زاڭ جوباسى ءماجىلىس دەپۋتاتتارىنا تانىستىرىلدى
قازاقستاندا القابيلەر سوتىنىڭ وكىلەتى كەڭەيەدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
ياعني ازاپتاۋ، رەيدەرلىك، زاڭسىز اڭ اۋلاۋ سىندى باپتار بويىنشا سوتتالعاندار ەندى القابيلەر سوتىنا جۇگىنە الادى. بۇگىن وسىنداي زاڭ جوباسى ءماجىلىس دەپۋتاتتارىنا تانىستىرىلدى. ال ءىسى اسا قۇپيا تەرگەلىپ جاتقان كارىم ءماسىموۆتىڭ سوتىنا القابيلەر قاتىسپايدى.
بۇگىنگى ءماجىلىس وتىرىسى «ارسەلورميتتال تەمىرتاۋدا» قازا تاپقانداردى ءبىر مينۋتتىق ۇنسىزدىكپەن ەسكە الۋمەن باستالدى. ارتىنشا جوعارعى سوتتىڭ قىلمىستىق ىستەر جونىندەگى سوت القاسىنىڭ ءتوراعاسى ءابدىراشيت جۇكەنوۆ القابيلەردىڭ وكىلەتتىگىن كەڭەيتەتىن زاڭدى تانىستىردى. زاڭ جوباسىندا كەلەسى جىلدان باستاپ القابيلەر سوتىنا تاعى 13 اۋىر جانە ونشا اۋىر ەمەس قىلمىس قۇرامىن بەرۋ ۇسىنىلىپ وتىر. ولاردىڭ اراسىندا رەيدەرلىك، ازاپتاۋ، زاڭسىز اڭ اۋلاۋ، كولىكتى ماس كۇيدە باسقارىپ، ادام ولىمىنە اكەپ سوعۋ سىندى ىستەر بار. جوعارعى سوت وكىلىنىڭ ايتۋىنشا، زاڭ جوباسىن قابىلداۋ سوتتاردىڭ قىزمەتىن جەتىلدىرۋگە، ولارعا دەگەن سەنىم دەڭگەيىن ارتتىرۋعا سەپتەسەدى.
«جالپى العاندا القابيلەر سوتىنىڭ سوتتىعىنا 44 زاڭ جاتاتىن بولادى. قۇرمەتتى دەپۋتاتتار، القابيلەر سوتىنىڭ سوتتىلىعى سوت جۇيەسىن دەموكراتيزاسيالاۋعا ىقپال ەتەتىن جانە قوعام تاراپىنان سوتقا دەگەن سەنىمدى ەداۋىر ارتتىراتىن بولادى»، – دەدى جوعارعى سوتتىڭ قىلمىستىق ىستەر جونىندەگى سوت القاسىنىڭ ءتوراعاسى ءابدىراشيت جۇكەنوۆ.
وسىلايشا ءابدىراشيت جۇكەنوۆ دەپۋتاتتاردان زاڭ جوباسىن قولداۋدى سۇرادى. بايانداماسى اياقتالا سالىسىمەن زالدا وتىرعاندار سۇراعىن جاۋدىرا باستادى. ەدىل جاڭبىرشين «وڭىر-وڭىردەن ادىلدىك ىزدەپ كەلگەن اعايىن سوتتارمەن جولىعا الماي كەتەدى» دەپ سىن ايتتى. ءتىپتى، شىدامى تاۋسىلعان كەيبىر ازاماتتاردىڭ وزدەرىن ورتەپ جىبەرگەن وقيعانى ەسكە الىپ، سوتتىڭ اشىقتىعىن تالاپ ەتتى.
«سوت جۇيەسى، مەكەمەسى ءبىر جابىق مەكەمەگە اينالىپ كەتكەن. ال پرەزيدەنت ايتىپ جاتىر، ۇكىمەت، اشىق بولۋى كەرەك. بارلىق بيلىك حالىقپەن جۇمىس جاساۋى كەرەك. ەستۋ كەرەك دەيدى. ال سىزدەردەن ءبىز ونى كورىپ وتىرعان جوقپىز. سوندىقتان ءبىز نە جەرگىلىكتى جەردە ءبارىن رەتتەۋىمىز كەرەك، نە سىزدەر وسى جەردە كەلگەن حالىقپەن دۇرىستاپ كەزدەسۋلەرىڭىز كەرەك، اپپاراتتىڭ قىزمەتكەرلەرى ەمەس»، – دەدى ق ر پارلامەنتى ءماجىلىسىنىڭ دەپۋتاتى ەدىل جاڭبىرشين.
دەپۋتاتتىڭ سۇراعى توسىننان بولدى ما، ايتەۋىر جوعارعى سوت وكىلى بۇل ساۋالعا قىسقا عانا «تەك زاڭ اياسىندا ىستەردى قارايمىز» دەپ جاۋاپ بەردى. الايدا، قاتىپ قالعان قاعيدا جوق دەگەن ەدىل جاڭبىرشين مۇڭىن ايتىپ كەلگەن حالىقپەن سوتتار دا كەزدەسۋدىڭ جولىن قاراستىرۋ كەرەگىن باسا ايتتى.