ناۋقاستارعا وپەراسيا مىندەتتى الەۋمەتتىك-مەديسينالىق ساقتاندىرۋ ارقىلى تەگىن جاسالدى
جۇرەك قان-تامىر اۋرۋلارى بار ناۋقاستارعا ەرەكشە ستەنت قويىلدى. ونىڭ وزگەلەردەن ەرەكشەلىگى قۇرىلعى دارىمەن قاپتالعان. مۇنداي وپەراسيانى الماتىداعى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ دارىگەرلەرى اۆستريالىق ينتەرۆەنسيالىق كارديولوگ اۋرەل تومانىڭ جەتەكشىلىگىمەن جاساپ جاتىر. بۇگىن وڭىرلەردەن كەلگەن مەديسينا قىزمەتكەرلەرى بىلىكتى ماماننىڭ شەبەرلىك ساباعىنا قاتىسىپ، كەڭەس الدى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
الماتىلىق ىرىمعالي يماشيەۆقا كەشە عانا وپەراسيا جاسالدى. جۇرەكتىڭ ەڭ كۇردەلى سانالاتىن بولىگىنە ستەنت قويىلدى. بۇل قان-تامىرىنىڭ وتكىزگىشتىگىن قامتاماسىز ەتەتىن دارىمەن قاپتالعان. ناۋقاستىڭ يشەميالىق جۇرەك اۋرۋىنا شالدىققانىنا 10 جىلعا جۋىقتاعان. سوڭعى ەكى جىلدا جاعدايى تىپتەن قيىنداي تۇسكەن. وپەراسيانىڭ اشىق تۇرىنە كەلىسپەگەن. ال، جەرگىلىكتى ماماندار مەن اۆستريادان كەلگەن ينتەرۆەنسيالىق كارديولوگ اۋرەل توما ەندوۆاسكۋليارلىق ادىسپەن جاسادى.
«وپەراسيا ءبارى جاقسى ءوتتى. ەشقانداي جەرىم اۋىرعان جوق. باسىم دا اۋىرعان جوق. ءبارىن سەزىپ جاتتىم. گدە تو 4 ساعات جاسادى. 2-3 كۇننەن كەيىن سەزىنەتىن شىعارمىن. ءبارى جاقسى بولادى دەپ ويلايمىن»،-دەيدى قالا تۇرعىنى ىرىمعالي يماشيەۆ.
راسىندا مۇنداي وپەراسيا كۇردەلى سانالادى. ۇزاقتىعى 5-6 ساعاتقا دەيىن سوزىلۋى ءمۇمىن. ءبىراق ارتىقشىلىعى وتە كوپ. ناۋقاس تەز قالپىنا كەلەدى. اۋرۋحانادان 4-5 كۇندە ۇيىنە شىعىپ كەتەدى. ياعني، جۇرەك قان تامىرىنا قاتىستى كۇردەلى پاتالوگيانى ەمدەيدى. اۋرەل تومانىڭ ايتۋىنشا بۇل وپەراسيا كەز-كەلگەن جەردە جاسالا بەرمەيدى.
«مۇنداي وپەراسيانى جاساۋ ءۇشىن مامانداردىڭ كاسىبي بىلىكتىلىگى جوعارى بولۋى ءتيىس. مۇنىڭ ادىس-تاسىلدەرىن جاقسىلاپ مەڭگەرۋ ءۇشىن الەم بويىنشا كەم دەگەندە 3-4، ءتىپتى 5 جىل كەرەك شىعار دەپ ويلايمىن. ستەنت كورونارلىق ارتەريانىڭ قالىپتى جۇمىس ىستەۋىنە مۇمكىندىك بەرەدى. بىرنەشە وپەراسيا جاسادىق بارلىعى دا ءساتتى ءوتتى»، -دەدى اۆستريادان كەلگەن ينتەرۆەنسيالىق كارديولوگ اۋرەل توما.
ناۋقاستارعا وپەراسيا مىندەتتى الەۋمەتتىك-مەديسينالىق ساقتاندىرۋ ارقىلى تەگىن جاسالدى. اقىلى بولعان جاعدايدا ونىڭ قۇنى ءبىر جارىم ميلليون تەڭگەگە جۋىقتايدى، دەيدى ماماندار.
«دارىگەرلەر وتە جاقسى تاجىريبە الماسىپ جاتىر. كوزبە-كوز تىلدەسىپ، بىرگە جۇمىس ىستەگەننىڭ بەرەرى كوپ. ونىڭ ۇستىنە ءقازىر مەديسينا وتە تەز دامۋ ۇستىندە. اۋرەل توما كورونارلىق ارتەريانى ستەنتتەۋ بويىنشا بىرنەشە كورنەكى وپەراسيا جۇرگىزىپ كورسەتىپ بەردى»، - دەدى مەديسينا عىلىمدارىنىڭ دوكتورى روزا قۋانىشبەكوۆا.
وكىنىشكە وراي، ەلىمىزدە سوزىلمالى جۇقپالى ەمەس اۋرۋلاردىڭ 40 پروسەنتى جۇرەك پەن قان تامىرلارىنىڭ جۇمىسىمەن بايلانىستى. دەسە دە سالا جەدەل دامىپ جاتىر. ەندى ءدال وسىنداي ءادىستى الماتىدان وزگە استانا، سەمەي، تاراز قالالارىنىڭ كارديولوگتارى دا مەڭگەرىپ قايتادى.