقىلاۋ مەن قاداعالاۋدى جۇزەگە اسىرۋدىڭ ەرەكشە ءتارتىبى ەنگىزىلۋدە.
سەيسميكالىق قاۋىپسىزدىك: وبەكتىلەر مەن ينفراقۇرىلىمنىڭ سەيسميكالىق اسەرلەرگە تۇراقتىلىعىن ارتتىرۋ ماقساتىندا زاڭعا سەيسميكالىق قاۋىپسىزدىككە قاتىستى نورمالار ەنگىزىلدى.
ازاماتتىق قورعانىس: جىلجىمايتىن مۇلىك وبەكتىسى رەتىندە قۇقىقتىق كاداستردا قورعانىش قۇرىلىستارىن تىركەۋ ەنگىزىلۋدە. حالىقتى قورعاۋ ءۇشىن تۇرلەندىرىلگەن جەراستى پاركينگتەرى مەن جەرتولەلەردى قوسا العاندا، «قاراپايىم پانا» دەگەن جاڭا تۇسىنىك ەنگىزىلۋدە. ق ر پرەزيدەنتىنە باعىناتىن جانە ەسەپ بەرەتىن مەملەكەتتىك ورگاندارعا ازاماتتىق قورعانىس ءىس-شارالارىن ورىنداۋ بويىنشا وكىلەتتىكتەر بەرىلەدى.
مەملەكەتتىك باقىلاۋ: تج مينيسترلىگىنە ورتالىق مەملەكەتتىك ورگاندار مەن اكىمدىكتەرگە قاتىستى توتەنشە جاعدايلاردىڭ الدىن الۋ جونىندەگى باقىلاۋ فۋنكسياسى بەرىلەدى.
قىزمەتكەرلەردى الەۋمەتتىك قورعاۋ: ازاماتتىق قورعاۋ ورگاندارىنىڭ قىزمەتكەرلەرىن باسقا وڭىرلەرگە روتاسيالاۋ كەزىندە تۇرعىن ءۇي تولەمدەرى مەن قوسىمشا تولەمدەر ەنگىزىلەدى. توتەنشە جاعداي كەزەڭىندە، سونداي-اق تابيعي جانە تەحنوگەندىك سيپاتتاعى توتەنشە جاعداي جاريالانعان جەرلەردە مىندەتتەردى ورىنداۋ كەزىندە ءۇش ەسە مولشەردە ۇستەمەاقى بەلگىلەنەدى جانە ساناتوريي-كۋرورتتىق ەمدەۋمەن قامتاماسىز ەتىلەدى. بۇل شارالار قىزمەتكەرلەردىڭ الەۋمەتتىك جاعدايىن جاقسارتۋعا جانە بىلىكتى مامانداردى تارتۋعا باعىتتالعان.