ەندى ادامنىڭ سىبايلاس جەمقورلىق قىلمىس جاساعانى جايىندا مالىمەت الۋعا بولادى.
ادامنىڭ سىبايلاس جەمقورلىق قىلمىس جاساعانى جايىندا مالىمەتتەردى بەرۋ مەملەكەتتىك قىزمەتتەر كورسەتۋ ساناتىنا اۋىستىرىلدى. بۇل تۋرالى باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى مالىمدەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قولدانىستاعى ەڭبەك زاڭناماسىندا سىبايلاس جەمقورلىق قىلمىس جاساعان ادامدار ءۇشىن بەلگىلى ءبىر شەكتەۋلەر قاراستىرىلعان. كۆازيمەملەكەتتىك سەكتور ۇيىمىنا جۇمىسقا تۇرۋ كەزىندە سىبايلاس جەمقورلىق قىلمىس جاساعانى تۋرالى مالىمەتتەردىڭ بار نەمەسە جوق ەكەنى تۋرالى انىقتاما ۇسىنۋعا مىندەتتى. ءقازىر كۆازيمەملەكەتتىك ۇيىمدارعا جۇمىسقا ورنالاستىرۋ كەزىندەگى ءتيىستى شەكتەۋ بارلىق لاۋازىمدارعا قولدانىلادى. بۇرىن بۇل شەكتەۋلەر باسقارۋشىلىق فۋنكسيالاردى ورىنداۋعا قاتىستى لاۋازىمدارعا ارنالعان بولاتىن»، - دەلىنگەن باس پروكۋراتۋرا مالىمەتىندە.
اتاپ ايتقاندا، باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى ادامنىڭ سىبايلاس جەمقورلىق قىلمىس جاساعانى جايىندا مالىمەتتەردى بەرۋدى مەملەكەتتىك قىزمەتتەر كورسەتۋ ساناتىنا اۋىستىردى.
«مەملەكەتتىك كورسەتىلەتىن قىزمەتتىڭ قابىلدانۋى جانە ۇسىنىلۋى www.egov.kz «ەلەكتروندىق ۇكىمەت» ۆەب-پورتالى ارقىلى جۇزەگە اسىرىلادى. قىزمەتتىڭ ورىندالۋ مەرزىمى 10 مينۋت، قوسىمشا دەرەكتەردى انىقتاۋ ءۇشىن تەكسەرىس كەزىندە 5 جۇمىس كۇنى قامتىلادى»، - دەدى مەملەكەتتىك ۇيىم.