اعا لەيتەنانت اردانا بوتاي سۋ-30سم كوپ فۋنكسيونالدى جويعىشىنىڭ ەكيپاج كومانديرى رەتىندە العاشقى جەكە ۇشۋىن ورىندادى.
قازاقستانداعى اسكەري اۆياسيانىڭ جالعىز ايەل ۇشقىشى ەكيپاج كومانديرى اتاندى، دەپ حابارلايدى Almaty-akshamy.kz.
ءوز شەبەرلىگىن اردانا بوتاي تاجىريبەلىك ەمتيحان بارىسىندا دالەلدەگەن. قورعانىس مينيسترلىگىنىڭ مالىمەتى بويىنشا، ق ر قك اۋە قورعانىسى كۇشتەرىنىڭ باس قولباسشىسى، اۆياسيا گەنەرال-لەيتەنانتى نۇرلان ورمانبەتوۆ دەربەس ۇشۋعا رۇقسات بەرەتىن پراكتيكالىق ەمتيحاندى قابىلداعان.
«قازاقستان رەسپۋبليكاسى قارۋلى كۇشتەرىنىڭ تاريحىندا سۋ-30سم جاۋىنگەرلىك ۇشاعىندا ەكيپاج كومانديرى رەتىندە دەربەس ۇشۋدى العاش رەت ايەل ادام ورىندادى. ونىڭ بۇعان جاقسى دايىندالعانىن، كوك اسپاندى باعىندىرۋعا دەگەن ۇمتىلىسىن، جويعىش ۇشقىش رەتىندە مەملەكەتىمىزدىڭ اۋە شەبىن كۇزەتۋدەگى مىندەتتەردى ورىنداپ جۇرگەنىن اتاپ وتكەن ءجون. ول جاۋىنگەرلىك اۆياسياداعى ايەلدەردىڭ ەرلەرمەن تەڭ دارەجەدە كۇردەلى مىندەتتەردى ورىنداي الاتىنىن دالەلدەدى»، - دەدى اۆياسيا گەنەرال-لەيتەنانتى نۇرلان ورمانبەتوۆ.
قازاقستانداعى اسكەري اۆياسيانىڭ جالعىز ايەل ۇشقىشى قاراعاندى اۆيابازاسىندا قىزمەت ەتەدى. بىرنەشە اي بويى اردانا تالدىقورعان قالاسىنداعى اۆياسيا بازاسىندا ارنايى وقۋدان وتكەن.
«سۋ-30سم ۇشاعىمەن جەكە ۇشۋ - مەن ءۇشىن كاسىبي تۇرعىدا قالىپتاسۋعا جاساعان ۇلكەن قادام. الداعى ماقساتىم - تەحنيكانى جاقسارتۋ جانە جەر ۇستىندەگى، اۋەدەگى ماقساتتارعا جانە توپتىق ۇشۋلارعا جاۋىنگەرلىك قولدانۋعا رۇقسات الۋ ءۇشىن ءارى قاراي دايارلىق باعدارلاماسىنا ماشىقتانۋ داعدىلارىن پىسىقتاۋ»، - دەپ اردانا بوتاي بولاشاققا ارنالعان جوسپارلارىمەن ءبولىستى.
مامانداردىڭ ايتۋىنشا، اتالعان سۋ-30سم – كوپ فۋنكسيونالدى 4++ بۋىندى جويعىش ۇشاق. ول كەز كەلگەن اۋا رايىندا، كۇندىز-تۇنى ارەكەت ەتۋگە قابىلەتتى. اۋە بارلاۋىن جۇرگىزۋگە، اۋەدە، جەر ۇستىندە جانە تەڭىزدە نىسانداردى جويۋعا ارنالعان.
جوعارى مانيەۆرلى جويعىش ۇشاقپەن ۇشۋعا رۇقسات الۋ ءۇشىن بىرنەشە اي بويى تەوريالىق ءبىلىم الىپ، ارنايى سۋ-30سم ترەناجەرىندا جاتتىعادى، شتۋرمان رەتىندە ۇشادى. كوپتەگەن سىناقتار مەن ەمتيحانداردى ءساتتى تاپسىرعان سوڭ عانا، تاۋەلسىز ۇشۋعا رۇقسات الادى.
