ياعني، حالىققا قىزمەت كورسەتۋ ورتالىقتارى قولحات بەرۋدى توقتاتادى
حالىققا قىزمەت كورسەتۋ ورتالىقتارىندا 8 قىزمەت بويىنشا قاعاز تۇرىندە بەرىلەتىن قولحات قىسقارتىلدى، دەپ حابارلايدى Almaty-akshamy.kz
«ازاماتتارعا ارنالعان ۇكىمەت» مەملەكەتتىك كورپوراسياسىنىڭ باسقارما ءتوراعاسى سۇيەنىش ءابدىلديننىڭ ايتۋىنشا، قاعازسىز قىزمەت كورسەتۋگە كوشۋ بىرنەشە كەزەڭمەن جۇزەگە اسىرىلادى.
"مەملەكەتتىك اپپاراتتى جالپى سيفرلاندىرۋ جانە بيۋروكراتياسىزداندىرۋ اياسىندا ميلليونداعان توننا قاعازدى تەحنولوگيالار مەن ونلاين-سەرۆيستەرگە اۋىستىرۋ قاجەت، ءبىز وسى باعىتتا جۇمىستى باستاپ تا كەتتىك. ەندى قازاقستاندىقتارعا قۇجاتى دايىن بولعاندا قاي حقو-عا جۇگىنۋ كەرەكتىگى جانە ۋاقىتى كورسەتىلگەن sms-حابارلاما كەلەدى. حقو وپەراتورىنا كليەنت قولحاتتىڭ ەلەكتروندى نۇسقاسىن كورسەتسە بولدى"، — دەدى سۇيەنىش ءابدىلدين.
قولحات بەرىلمەيتىن قىزمەتتەر ءتىزىمى:
- قازاقستان رەسپۋبليكاسىنىڭ ۇلتتىق كۋالاندىرۋشى ورتالىعىنىڭ تىركەۋ كۋالىگىن بەرۋ جانە كەرى قايتارىپ الۋ؛
- قازاقستان رەسپۋبليكاسى حالقىن تۇرعىلىقتى جەرى بويىنشا تىركەۋ؛
- قازاقستان رەسپۋبليكاسى حالقىن تۇرعىلىقتى جەرى بويىنشا تىركەۋدەن شىعارۋ؛
- ازاماتتىق حال اكتىلەرىن تىركەۋ تۋرالى قايتالاما كۋالىكتەر نەمەسە انىقتامالار بەرۋ؛
- سوتتىلىقتىڭ بولۋى نەمەسە بولماۋى تۋرالى انىقتاما بەرۋ؛
- جىلجىمايتىن مۇلىككە قۇقىق بەلگىلەيتىن قۇجاتتىڭ تەلنۇسقاسىن بەرۋ؛
- جىلجىمايتىن مۇلىك وبەكتىلەرىنىڭ جوسپارىن (سحەماسىن) قوسا العاندا، تىركەۋ ورگانى كۋالاندىرعان تىركەۋ ءىسى قۇجاتتارىنىڭ كوشىرمەلەرىن بەرۋ؛
- جىلجىمايتىن مۇلىك وبەكتىلەرىنىڭ تەحنيكالىق پاسپورتىنىڭ ءتولنۇسقاسىن بەرۋ.