تەمىرجول جول اقىسى 24،7%-عا، تاكسي اقىسى 12،2%-عا وسكەن
ق ر ۇلتتىق بانكىنىڭ دەرەگىنشە، 2023 جىلدىڭ قاڭتار ايىنداعى ايلىق ينفلياسيا 1،1%-دى قۇراپ، تۇتىنۋ تاۋارلارى مەن قىزمەت باعاسىنىڭ جىلدىق ءوسۋى 20،7%-عا دەيىن قارقىن الدى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
باس بانك ازىق-تۇلىك تاۋارلارىنىڭ اراسىندا نان-توقاش ونىمدەرى مەن جارماعا، سونىڭ ىشىندە رەسەي تاراپىنان تۋىنداعان سۇرانىستىڭ ارتۋىنا بايلانىستى كۇرىش باعاسى ۇزدىكسىز وسكەنىن حابارلادى.
«2023 جىلعى قاڭتاردا ازىق-تۇلىك تاۋارلارىنىڭ جىلدىق ينفلياسياسى 25،7%-عا دەيىن جەدەلدەدى (2022 جىلعى جەلتوقساندا – 25،3%). نان-توقاش ونىمدەرى مەن جارما باعاسى دا تەز ءوستى. رەسەي تاراپىنان جوعارى سۇرانىس پايدا بولىپ، كۇرىشتىڭ 39،6%-عا قىمباتتاعانى سەزىلدى»، - دەلىگەن ق ر ۇلتتىق بانكىنىڭ دەرەگىندە.
ەلدىڭ وڭتۇستىك ايماقتارىنداعى تومەن تەمپەراتۋرا مەن ەگىننىڭ ءبىر بولىگى جوعالعاندىقتان جاڭا پىسكەن كوكونىستەر 2022 جىلدىڭ قازان ايىندا 7،1%-دان 2023 جىلدىڭ قاڭتارىندا 21%-عا دەيىن، اتاپ ايتقاندا، قيار (22،3%-دان 55،6%-عا دەيىن) جانە پياز (13،6%-دان 62،4%-عا دەيىن) ايتارلىقتاي قىمباتتاعان.
ءبىرىنشى سۇرىپتاعى جۇمىرتقا باعاسىن سۋبسيديالاۋ توقتاتىلعاننان كەيىن باعانىڭ جىلدىق ءوسۋ قارقىنى 2022 جىلعى تامىزداعى 7،9%-دان 2023 جىلعى قاڭتاردا 25،8%-عا دەيىن وسكەن. ال ىشكى قانت ءوندىرىسىنىڭ ايتارلىقتاي وسۋىنە بايلانىستى بەسىنشى اي قاتارىنان ارزانداپ كەلەدى.
سونداي-اق يمپورتتىق ۇلەسى جوعارى تاۋارلار دا قىمباتتاپ وتىر. تاسىمال ءتاريفى وسكەندىكتەن كومىردىڭ باعاسى شارىقتادى. سۇرانىس ارتىپ، قوسالقى بولشەكتەر قىمباتتاعاندىقتان اۆتوموبيلدەردىڭ دە قۇنى ءوستى دەپ ءتۇسىندىردى باس بانك.
«يمپورتتىق تاۋارلار توبىندا اياق كيىم مەن كيىمنىڭ (18،2%)، ءۇي توقىما بۇيىمدارىنىڭ (16،4%)، جۋۋ جانە تازالىق قۇرالدارىنىڭ (51،5%)، قۇرىلىس ماتەريالدارىنىڭ (25،7%) جانە دارى-دارمەكتىڭ (15،6%) قىمباتتاعانى بايقالدى. سونىمەن قاتار، رەسەي نارىعىنان نەگىزگى وندىرۋشىلەردىڭ كەتۋىنە جانە لوگيستيكالىق جەتكىزۋ تىزبەگىنىڭ بۇزىلۋىنا بايلانىستى رەسەيدەن ورىندالاتىن جەتكىزىلىمدەردىڭ سانى قىسقارىپ، ءبىر جىلدان استام ۋاقىت بويى جەكە تاۋارلاردىڭ باعاسى ءوسۋىن جەدەلدەتتى»، - دەلىگەن ۇلتتىق بانكتىڭ ەسەبىندە.
اقىلى قىزمەتتەر قۇرىلىمىندا ينتەرنەت ءۇشىن ابونەنتتىك تولەم، سونداي-اق اۆتوموبيل مەن تەمىرجولدا جول ءجۇرۋ اقىسى ءوستى. ماسەلەن، تەمىرجول جول اقىسى 24،7%-عا، تاكسي اقىسى 12،2%-عا وسكەن.