قازاقستانداعى اۆتوجانارماي ستانسيالارىنىڭ (ازس) ءىرى جەلىلەرى وتىننىڭ ساپاسى، قىزمەت كورسەتۋ دەڭگەيى، باعا ساياساتى جانە كليەنتتەردىڭ پىكىرلەرى ارقىلى ەرەكشەلەنەدى. وسى جەلىلەردى كىم باسقاراتىنىن جانە ولاردىڭ ارتىندا قانداي تانىمال بيزنەسمەندەر تۇرعانىن aqshamnews.kz زەرتتەپ كوردى.
قازاقستانداعى ءىرى ازس جەلىلەرى:
Qazaq Oil – 370-تەن استام ستانسيا.
Helios – 280-نەن استام ستانسيا.
Sinooil – 190-نان استام ستانسيا.
Royal Petrol – 90-نان استام ستانسيا.
«گازپروم نەفت» – 70-تەن استام ستانسيا.
Gazenergy – شامامەن 50 ستانسيا.
COMPASS – 16 ستانسيا.
2022 جىلى قازاقستاننىڭ باسەكەلەستىكتى قورعاۋ جانە دامىتۋ اگەنتتىگىنىڭ دەرەكتەرىنە سايكەس، ىشكى نارىقتاعى نەگىزگى مۇناي جەتكىزۋشىلەر – Petrosun، Petroleum Operating، جانە «قازمۇنايگاز» بولعان. ولار مۇنايدىڭ شامامەن 80%-ىن جەتكىزگەن. وسى كولەمنىڭ ۇشتەن ەكىسى تىكەلەي بولشەك ساۋدا جەلىلەرىنە، ال قالعان بولىگى قايتالاما كوتەرمە ساتۋشىلارعا جىبەرىلگەن.
Qazaq Oil: بۇل جەلى PetroRetail كومپانياسىنىڭ باسقارۋىندا. كومپانيا 2018 جىلدان بەرى 43 ميلليارد تەڭگە سالىق تولەپ، سوڭعى 12 ايدا فيليالدارىنان 3 ميلليارد تەڭگە اۋداردى. قۇرىلتايشىلاردىڭ قاتارىندا تانىمال بيزنەسمەندەر تيمۋر قۇلىبايەۆ، راۋشان ساعدييەۆا، دانيار ءابىلعازين، باۋرجان تويبازاروۆ، جانە نۇرجان سارتابايەۆ بار.
Helios: گەليوس كومپانياسى دا قازاقستانداعى تانىمال جانارماي جەلىلەرىنىڭ ءبىرى. 2015 جىلدان بەرى كومپانيا 41 ميلليارد تەڭگە سالىق تولەدى. بۇل جەلىنىڭ نەگىزىن سالۋشىلاردىڭ ءبىرى راشيت سارسەنوۆ، ال ءقازىر كومپانيانى ديانا سارسەنوۆا باسقارادى.
Sinooil: بۇل كومپانيانىڭ قۇرىلتايشىلارىنىڭ اراسىندا قازاقستاندىق جانە شەتەلدىك سەرىكتەستەر بار، ولاردىڭ ىشىندە دياس سۇلەيمەنوۆ، ادل ەسكەنديروۆ، جانە قىتايدىڭ CNPC كومپانياسى بار.
Royal Petrol: توو Royal Petrol كومپانياسى باسقارۋىندا. 2008 جىلدان بەرى كومپانيا 7 ميلليارد تەڭگە سالىق تولەدى. كومپانيانىڭ يەسى تالعات جانابايەۆ.
گازپروم نەفت: رەسەيلىك «گازپروم نەفت» كومپانياسى قازاقستاندا دا جانارماي ستانسيالارىن باسقارادى. كومپانيا 59 ميلليارد تەڭگە سالىق تولەدى.
Compass: Compass جەلىسى Kazpetrol group قۇرامىنا كىرەدى جانە ەركىن تاتىشيەۆتىڭ يەلىگىندە.