بىرلەسكەن جوبا ازىرلەندى
ق ر پرەمەر-مينيسترى ءاليحان سمايىلوۆ دۇنيەجۇزىلىك بانكتىڭ ورتالىق ازيا بويىنشا وڭىرلىك ديرەكتورى تاتيانا پروسكۋرياكوۆامەن كەزدەسۋ وتكىزدى، دەپ حابارلايدى Almaty-akshamy.kz ۇكىمەتتىڭ رەسمي سايتىنا سىلتەمە جاساپ.
تاراپتار دۇنيەجۇزىلىك بانك تاراپىنان قازاقستانداعى دامۋ رەفورمالارىن قولداۋ شارالارىن تالقىلادى. وسى جۇمىس اياسىندا ناقتى قادامداردىڭ ءتىزىمىن قامتيتىن بىرلەسكەن جوبا ازىرلەندى.
جوبانى ىسكە اسىرۋ تەلەكوممۋنيكاسيا سەكتورىندا نارىقتىق باسەكەلەستىكتى كۇشەيتۋدى، سيفرلىق تەحنولوگيالار سەكتورىنىڭ تۇتاستىعىن ارتتىرۋدى جانە سيفرلىق ەكونوميكانى دامىتۋدى قولداۋدى كوزدەيدى.
بۇدان باسقا، مەملەكەتتىك ساتىپ الۋلارداعى باسەكەلەستىكتى جانە اشىقتىقتى جەتىلدىرۋ، بانك سەكتورىنىڭ جۇمىسىن جاقسارتۋ، سىبايلاس جەمقورلىققا قارسى كۇرەس جونىندەگى شارالاردى كۇشەيتۋ، اگلومەراسيالاردى دامىتۋ، سونداي-اق ەكولوگيالىق جانە ءتيىمدى ەنەرگيانى ءوندىرۋ بويىنشا شارالار قاراستىرىلعان.
«قازىرگى جاعدايدا بۇل جوبا قازاقستان ءۇشىن وتە ماڭىزدى. ول داعدارىسقا قارسى قابىلدانىپ جاتقان شارالارعا جانە ەلىمىزدىڭ جاڭا ەكونوميكالىق باعىتىن ىسكە اسىرۋعا قولداۋ كورسەتۋدى قامتاماسىز ەتەدى»، — دەدى ءاليحان سمايىلوۆ.
ءوز كەزەگىندە تاتيانا پروسكۋرياكوۆا دۇنيەجۇزىلىك بانك قازاقستاندى سەنىمدى سەرىكتەس رەتىندە قابىلدايتىنىن، سوندىقتان ءوزارا ءتيىمدى ىنتىماقتاستىقتى جالعاستىرۋعا دايىن ەكەنىن اتاپ ءوتتى.
«ءبىز قازاقستان ۇكىمەتىنىڭ العا قويعان ماقساتتارعا قول جەتكىزۋىنە مۇددەلىمىز. مەنىڭ ويىمشا، كوپتەگەن باعىتتار بويىنشا ۇلكەن پەرسپەكتيۆالار بار»، — دەدى تاتيانا پروسكۋرياكوۆا.
كەزدەسۋدى قورىتىندىلاي كەلە، ۇكىمەت باسشىسى ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن بىرلەسىپ، رەفورمالار ماتريساسىن كەلىسۋدى جانداندىرۋدى تاپسىردى.