اتالمىش كونكۋرسقا بەلارۋس، يران، قازاقستان جانە رەسەي كوماندالارى قاتىسادى.
وتاندىق اسكەريلەر ارميالىق حالىقارالىق ويىندارعا قاتىسۋ ماقساتىندا دايىندىق جۇمىستارىن جۇرگىزىپ جاتىر، دەپ حابارلايدى Almaty-akshamy.kz.
«گۆاردەيسكيي گارنيزونىنىڭ «ءماتىبۇلاق» پوليگونىندا ۇشقىشسىز ۇشاتىن اپپاراتتار ەسەپتوپتارى ارميالىق حالىقارالىق ويىندار شەڭبەرىندە وتكىزىلەتىن «سۇڭقار اڭشىلىعى» كونكۋرسىنا دايىندالۋدا»،– دەلىنگەن قورعانىس مينيسترلىگىنىڭ باسپا ءسوز قىزمەتىنىڭ حابارلاماسىندا.
مامانداردىڭ ايتۋىنشا، وتكەن جىلدارداعى ارميالىق ويىندارداعىداي ءبىزدىڭ كوماندا بۇل جولى دا «Skylark-1LEX» ۇشقىشسىز ۇشاتىن اپپاراتتارىن پايدالاناتىن بولادى.
بيىلعى جىلى قازاقستان كومانداسىنىڭ قۇرامى تولىق جاڭارتىلدى. ۇشقىشسىز ۇشاتىن قۇرىلعىلارعا قىزمەت كورسەتۋ جانە ولاردى باسقارۋ كۋرسىنان وتكەن جاس ماماندار – ۇۇا كەشەندەرىنىڭ وپەراتورلارى ىرىكتەلىپ الىندى.
«مەن ارميالىق حالىقارالىق ويىندارعا العاش رەت قاتىسقالى وتىرمىن. ءبىزدىڭ دايارلىعىمىز سياقتى كوماندالىق رۋحىمىز دا جوعارى دەڭگەيدە. العا قويعان ماقساتىمىز – ۇزدىك ناتيجە كورسەتۋ»، – دەپ ءوز ويىمەن ءبولىستى قاتىسۋشىلاردىڭ ءبىرى موتواتقىشتار باتالونى ەكيپاجىنىڭ كومانديرى لەيتەنانت ارتۋر يماشيەۆ.
«سۇڭقار اڭشىلىعى» كونكۋرسى ءۇش كەزەڭنەن تۇرادى. قاتىسۋشىلار ۇۇا كەشەندەرىن ۇشۋعا دايىنداۋ، اۋەدەن بارلاۋ جۇرگىزۋ نورماتيۆتەرىن ورىندايدى. تۇنگى ۋاقىتتا ارتيللەريادان وق اتۋدى تۇزەتۋدە ءوز شەبەرلىكتەرىن كورسەتەدى. سونىمەن بىرگە، باعدارلاماعا وق اتۋ جانە دەنە شىنىقتىرۋ دايىندىعى بويىنشا جارىستار ەنگىزىلگەن.
ارميالىق حالىقارالىق ويىندارعا قاتىسۋ اسكەري قىزمەتشىلەردىڭ جاۋىنگەرلىك دايارلىعىنىڭ ماڭىزدى قۇرامداس بولىگى بولىپ تابىلادى جانە ولاردىڭ كاسىبي شەبەرلىگىن ارتتىرۋعا ىقپال ەتىپ، جاۋىنگەرلىك وقۋ-جاتتىعۋدا جوعارى ناتيجەلەرگە قول جەتكىزۋگە ىنتالاندىرادى.
