قازاقستانداعى زەينەتكەرلەردىڭ زەينەتاقىسى وسەتىن بولدى

جاردەماقى الۋشىلارعا تولەنەتىن اقشا كولەمى وسەدى.

قازاقستان ۇكىمەتىنىڭ مۇشەلەرى الەۋمەتتىك قولداۋدىڭ قوسىمشا شارالارى تۋرالى ايتتى، دەپ حابارلايدى Almaty-akshamy.kz ەڭبەك مينيسترلىگىنىڭ باسپا ءسوز قىزمەتىنە سىلتەمە جاساپ.

ءساۋىر ايىنان باستاپ قازاقستانداعى زەينەتكەرلەر مەن جاردەماقى الۋشىلاردىڭ تولەمدەرى كوبەيەتىن بولادى. بۇل تۋرالى قازاقستاننىڭ ەڭبەك جانە حالىقتى الەۋمەتتىك قورعاۋ ۆيسە-مينيسترى رۋسلان ساكەيەۆ ورتالىق كوممۋنيكاسيالار قىزمەتىندە وتكەن بريفينگ بارىسىندا ايتقان.

«مەملەكەتتىڭ الەۋمەتتىك مىندەتتەمەلەرىن ورىنداۋ – قازاقستاننىڭ ىشكى ساياساتىنىڭ باستى باسىمدىعى. الەمدىك ەكونوميكاداعى جاڭا جاعدايلاردىڭ ەلدەگى الەۋمەتتىك-ەكونوميكالىق جاعدايعا تەرىس اسەرىن ازايتۋ ماقساتىندا بۇگىن ق ر پارلامەنتى سەناتىنىڭ وتىرىسىندا قارالىپ جاتقان بيۋدجەت جوباسىندا ازاماتتاردى الەۋمەتتىك قولداۋدى كۇشەيتۋ ءۇشىن قوسىمشا 185 ملرد تەڭگە ءبولىندى. بۇل قاراجات زەينەتاقىلار، جاردەماقىلار مەن الەۋمەتتىك تولەمدەردىڭ مولشەرىن قوسىمشا 4%-عا يندەكستەۋگە باعىتتالاتىن بولادى. بۇل جيىنتىعىندا 2021 جىلعى دەڭگەيمەن سالىستىرعاندا ىنتىماقتى زەينەتاقىلار مولشەرىنىڭ 11%-عا، ال بازالىق زەينەتاقىنىڭ جانە باسقا دا تولەمدەردىڭ 9%-عا ءوسۋىن قامتاماسىز ەتەدى. ناتيجەسىندە الەۋمەتتىك قامتاماسىز ەتۋگە جانە حالىقتى جۇمىسپەن قامتۋعا جاردەمدەسۋ شارالارىنا ارنالعان شىعىستاردىڭ جالپى كولەمى 4.4 ترلن تەڭگەدەن نەمەسە رەسپۋبليكالىق بيۋدجەت شىعىستارىنىڭ تورتتەن ءبىر بولىگىنەن (25%) اسادى»، – ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى رۋسلان ساكەيەۆ ورتالىق كوممۋنيكاسيالار قىزمەتىندە وتكەن بريفينگ بارىسىندا.

ۆيسە-مينيستر بۇگىنگى تاڭدا ەلىمىزدىڭ 4،2 ملن ازاماتى ءتۇرلى الەۋمەتتىك تولەمدەردى (زەينەتاقى، مەملەكەتتىك جاردەماقى، مەملەكەتتىك الەۋمەتتىك ساقتاندىرۋ قورىنان تولەنەتىن تولەمدەر) الۋشىلار بولىپ تابىلاتىنىن اتاپ ءوتتى، ونىڭ ىشىندە: 2،3 ملن – زەينەتكەرلەر، 1،2 ملن – بالا تاربيەلەپ وتىرعان وتباسىلار، 700 مىڭعا جۋىعى – مۇگەدەكتىگى بار ادامدار جانە ازاماتتاردىڭ باسقا دا ساناتتارى بار.

«زەينەتاقىلار مەن جاردەماقىلاردى جوعارى مولشەردە تولەۋ ءساۋىر مەن مامىر ايلارىنا قوسىمشا اقىنى ەسكەرە وتىرىپ، ماۋسىم ايىندا جۇزەگە اسىرىلاتىن بولادى»، – دەپ تۇيىندەدى ءوز ءسوزىن ۆيسە-مينيستر.