الماتى جاستار ساياساتى سالاسىندا حالىقارالىق بايلانىستاردى نىعايتۋعا ەرەكشە كوڭىل بولۋدە.
وسى ماقساتتا وڭتۇستىك استاناعا قىرعىز رەسپۋبليكاسىنىڭ جاستار دەلەگاسياسى ارنايى ساپارمەن كەلدى. دەلەگاسيا قۇرامىندا قىرعىز پارلامەنتىنىڭ، مادەنيەت مينيسترلىگىنىڭ جانە جاستار ساياساتىنا جاۋاپتى قۇرىلىمداردىڭ وكىلدەرى بار، دەپ حابارلايدى aqshamnews.kz.
قوناقتار ەڭ الدىمەن الاتاۋ حاب كىتاپحانالار جەلىسىندە بولىپ، ونىڭ قىزمەتىمەن تانىستى. سونداي-اق ءال-فارابي اتىنداعى قازاق ۇلتتىق ۋنيۆەرسيتەتىنىڭ تۇركىتانۋشى عالىمى نۇرات ءىلياس قازاق-قىرعىز حالىقتارىنىڭ ورتاق تاريحى مەن بولاشاعى جايىندا مازمۇندى بايانداما جاسادى.
ءوز كەزەگىندە الماتى قالاسى جاستار ساياساتى باسقارماسىنىڭ ءبولىم باسشىسى نۇرسۇلتان بەكقايروۆ باسقارمانىڭ نەگىزگى قىزمەت باعىتتارى تۋرالى ايتىپ، كوميۋنيتي ورتالىقتارىنىڭ جۇمىسىن تانىستىردى.
الماتىداعى كوميۋنيتي ورتالىقتارى – جاستار ساياساتىنىڭ ماڭىزدى بولىگى. بۇل ورتالىقتار جاس كاسىپكەرلەردى، ەرىكتىلەردى، كرەاتيۆتى يندۋستريا وكىلدەرى مەن بەلسەندى جاستاردى بىرىكتىرىپ، ولاردىڭ دامۋىنا قولداۋ كورسەتەدى. قىرعىزستاندىق دەلەگاسيا ورتالىقتاردىڭ قىزمەتىمەن تانىسىپ، جاستاردىڭ باستامالارىن قولداۋ جانە ءوزىن-وزى دامىتۋ مۇمكىندىكتەرى جونىندە مول اقپارات الدى.
ساپار بارىسىندا جاستار جوبالارىن ىسكە اسىرۋ تاجىريبەسىمەن الماسۋعا ەرەكشە نازار اۋدارىلدى. كەزدەسۋ سوڭىندا تاراپتار ەكى ەل جاستارى اراسىنداعى ىنتىماقتاستىقتى نىعايتۋ، بىرلەسكەن باستامالاردى جۇزەگە اسىرۋ جانە دوستىق بايلانىستاردى دامىتۋ ماقساتىندا ءبىرقاتار ءىس-شارالاردى ۇيىمداستىرۋعا كەلىستى.