قازاقستاندىق ارتىستەر ساحنا مادەنيەتىن ساقتاماعانى ءۇشىن ايىپپۇل تولەۋى مۇمكىن

ساحنا مادەنيەتى تۋرالى ماسەلە زەرتتەلىپ جاتىر.

قازاقستاندىق ارتىستەردىڭ ساحنا مادەنيەتى تۋرالى ماسەلە قارالۋدا. بۇل تۋرالى ق ر مادەنيەت جانە سپورت ۆيسە-مينيسترى كۇمىس سەيىتوۆا مالىمدەدى، دەپ حابارلايدى Almaty-akshamy.kz. 

«2020 جىلى مادەنيەت تۋرالى زاڭناماعا تۇزەتۋلەر ەنگىزىلدى. ولارعا سايكەس، كونسەرتتەر مەن باسقا دا مادەني ءىس-شارالارعا قاتىستى نورمالار كوزدەلگەن. ياعني، ءارتىس ءوزىن كورەرمەندەردىڭ الدىندا دۇرىس ۇستاۋى كەرەك. سونىمەن قاتار، فونوگرامماعا قويىلاتىن تالاپتار دا بار. ەگەر ءانشى فونوگراممامەن ونەر كورسەتسە، ول بۇل تۋرالى ەسكەرتۋى كەرەك. ءبىراق قولدانىستاعى اكىمشىلىك قۇقىقبۇزۋشىلىق تۋرالى كودەكستە ەشقانداي جازا نەمەسە ايىپپۇل قاراستىرىلماعان»، - دەدى كۇمىس سەيىتوۆا.

مينيستر ورىنباسارىنىڭ ايتۋىنشا، زاڭناماعا تۇزەتۋلەر ەنگىزۋ - ۇلكەن پروسەسس. ءقازىر ارتىستەردىڭ ساحنا مادەنيەتى تۋرالى ماسەلە زەرتتەلىپ جاتىر. اتاپ ايتقاندا، زاڭدى جانە جەكە تۇلعالارعا قاتىستى 150-دەن 2000 اەك-كە دەيىن ايىپپۇل سالۋ كوزدەلەدى.

ايتا كەتەيىك، بۇل شارالار ءالى كۇشىنە ەنگەن جوق، تەك قاراستىرىلىپ جاتىر.

كۇمىس سەيىتوۆا بۇل ماسەلە ارتىستەرمەن جانە كونسەرت ۇيىمداستىرۋشىلارىمەن تالقىلاناتىنىن جانە وسى تۇزەتۋلەر جاقىن ارادا كۇشىنە ەنۋى مۇمكىن ەكەنىن تىلگە تيەك ەتتى.