قازاقستاندىق بولاتتىڭ يكەمدىلىك قاسيەتتەرى جوعارى.
قازاق قۇرىلىس جانە ساۋلەت عىلىمي-زەرتتەۋ جانە جوبالاۋ ينستيتۋتىنىڭ عالىمدارى توت باسپايتىن بولات مەتالىنىڭ كەزەكتى زەرتتەۋ جۇمىستارىن ءساتتى اياقتادى.
يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، ينستيتۋتتىڭ ماماندارى برينەلل ءادىسى ارقىلى ەلىمىزدە قۇرىلىستا قولدانىلاتىن كونسترۋكسيالىق بولاتتىڭ بەرىكتىگىن انىقتاعان، دەپ حابارلايدى Almaty-akshamy.kz.
زەرتتەۋدىڭ ناتيجەسىندە قازاقستاندا وندىرىلەتىن بولات شيكىزاتىنىڭ يكەمدىلىك قاسيەتتەرى بايقالىپ، ونىڭ حيميالىق قۇرامى ەۋروكود 1993 تالاپتارىنا سايكەس بولىپ شىقتى.
عىلىمي-زەرتتەۋ بارىسىندا قالىڭدىعى 8-20 مم بولاتىن 7 ءتۇرلى كونسترۋكسيالىق بولاتتىڭ سىناماسى الىنىپ، تارتىپ (ءبىر ءوستى) سىناۋدىڭ ءتۇرلى ادىستەرى، سونداي-اق برينەلل ءادىسى ارقىلى بەرىكتىگىن تەكسەرۋ مەن اسپاپتى باسۋ ءتاسىلى قولدانىلدى. بۇعان قوسا تەگىستەلگەن بولات ماتەريالىنا دا سالىستىرمالى تالداۋ جاسالدى.
اتالعان ولشەم ادىستەرى تاۋ جىنىستارىنىڭ، اليۋمينيي قورىتپالارىنىڭ ساپالىعىن انىقتاۋ ءۇشىن قولدانىلاتىنىن ايتا كەتەيىك. تۇتاستاي العاندا، برينەلل ءادىسى كوپتەگەن ماتەريالدىڭ بەرىكتىك قاسيەتتەرىن انىقتاۋدىڭ امبەباپ ءادىسى بولىپ سانالادى. جوعارىدا ايتىلعان زەرتتەۋ ناتيجەلەرى كورسەتكەندەي، قازاقستاندىق بولاتتىڭ يكەمدىلىك قاسيەتتەرى تولىق دالەلدەندى.
تۇيىندەي كەلگەندە، جۇرگىزىلگەن سىناق قورىتىندىسى وندىرىستە قولدانىلاتىن وتاندىق جانە رەسەيلىك بولاتتىڭ وڭ ناتيجەلەرىن كورسەتتى. الداعى ۋاقىتتا عالىمدار بۇل مەتالدىڭ بەرىكتىگىنە بايلانىستى باسقا دا ادىستەردى قولدانىپ، باعالاۋدى جوسپارلاپ وتىر. زەرتتەۋ ناتيجەلەرى كونسترۋكسيالاردى جوبالاۋدى رەتتەيتىن نورماتيۆتىك ەرەجەلەرگە ەنگىزىلەدى دەپ كوزدەلگەن.