الماتىدا اتا-انا قامقورلىعىنسىز قالعان بالالاردى قولداۋعا باعىتتالعان باستامالار قارقىندى دامىپ كەلەدى.
وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا «ۇلتتىق بالا اسىراپ الۋ اگەنتىگى» جوباسىنىڭ جەتەكشىسى فاريدا راحمەتوۆا كاسىبي قابىلداۋشى وتباسى ينستيتۋتىن ەنگىزۋگە ارنالعان جاڭا زاڭ جوباسىنىڭ ماڭىزدىلىعى تۋرالى ايتتى، دەپ حابارلايدى aqshamnews.kz.
«ۇلتتىق اسىراپ الۋ اگەنتتىگى – بۇل قازاقستاندا اسىراپ الۋ مادەنيەتىن دامىتۋعا جانە كاسىبي قابىلداۋشى وتباسىلاردى قولداۋعا سەگىز جىلدان بەرى ەڭبەك ەتىپ كەلە جاتقان «انا ءۇيى» قورىنىڭ ماڭىزدى بولىگى»، – دەدى فاريدا راحمەتوۆا.
قازىرگى ۋاقىتتا قازاقستاندا 20 كەڭەس بەرۋ كابينەتى جۇمىس ىستەيدى، وندا قور ماماندارى جەتىم بالالاردى وتباسىنا قابىلداعىسى كەلەتىن ازاماتتارعا كومەك كورسەتەدى. تەك الماتىنىڭ وزىندە جوبا ىسكە قوسىلعاننان بەرى 2285 ادام مامانداردان كەڭەس الىپ، ال 818 ازامات قابىلداۋشى اتا-انالار مەكتەبىندە دايىندىقتان ءوتتى. وسى باعدارلامانىڭ ناتيجەسىندە 105 الماتىلىق وتباسى 158 جەتىم بالانى ءوز قاناتىنىڭ استىنا الدى.
«سوڭعى 12 جىل ىشىندە ينتەرناتتىق مەكەمەلەردەگى بالالار سانى 10 مىڭنان 4 مىڭعا دەيىن قىسقاردى. الايدا سوڭعى بەس جىلدا بۇل كورسەتكىش وزگەرىسسىز قالىپ وتىر. بۇعان باستى سەبەپ – جەتىم قالعان بالالاردىڭ كوبىنىڭ جاسوسپىرىمدەر، ەرەكشە قاجەتتىلىكتەرى بار بالالار نەمەسە باۋىرلارىنىڭ بولۋى. مۇنداي بالالاردى ءداستۇرلى قابىلداۋشى وتباسىلارعا ورنالاستىرۋ قيىنىراق»، – دەپ ءتۇسىندىردى «انا ءۇيى» قورىنىڭ پسيحولوگ قىزمەتىنىڭ جەتەكشىسى لاۋرا اكاتايەۆا.
وسىعان بايلانىستى كاسىبي قابىلداۋشى وتباسى ينستيتۋتىن ەنگىزەتىن زاڭ جوباسى ازىرلەندى. 2025 جىلدىڭ باسىندا ونى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ماقۇلداپ، قۇجات «نەكە جانە وتباسى تۋرالى» كودەكسكە رەسمي تۇردە ەنگىزىلدى.
جاڭا جۇيە اياسىندا قابىلداۋشى اتا-انالار ارنايى دايىندىقتان ءوتىپ، كاسىبي نەگىزدە جۇمىس ىستەيتىن بولادى دەپ بولجايدى. ولارعا مەملەكەت تاراپىنان قارجىلىق قولداۋ كورسەتىلەدى: ءاربىر اتا-اناعا 70 اەك جانە بالانى اسىراۋعا 10 اەك. سونداي-اق مۇنداي وتباسىلارعا مىندەتتى قولداۋ، ونىڭ ىشىندە قۇقىقتىق، الەۋمەتتىك جانە پسيحولوگيالىق كومەكتەر ەنگىزىلۋدە.ءدى.
«قابىلداۋشى اتا-انالار قاتاڭ ىرىكتەۋدەن وتەدى، ولاردىڭ موتيۆاسياسى مەن دايىندىق دەڭگەيىن انىقتاۋ ءۇشىن دياگنوستيكالىق سۇحبات جۇرگىزىلەدى. سونىمەن قاتار، ولار قابىلداۋشى اتا-انالار مەكتەبىندە وقىتىلىپ، بالا وتباسىنا قابىلدانعاننان كەيىن تۇراقتى تۇردە مامانداردىڭ قولداۋىن الىپ وتىرادى»، – دەپ تۇيىندەدى فاريدا راحمەتوۆا.