بۇل شارۋالار جوسپارعا سايكەس اتقارىلۋدا.
بيىل الماتىدا ۇزىندىعى 9 شاقىرىم بولاتىن جىلۋ قۇبىرلارى جاڭارتىلىپ جاتىر. ماماندار قىركۇيەك ايىندا پايدالانۋعا بەرىلەدى دەپ وتىر، دەپ حابارلايدى Almaty-akshamy.kz Almaty.tv سايتىنا سىلتەمە جاساپ.
بيىل جىلۋ جەلىلەرىن اۋىستىرۋ بارىسىندا بوستاندىق، مەدەۋ، اۋەزوۆ پەن المالى اۋداندارىنا باسىمدىق بەرىلدى. قالا بويىنشا ءقازىر 11 كوشەدە جۇمىس قىزۋ ءجۇرىپ جاتىر. ول جۇمىستاردى كۇزگە دەيىن اياقتاۋدى 8 مەردىگەر كومپانيا مىندەتىنە العان.
«جوندەۋ جۇمىستارى كەزىندە تۇرعىندار ىستىق سۋسىز قالماس ءۇشىن مەردىگەر كومپانيالاردىڭ كۇشىمەن تۇرعىندارعا، اۋرۋحانالار بار، مەكتەپتەر بار، ەگەر جولدىڭ بويىندا ورنالاسسا، ولاردىڭ بارىنە ۋاقىتشا ىستىق سۋ قوسىلىپ بەرىلىپ وتىردى»، – دەدى كۇردەلى قۇرىلىس جانە جوندەۋ باسقارماسىنىڭ باستىعى سايات دجينگيلبايەۆ.
بۇگىندە قالاداعى 1 ملن. 260 مىڭ ءۇي ورتالىقتاندىرىلعان جىلۋ جۇيەسىنە قوسىلعان. 634 مىڭعا جۋىعى جەكە قازاندىقتىڭ كومەگىمەن ۇيلەرىن جىلىتادى. ال، 1900 وتباسى ءالى پەش پايدالانادى.
«وتكەن جىلى 16،1 شاقىرىم جىلۋمەن قامتۋ جۇيەلەرى جاڭارتىلدى. بۇل جۇمىس ناتيجەسىندە جىلۋ قۇبىرلارى 1،2 پايىزعا تومەندەدى. قازىرگى تاڭدا بۇل باعىتتا 2023 جىلعا دەيىن اتقارىلۋى ءتيىس جۇمىستاردىڭ جوسپارى جاسالعان. وسى ۋاقىتقا دەيىن 14،6 شاقىرىم بولاتىن قۇبىرلاردى جاڭارتۋدى كوزدەپ وتىرمىز»، – دەدى الماتى قالاسىنىڭ اكىمى باقىتجان ساعىنتايەۆ.
الداعى جىلى قازاندىق قوندىرعىلارىن ىسكە قوسۋ مىندەتتەلىپ وتىر. ءقازىر قالادا 4 بىردەي الىپ قازاندىققا كۇردەلى جوندەۋ جۇمىستارى جۇرگىزىلىپ جاتىر. ماسەلەن، "الماگۇل" ىقشاماۋدانىنداعى وڭتۇستىك قازاندىق بيىل جىل سوڭىنا دەيىن اياقتالماق. پايدالانۋعا بەرىلسە، 55 گكال/ساع ۇزدىكسىز جىلۋمەن قامتيتىن بىرەگەي قوندىرعى بولماق.