9 مامىر كۇنى مەرەكەلىك ءىس-شارالار كۇنى بويى اۋداندىق اكىمدىكتەردىڭ الاڭدارىندا، ساياباقتاردا، ءتىپتى، تۇرعىن ءۇي اۋلالارىندا وتەدى.
الماتىدا مەرەكەگە وراي 40-تان استام ءتۇرلى ءىس-شارالار وتەدى. جەڭىس كۇنىنىڭ 77 جىلدىعىن مەرەكەلەۋگە شاھاردا دايىندىق جۇمىستار قالاي جۇرگىزىلىپ جاتقانىن وڭىرلىك كوممۋنيكاسيالار قىزمەتى الاڭىندا وتكەن بريفينگ بارىسىندا الماتى قالالىق ارداگەرلەر كەڭەسىنىڭ ءتوراعاسى احان بيجانوۆ ايتتى، دەپ حابارلايدى Almaty-akshamy.kz.
سپيكەردىڭ ايتۋىنشا، بيىل الماتىدا جەڭىس كۇنى مەرەكەسى جوعارى دەڭگەيدە ۇيىمداستىرىلادى. ونىڭ ۇستىنە، سوڭعى ەكى جىل ىشىندە كەڭ اۋقىمدى ءىس-شارالار ۇيىمداستىرىلعان جوق. سوعىس ارداگەرلەرى مەن تىل ارداگەرلەرىنىڭ بارىنە جەرگىلىكتى بيلىك، سونداي-اق ارداگەرلەر تاراپىنان بارىنشا كوڭىل بولىنەدى.
احان بيجانوۆ الماتىنىڭ ارداگەرلىك قوزعالىسى وسكەلەڭ ۇرپاقتى تاربيەلەۋدە كوپ ءارى ماڭىزدى ءرول اتقارىپ وتىرعانىن اتاپ ءوتتى. سوندىقتان دا، جەڭىس كۇنىنە ورايلاستىرىلعان ءىس-شارالاردىڭ بارلىعى وتانسۇيگىشتىكتى تاربيەلەۋگە جانە اعا ۇرپاقتى قۇرمەتتەۋگە باعىتتالادى.
ارداگەرلەرگە كوڭىل ءبولىپ، قۇرمەت كورسەتۋ 9 مامىرعا دەيىن باستالىپ كەتتى. الماتى قالاسى اكىمدىگىنىڭ باستاماسىمەن جانە ءماسليحاتتىڭ قولداۋىمەن سوعىس ارداگەرلەرىنە ميلليون تەڭگەدەن ءبىرجولعى جاردەماقى تولەنۋدە. سونىمەن قاتار، ۇلى وتان سوعىسى ارداگەرلەرىنە جانە باسقا مەملەكەتتەردىڭ اۋماعىنداعى سوعىس قيمىلدارىنا قاتىسقان ارداگەرلەرگە تەڭەستىرىلگەن جەڭىلدىكتەرگە ءبىرجولعى الەۋمەتتىك كومەك كورسەتىلدى.
«ءقازىردىڭ وزىندە قالادا مەرەكەلىك اتموسفەرا سەزىلەدى، سوعىس قاھارماندارىنىڭ پورترەتتەرى بەينەلەنگەن 40 بيلبورد ورناتىلدى، قالانىڭ بارلىق ب ا ق تاقتالارىندا جانە مەترو ستانسيالارىندا 9 مامىر تاقىرىبىنا ارنالعان بەينەروليكتەر جاريالاندى. 20 مىڭ دانا «جەڭىس لەنتاسى» دايىندالىپ، قالا تۇرعىندارىنا تاراتىلاتىن بولادى»، - دەدى ارداگەرلەر قوزعالىسىنىڭ ءتوراعاسى.
لەنتالاردى ساۋدا جانە ويىن-ساۋىق ورتالىقتارىنان، 28 گۆاردياشى-پانفيلوۆشىلار ساياباعىنا، ورتالىق مادەنيەت جانە دەمالىس ساياباعىنا بارعان كەزدە الۋعا بولادى.
ايتا كەتۋ كەرەك، مەرەكەلىك بەزەندىرۋدەن بولەك، اۋدان اكىمدىكتەرى ارداگەرلەر مەن بارشا جەرگىلىكتى تۇرعىندارعا مەرەكەلىك كونسەرتتەر بەرەدى.
نەگىزگى باعدارلاما 9 مامىر كۇنى ساعات 9.30-دا باستالادى. بيىلعى جىلى «باتىرلارعا تاعزىم» اكسياسى ۇيىمداستىرىلىپ، ونىڭ اياسىندا قالا تۇرعىندارى گوركيي اتىنداعى ومجدس-نان گوگول كوشەسىنىڭ بويىنداعى 28 گۆاردياشى-پانفيلوۆشىلار ساياباعىنا دەيىن بارىپ، سوعىستا قازا تاپقان باتىرلاردى ەسكە الىپ، گۇل شوقتارىن قويادى.
گۇل شوقتارىن قويعاننان كەيىن قازاق ەسترادا جۇلدىزدارىنىڭ قاتىسۋىمەن كونسەرت وتەدى. شارا بارىسىندا سوعىس ارداگەرلەرى مەن تىل ەڭبەككەرلەرىنە دە مەرەكەلىك داستارحان ۇيىمداستىرىلادى.
مەرەكە وتەتىن جەردە اسكەري شاتىرلار مەن پالاتكالار ورنالاستىرىلىپ، زاماناۋي قازاقستاندىق اسكەري تەحنيكا مەن قارۋ-جاراق قويىلادى.
سونداي-اق احان بيجانوۆ بيىلعى جىلى قالا اكىمى، ونىڭ ورىنباسارلارى، اۋدان اكىمدەرى مەن ءماسليحات دەپۋتاتتارى ارداگەرلەردى ارالاپ، ارقايسىسىمەن جەكە كەزدەسۋلەر وتكىزەتىنىن ايتتى.
مەرەكەلىك شارالار كۇنى بويى اۋدان اكىمدىكتەرى جانىنداعى الاڭدار مەن ساياباقتاردا، ءتىپتى تۇرعىن ۇيلەردىڭ اۋلالارىندا دا وتەدى.