قازاق ساربازدارى "رۋبەج-2022" بىرلەسكەن وقۋ-جاتتىعۋىنا قاتىسىپ جاتىر
ورتالىق ازيا ءوڭىرىنىڭ ۇجىمدىق جەدەل ورىستەتۋ كۇشتەرىنىڭ "رۋبەج-2022" بىرلەسكەن وقۋ-جاتتىعۋىنا قاتىسۋشىلار 1995 جىلى تاجىكستاندا قازا تاپقان قازاقستاندىق اسكەري قىزمەتشىلەردىڭ ەسكەرتكىشىنە گۇل شوقتارىن قويدى، دەپ حابارلايدى Almaty-akshamy.kz.
دۋشانبە قالاسىنىڭ "دوستىق" ساياباعىندا وتكەن راسىمگە تاجىكستان رەسپۋبليكاسىنداعى اسكەري اتتاشە گەنەرال-مايور اسقار مۇستابەكوۆ، "استانا" وڭىرلىك قولباسشىلىعى اسكەرلەرى قولباسشىسىنىڭ ءبىرىنشى ورىنباسارى پولكوۆنيك باعلان وسەربايەۆ جانە قازاقستاندىق دەسانتشىلار قاتىستى. ولار قازا تاپقان اسكەري قىزمەتشىلەردى ءبىر مينۋت ۇنسىزدىكپەن ەسكە الىپ، بوزداقتاردىڭ رۋحىنا تاعزىم ەتتى.
– ءبىز تمد-نىڭ وڭتۇستىك شەكاراسىن قورعاۋدا ولىمگە قاسقايىپ قارسى تۇرا بىلگەن جەرلەستەرىمىزگە باسىمىزدى يەمىز، - دەدى وقۋ-جاتتىعۋعا قاتىسۋشى مايور سامات قاپانوۆ.
1995 جىلى ساۋىردە پشيحاۆر شاتقالىنداعى تاجىك-اۋعان شەكاراسىندا قازاقستاننىڭ بىتىمگەرلىك روتاسى سودىرلاردىڭ تۇتقيىلدان جاساعان شابۋىلىنا تاپ بولدى. ەكى جاقتىڭ كۇشى تەڭ ەمەس ەدى. ءبىزدىڭ جاۋىنگەرلەر اسكەري انتقا ادالدىق تانىتىپ، جان اياماي ارپالىستى. سول ۇرىستا 17 اسكەري قىزمەتشىمىز قازا تاپتى. ولاردىڭ ەسىمى حالىقتىڭ جادىندا ماڭگى ساقتالادى.
بۇل كۇندەرى "حاربمايدون" پوليگونىندا ورتالىق ازيا ءوڭىرىنىڭ جەدەل ورىستەتۋ ۇجىمدىق كۇشتەرىنىڭ "رۋبەج-2022" بىرلەسكەن وقۋ-جاتتىعۋلارى ءوتىپ جاتقانىن ەستەرىڭىزگە سالامىز. وعان قازاقستان قارۋلى كۇشتەرى دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى قاتىسادى.