الماتىدا فاندوماتتار ورناتىلىپ، مىڭداعان پلاستيك بوتەلكە جينالدى
الماتى قالاسى اكىمدىگىندە دارحان ساتىبالدىنىڭ توراعالىعىمەن «تازا قازاقستان» باعدارلاماسىن ىسكە اسىرۋ بويىنشا كەڭەس ءوتتى، - دەپ حابارلايدى Aqshamnews.kz.
قالا كۇنىنە وراي وتكەن سەنبىلىككە 6 مىڭ تۇرعىن جانە 178 تەحنيكا جۇمىلدىرىلىپ، 1،5 مىڭ تەكشە مەتر قوقىس شىعارىلدى.
قوقىستى بولەك جيناۋ جۇيەسى جولعا قويىلدى: اكىمدىك جانىنداعى جوبالىق كەڭسە اياسىندا قالاعا 65 فاندومات ورناتىلدى. ولاردىڭ كومەگىمەن 176 مىڭ پلاستيك بوتەلكە جانە 45 مىڭ اليۋمينيي بانكا جينالدى. جينالعان قاراجات «ارالدى قۇتقارۋ» قورىنا اۋدارىلدى. ال «مەيىرىمدى قاقپاقشا» اكسياسىنا 216 مەكتەپ پەن 194 بالاباقشا قاتىسىپ، بارلىعى 1،26 ميلليون قاقپاق تاپسىردى.
«جاسىل اۋلا» باعدارلاماسى جالعاسۋدا: كوكتەمدە تۇرعىندارعا 1،3 مىڭ كوشەت بەرىلدى، ءقازىر اۋلالارعا اعاش الۋعا ءوتىنىش قابىلداۋدىڭ جاڭا كەزەڭى باستالدى.
قالا اۋداندارىندا دا اۋقىمدى جۇمىس اتقارىلۋدا. اۋەزوۆ اۋدانىندا 971 اۋلاعا قىزمەت كورسەتىلىپ، 35 مىڭ اعاش سانيتارلىق ماقساتتا كەسىلدى، سونداي-اق 2025 جىلى 28 جاڭا تەحنيكا الىنعان. تۇركسىب اۋدانىندا 486 كوشە تازارتىلىپ، ءۇش اۋىسىمدى كەستە ەنگىزىلدى، 57 قوقىس ورنىنا كامەرا ورناتىلدى. 2025 جىلى سكۆەر، ويىن الاڭى جانە اۆتوسۋارۋ بويىنشا 32 جوبا جۇزەگە اسىرىلدى.
ەڭ باستىسى – اكسياعا قاتىسۋ عانا ەمەس، وتىرعىزىلعان كوشەتتەرگە كۇتىم جاساپ، وسىمدىكتىڭ ەرەكشەلىگىن ەسكەرۋ ەكەنىن قالا اكىمى ەرەكشە اتادى.
«ءىس-شارانى تەك وتكىزدىك دەپ قانا قويۋعا بولمايدى. ءار تۇرعىن العان كوشەتىنە دۇرىس قاراپ، قالانىڭ كوگالدانۋىنا ۇلەس قوسۋى قاجەت. كوگالداندىرۋ كەزىندە وسىمدىكتەردىڭ سىرتقى ۇيلەسىمىن عانا ەمەس، تابيعي ەرەكشەلىكتەرىن دە ەسكەرۋ ماڭىزدى. گازونعا سۋدىڭ از مولشەرى جەتكىلىكتى بولسا، بۇتالارعا كوبىرەك قاجەت. ەگەر وسىنى ەلەمەسەك، نە گازون، نە بۇتالار قۋراپ قالادى. سونىڭ سالدارىنان ارتىق شىعىن شىعىپ، قالانىڭ كورىنىسى دە بۇزىلادى»، – دەدى دارحان ساتىبالدى.
«تازا قازاقستان» باعدارلاماسى – ەكولوگيالىق مادەنيەتتى قالىپتاستىرۋعا، قالدىقتاردى قايتا وڭدەپ، دامىتۋعا جانە تۇرعىنداردى قالانى كورىكتەندىرۋ ىسىنە تارتۋعا باعىتتالعان.