الەۋمەتتىك جەلىدە قازاقستاندىقتار ازىق-تۇلىك باعاسىنىڭ قىمباتتاۋىنا شاعىمدانىپ جاتىر. جەلىدە جۇرت ققس سالىعىنىڭ 16 پايىزعا ءوسۋىن قۇپتامايتىنىن، سالىق وسسە، باعا ودان سايىن شارىقتايتىنىن تالقىعا سالىپ جاتىر. اqshamnews.kz ءتىلشىسى 15 جىل بۇرىنعى باعالاردى سالىستىرىپ، قىمباتشىلىق ماسەلەسىن سارالاپ كوردى.
2015 vs 2025: باعا قانشا ەسە ءوستى؟
2009–2010 جىلدارداعى ساۋدا جەلىلەرىنىڭ اكسيا پاراقشالارىنا كوز جۇگىرتسەك، سول كەزدە قاراپايىم وتباسى ءۇشىن بازاردان كوكونىس، جەمىس-جيدەك پەن ەت الۋ الدەقايدا جەڭىل بولعانى كورىنىپ تۇر. مىسالى:
-
كارتوپ - 65 تگ/كگ، ءقازىر - 285 تگ/كگ (ءوسىم شامامەن 4،4 ەسە).
-
پياز - 49 تگ/كگ، ءقازىر - 129 تگ/كگ (2،6 ەسە).
-
قىزاناق - 199 تگ/كگ، ءقازىر — 849 تگ/كگ (4،2 ەسە).
ال ەت باعاسى بولەك ماسەلە. تامىز ايىنان باستاپ ەلدە سيىر ەتىنىڭ باعاسى شارىقتاپ كەتتى. 15 جىل بۇرىن 1000 تەڭگەگە 1 كەلى ەت العان بولساق، ءقازىر شامامەن 6 ەسە قىمباتتاپ كەتتى.
-
سيىر ەتى - 999 تگ/كگ، ءقازىر - 5475 تگ/كگ (5،5 ەسە).
-
فارش - 985 تگ/كگ، ءقازىر - 4895 تگ/كگ (5 ەسە).
-
قازى - 1699 تگ/كگ، ءقازىر - 6049 تگ/كگ (3،5 ەسە).
سارى ماي، ۇن، كۇرىش، قايماق سىندى كۇندەلىكتى ازىقتاردىڭ دا باعاسى بىرنەشە ەسە قىمباتتاعان.
-
سارى ماي - 129 تگ/200 گ (شامامەن 645 تگ/كگ)، ءقازىر - 1419 تگ/200 گ (شامامەن 7 ەسە).
-
كۇنباعىس مايى - 259 تگ/ل، ءقازىر - 1562 تگ/ل (6 ەسە).
-
كۇرىش - 99 تگ/كگ، ءقازىر - 629 تگ/كگ (6 ەسە).
جالپى العاندا بۇرىن 5000 تەڭگەگە ءبىر ايعا جەتەرلىكتەي كارتوپ، ءسابىز، پياز، ۇن، ماي، ەتتىڭ ازداعان مولشەرىن الۋعا بولسا، ءقازىر بۇل اقشا تەك ءبىر كەلىگە جەتەر-جەتپەس ەتكە عانا جەتەدى ەكەن.
ەت باعاسى ەلدى ەلەڭ ەتكىزىپ وتىر
الەۋمەتتىك جەلىلەردە، اسىرەسە Threads-تا قازاقستاندىقتار ەت باعاسىنا شاعىمدارىن جاۋدىرىپ جاتىر. كەيبىرى ازىلدەپ، "ءقازىر سيىر ەتىن الۋ ءۇشىن دوستارمەن بىرگە اقشا جيناۋ كەرەك" دەپ جازادى. باسقالارى ماسەلەنى بايىپپەن كوتەرىپ، ەتتىڭ بىرتىندەپ قولجەتىمسىز بولىپ بارا جاتقانىنا الاڭدايدى. "بۇرىن اپتا سايىن ەت الىپ، سورپا جاسايتىن ەدىك، ءقازىر ايىنا ءبىر رەت قانا ەت كورەمىز" دەگەن پىكىرلەر ءجيى كەزدەسەدى.
جەلى قولدانۋشىلارىنىڭ ءبىرى: "سيىر ەتى - جاڭا iPhone سياقتى بولدى عوي. بىردەن ساتىپ الۋ قيىن، الۋ ءۇشىن الدىن الا اقشا جيناۋ كەرەك" دەپ قالجىڭداسا، باسقالارى وتباسىلىق داستارقاندا ەتتىڭ سيرەك كورىنەتىنىنە قىنجىلادى.
مينيسترلىك: "قىمباتشىلىق سەبەبى - ىشكى فاكتورلاردا"
باعاعا قاتىستى سىن كوبەيگەن سوڭ، ق ر اۋىل شارۋاشىلىعى مينيسترلىگى تۇسىنىكتەمە بەردى. ۆەدومستۆونىڭ مالىمەتىنشە، ەتتىڭ قىمباتتاۋىنا ەڭ الدىمەن ىشكى وندىرىستىك شىعىندار اسەر ەتىپ وتىر:
"سيىردى بورداقىلاۋ شامامەن ەكى جىل ۋاقىت الادى. وسى ارالىقتا جەم-شوپ باعاسى، جۇمىسشىلاردىڭ جالاقىسى، جانار-جاعارماي، تەحنيكاعا ارنالعان شىعىندار ءوستى. شارۋاشىلىقتاردا ءبىر كيلوگرامم ەتتىڭ وزىندىك قۇنى 2400–2500 تەڭگە بولسا، 15% ۇستەمە باعامەن كوتەرمە باعا 2800–2900 تەڭگە دەڭگەيىندە قالىپتاسادى. ارنايى بورداقىلاۋ الاڭدارىندا بۇل كورسەتكىش 3000–3100 تەڭگەگە دەيىن جەتەدى، كوتەرمە باعاسى - 3400–3500 تەڭگە"، - دەلىنگەن مينيسترلىكتىڭ جاۋابىندا.
سونداي-اق مينيسترلىك فەرمەرلەرگە جەڭىلدەتىلگەن نەسيە بەرۋ باعدارلاماسى ىسكە قوسىلعانىن ايتتى: ەندى بورداقىلاۋ الاڭدارى 5% جىلدىق مولشەرلەمەمەن 12 ايعا دەيىن نەسيە الا الادى. بۇل ىشكى نارىقتى ەتپەن قامتاماسىز ەتۋگە كومەكتەسۋگە ءتيىس.