اۋا رايىنىڭ قولايسىزدىعىنا بايلانىستى ءقازىر 4 وڭىردە ەسكەرتۋ جاريالاندى
اۋا رايىنىڭ قولايسىزدىعىنا بايلانىستى ەلىمىزدىڭ ءبىرقاتار وڭىرلەرىندە ەسكەرتۋ جاريالاندى، دەپ حابارلايدى Almaty-akshamy.kz Almaty.tv-گە سىلتەمە جاساپ.
سينوپتيكتەر ەل اۋماعىنىڭ باسىم بولىگىندە تۇندە ۇسىك ءجۇرۋى مۇمكىن دەپ بولجام ايتتى. قار مەن كوكتايعاق كەسىرىنەن وڭىر-وڭىردە جول-كولىك اپاتتارى جيىلەگەن. اۋە رەيستەرىنىڭ كەشىگۋىنە نە كەيىنگە شەگەرىلۋىنە بايلانىستى دا جولاۋشىلارعا ەسكەرتۋ جاسالىپ جاتىر.
اۋەرەيستەردىڭ كەشىگۋى، ءتىپتى باعىت كەستەسىنىڭ وزگەرۋى قىس كەزىندە ءجيى بولىپ جاتادى. «Air Astana» كومپانياسى بيىلعى جىلدىڭ 30-قازانىنان باستاپ، كەلەسى جىلدىڭ 25-ناۋرىزىنا دەيىن كۇزگى-قىسقى ناۆيگاسياعا كوشكەنىن حابارلاپ، ەسكەرتۋ جاسادى. وسى ارالىقتا جۇمىس جوسپار بويىنشا جۇرگىزىلمەي قالسا، اۋە كومپانيا جولاۋشىلاردىڭ قۇقىعىن ساقتاۋعا مىندەتتەلەدى.
«اۋە كومپانيا كەسىرىنەن كەشىگۋ نەمەسە ورىندالماعان جاعدايدا جولاۋشىلاردىڭ بارلىق قۇقىعىن ساقتاۋعا تىرىسادى. ياعني، ءاربىر ەكى ساعات سايىن سالقىنداتىلعان سۋسىن، ءار ءتورت ساعاتتان سوڭ ىستىق تاعام، كۇندىز 8-10 ساعات كەيىن جانە تۇندە 8 ساعات كەيىن قوناق ۇيگە ورنالاستىرىلادى»، – دەدى «Air astana» اۋە كومپانياسىنىڭ كورپوراتيۆتىك كوممۋنيكاسيالار جونىندەگى مەنەدجەرى تىلەك ءابدىراقىموۆ.
قار، جاڭبىر سالدارىنان كەشەلى بەرى ءساتسىز ساپاردىڭ جيىلەۋى بايقالعان. ءبىر عانا الماتى قالاسىندا سوڭعى تاۋلىكتە 160-تان استام جول اپاتى تىركەلگەن. 50-گە جۋىق ادام ءتۇرلى دەنە جاراقاتىن الدى، بىرەۋى اپات كەزىندە ءتىل تارتپاي كەتكەن. قار مەن كوكتايعاق سالدارىنان قاراعاندى وبلىسىندا دا كەشەلى بەرى 50 جول-كولىك وقيعاسى تىركەلدى. جولداعى قاۋىپسىزدىك ەلوردالىق ءتارتىپ ساقشىلارىن دا الاڭداتىپ وتىر.
«استانا قالاسى اۋماعىندا 2 كۇندە 200-دەن استام جول-كولىك وقيعاسى تىركەلدى. سالدارىنان 3 ادام ءتۇرلى دەنە جاراقاتىن العان. جولدا جۇرگىزۋشىلەر، جاياۋ جۇرگىنشىلەر جول ەرەجەسىن قاتاڭ ساقتاۋلارىڭىزدى سۇرايمىز»، – دەدى پد اكىمشىلىك پوليسيا باسقارماسىنىڭ ءبولىم باستىعى باۋىرجان توقجۇمانوۆ.
ال قازگيدرومەت ماماندارى الداعى 3 كۇندە ەلدە جەل كۇشەيىپ، تۇمان، كوكتايعاق بولاتىنىن ەسكەرتتى. سولتۇستىكتە، شىعىستا كوكتايعاق، ورتالىقتا قار جاۋىپ، جەل كۇشەيمەك.
«اتموسفەرالىق فرونتالدى قازاقستاننىڭ باسىم بولىگىندە اۋا رايىنىڭ تۇراقسىز سيپاتىن انىقتايدى. قار جاۋادى. تەك ەلىمىزدىڭ وڭتۇستىك جوعارى اتموسفەرالىق قىسىم اسەرىنەن جاۋىن جاۋمايدى. قازاقستان بويىنشا تۇمان، كوكتايعاق، سولتۇستىكتىڭ ءوڭىردىڭ جارتىسىندا بۇرقاسىن بولادى. رەسپۋبليكا بويىنشا تەمپەراتۋرالىق وزگەرىستەر كۇتىلەدى»، – دەدى ينجەنەر - سينوپتيك اقمارال سماعۇلوۆا.
اۋا رايىنىڭ قولايسىزدىعىنا بايلانىستى ءقازىر 4 وڭىردە ەسكەرتۋ جاريالاندى. بولجامعا ساي تۇركىستان، سولتۇستىك قازاقستان، باتىس قازاقستان، قىزىلوردا وبلىسىندا تۇمان ءتۇسىپ، بوران سوعادى. ەل اۋماعىنىڭ باسىم بولىگىندە تۇندە ۇسىك ءجۇرۋى مۇمكىن.