الماتىدا جەتىم بالالاردى وتباسىنا ورنالاستىرۋ جۇيەسىن دامىتۋ بويىنشا بەلسەندى جۇمىس جالعاسۋدا.
2016 جىلدان بەرى جۇمىس ىستەپ كەلە جاتقان «ۇلتتىق اسىراپ الۋ اگەنتتىگى» جوباسى اياسىندا قابىلداۋشى وتباسىلارعا قاجەتتى قولداۋ مەن كەڭەستەر بەرىلەدى، دەپ حابارلايدى aqshamnews.kz.
بۇل تۋرالى «ۇلتتىق اسىراپ الۋ اگەنتتىگىنىڭ» جوبالىق جەتەكشىسى فاريدا راحمەتوۆا وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا ايتتى.
«ۇلتتىق اسىراپ الۋ اگەنتتىگى قابىلداۋشى وتباسىلاردى كاسىبي دايارلاۋ جانە قولداۋ جۇمىستارىمەن اينالىسادى. ءبىزدىڭ باستى ماقساتىمىز – اتا-اناسىنىڭ قامقورلىعىنسىز قالعان ءاربىر بالاعا وتباسىندا ءومىر سۇرۋگە مۇمكىندىك بەرۋ»، – دەپ اتاپ ءوتتى فاريدا راحمەتوۆا.
2016 جىلدان باستاپ 18 248 ازامات كونسۋلتاسيادان ءوتتى، ولاردىڭ 6 172ء-سى قابىلداۋشى اتا-انالار مەكتەبىندە ارنايى دايىندىقتان وتكەن. ناتيجەسىندە 1 988 بالا ءوز وتباسىن تاۋىپ، 1 335 قازاقستاندىق وتباسى ولاردى قامقورلىعىنا الدى. الماتى بويىنشا بۇل كورسەتكىشتەر كەلەسىدەي: 2 285 ادام كەڭەس العان، 818 ادام ارنايى وقىتىلعان، 158 بالا جاڭا وتباسىنا ورنالاستىرىلعان.
جاڭا فورمات – كاسىبي قابىلداۋشى وتباسىلاردى ەنگىزۋگە ەرەكشە نازار اۋدارىلۋدا. ءداستۇرلى قابىلداۋشى وتباسىلاردان ايىرماشىلىعى، فوستەرلىك اتا-انالار تەرەڭدەتىلگەن دايارلىقتان ءوتىپ، كاسىبي دەڭگەيدە جۇمىس ىستەيدى. ولاردىڭ قىزمەتى جاڭا زاڭنامامەن رەتتەلەدى جانە مەملەكەت تاراپىنان قارجىلاي قولداۋ قاراستىرىلعان.
«قابىلداۋشى كاسىبي اتا-انالار ءارتۇرلى دياگنوستيكادان ءوتىپ، پسيحولوگيالىق دايىندىقتان جانە وقىتۋدان وتەدى. ءبىز بۇل وتباسىلاردى بالا تاربيەلەۋ بارىسىندا تولىق قولداپ، تۋىنداۋى مۇمكىن قيىندىقتاردىڭ الدىن الۋ ءۇشىن جۇيەلى تۇردە باقىلاۋ جۇرگىزەمىز»، – دەپ ءتۇسىندىردى «انا ءۇيى» قورىنىڭ پسيحولوگ قىزمەتىنىڭ جەتەكشىسى لاۋرا اكاتايەۆا.
ءوز كەزەگىندە فاريدا راحمەتوۆا كاسىبي قابىلداۋشى وتباسىلارعا قارجىلىق قولداۋ ءار اتا-اناعا 70 اەك جانە بالانى اسىراۋعا 10 اەك قۇرايتىنىن اتاپ ءوتتى. سونىمەن قاتار، بۇل جۇيە قورعانشىلىق جانە قامقورشىلىق ورگاندارى تاراپىنان تۇراقتى باقىلاۋدى كوزدەيدى. اتا-انالار ءار جارتى جىل سايىن بالانىڭ دەنساۋلىعى مەن دامۋى تۋرالى ەسەپ بەرۋگە مىندەتتەلەدى، ال ماماندار بۇل وتباسىلارمەن تىعىز جۇمىس ىستەۋدى جالعاستىرادى.