ق ر ەڭبەك جانە حالىقتى الەۋمەتتىك قورعاۋ مينيسترلىگى ق ر ۇكىمەتىنىڭ اتىنا جىبەرىلگەن قاداعالاۋ اكتىسىندە كورسەتىلگەن ق ر باس پروكۋراتۋراسىنىڭ ەسكەرتۋلەرىن ەسكەرە وتىرىپ، ازاماتتاردى ەڭبەك كۇشى ارتىق وڭىرلەردەن ەڭبەك كۇشى تاپشى وڭىرلەرگە ەرىكتى تۇردە كوشىرۋ ماسەلەلەرىن رەتتەۋ سالاسىنداعى قولدانىستاعى نقا-عا تۇزەتۋلەردىڭ ءۇشىنشى پاكەتىن ازىرلەدى، دەپ حابارلايدى aqshamnews.kz.
جۇمىس كۇشىنىڭ موبيلدىلىگىن ارتتىرۋ ءۇشىن ازاماتتاردى ەرىكتى تۇردە قونىس اۋدارۋ جونىندەگى شارالاردىڭ ىسكە اسىرىلۋىن تەكسەرۋ قورىتىندىلارى بويىنشا باس پروكۋراتۋرا قونىس اۋدارۋعا قاتىسۋشىلار مەن ەڭبەك موبيلدىلىگى ورتالىعى اراسىنداعى شارتتىق مىندەتتەمەلەردىڭ نەگىزدەرىن، جۇرگىزۋ ءتارتىبىن، نىسانىن جانە ورىندالۋىن مونيتورينگىلەۋ بولىگىندە قولدانىستاعى قاعيدالارعا وزگەرىستەر ەنگىزۋ قاجەتتىگىن اتاپ ءوتتى.
وسى جىلدىڭ تامىز ايىندا ەڭبەكمينى قۇقىقتىڭ سىبايلاس جەمقورلىق نورمالارىن انىقتاۋ جانە نورماتيۆتىك قۇقىقتىق اكتىلەردى جەتىلدىرۋ بويىنشا ۇسىنىستار ازىرلەۋ ماقساتىندا قۇقىقتىق مونيتورينگ جۇرگىزىلدى.
انىقتالعان پروبلەمالىق ماسەلەلەر مەن قاداعالاۋ ورگانىنىڭ ۇسىنىمدارىن ەسكەرە وتىرىپ، ەڭبەك موبيلدىلىگىن ارتتىرۋ ءۇشىن ەرىكتى قونىس اۋدارۋ ەرەجەلەرىنە تۇزەتۋلەردىڭ ءۇشىنشى پاكەتى دايىندالدى.
اتاپ ايتقاندا، مىناداي وزگەرىستەر كوزدەلەدى:
1) مانساپ ورتالىقتار قىزمەتكەرلەرىنىڭ قونىس اۋدارۋشى نەمەسە قانداس ۇسىنعان قۇجاتتاردى، ەكونوميكالىق موبيلدىلىگى سەرتيفيكاتى بويىنشا اقشالاي تولەمدى پايدالانا وتىرىپ ساتىپ الىناتىن جىلجىمايتىن مۇلىك وبەكتىسى بويىنشا ولاردىڭ تولىقتىعى مەن دۇرىستىعى تۇرعىسىنان مالىمەتتەردى مامىلە وبەكتىسىنە تولىق جانە مۇقيات قاراۋ ءۇشىن وعان شىعۋ جولىمەن سالىستىرىپ تەكسەرۋدى جۇزەگە اسىرۋى؛
2) ساتىپ الىناتىن جىلجىمايتىن مۇلىكتىڭ قۇنىن باعالاۋ ناتيجەلەرىنە شاعىمدانۋ بويىنشا ەڭبەك موبيلدىلىگى ورتالىقتارىنىڭ قۇقىعىن كەڭەيتۋ؛
3) قونىس اۋدارۋشىنىڭ نەمەسە قانداستىڭ بۇدان بۇرىن ەكونوميكالىق موبيلدىلىك سەرتيفيكاتى ارقىلى ساتىپ الىنعان تۇرعىن ءۇيدى ساتىپ الۋ نيەتى بولعان جاعدايدا ەكونوميكالىق موبيلدىلىك سەرتيفيكاتىن بەرۋدەن باس تارتۋ بويىنشا قوسىمشا نەگىزدى بەكىتۋ؛
4) قونىس اۋدارۋشىلاردىڭ قونىستانۋ اۋماعىنان تىس جەرلەردە ەڭبەك قىزمەتىن جۇزەگە اسىرۋ قۇقىعىن الىپ تاستاۋ.
سونىمەن قاتار قانداستار مەن قونىس اۋدارۋشىلاردى قابىلداۋدىڭ وڭىرلىك كۆوتاسىنا ەنگىزۋ جانە ەرىكتى قونىس اۋدارۋدى مەملەكەتتىك قولداۋ شارالارىن كورسەتۋ جونىندەگى مەملەكەتتىك كورسەتىلەتىن قىزمەتتەردى 2025 جىلعى ناۋرىزدان باستاپ اۆتوماتتاندىرۋ جوسپارلانىپ وتىرعانىن حابارلايمىز. وسىلايشا، كورسەتىلەتىن قىزمەتتى الۋشىلاردىڭ مانساپتىق ورتالىقتاردىڭ قىزمەتكەرلەرىمەن بايلانىسى جويىلادى، بۇل سىبايلاس جەمقورلىق تاۋەكەلدەرىن بارىنشا ازايتۋعا مۇمكىندىك بەرەدى.
وسى مەملەكەتتىك قىزمەت تۇرلەرىن سيفرلاندىرۋ قونىس اۋدارۋعا قاتىسۋشىلار مەن ەڭبەك موبيلدىلىگى ورتالىقتارى اراسىنداعى شارتتىق مىندەتتەمەلەردىڭ ورىندالۋىنا ناقتى مونيتورينگتى قامتاماسىز ەتەدى.
ەستەرىڭىزگە سالا كەتەيىك، 2023 جىلدىڭ 1 شىلدەسىنەن باستاپ ۇكىمەت ايقىنداعان قونىستاندىرۋ وڭىرلەرىنىڭ تارتىمدىلىعىن ارتتىرۋ ماقساتىندا جاڭا ورىنداعى تۇرعىن ءۇي قۇنىنىڭ 50% - نا دەيىنگى مولشەرىندە ەكونوميكالىق موبيلدىلىك سەرتيفيكاتتارى بويىنشا اقشالاي تولەمدەر جۇزەگە اسىرىلا باستادى.
سول جىلدىڭ قىركۇيەگىندە ەڭبەكمينى بەرىلگەن 486 ەكونوميكالىق موبيلدىلىك سەرتيفيكاتتارى بويىنشا كەشەندى تالداۋ جۇرگىزدى، ونىڭ بارىسىندا قونىستاندىرۋ وڭىرلەرىندە جوعارلاتىلعان باعامەن تۇرعىن ءۇي ساتىپ الۋ فاكتىلەرى انىقتالدى. ءتيىستى شارالاردى قابىلداۋ ءۇشىن جەرگىلىكتى اتقارۋشى ورگاندارعا جانە ق ر قارجى مونيتورينگى اگەنتتىگىنە حاتتار جولداندى.
ق ر باس پروكۋراتۋراسىنىڭ دەرەكتەرى بويىنشا، قاداعالاۋ ورگانى جۇرگىزگەن تەكسەرۋلەر بارىسىندا جالعان قۇجاتتاردى پايدالانا وتىرىپ، ازاماتتاردى جالعان كوشىرۋىن رەسىمدەۋ جولىمەن 1 ملرد تەڭگەدەن استام قارجىنى ماقساتسىز پايدالانۋ جانە ۇرلاۋ فاكتىلەرى انىقتالدى.
پروكۋرورلار سوتقا دەيىنگى 20 تەرگەۋدى باستادى. تەرگەۋ بارلىق قاتىسۋشى تۇلعالاردى انىقتاۋ، ولاردى جاۋاپقا تارتۋ، سونداي-اق كەلتىرىلگەن زالالدى وتەۋ بويىنشا شارالار قابىلدايدى.
نورماتيۆتىك اكتىلەردەگى ولقىلىقتاردى جويۋ جانە ەرىكتى قونىس اۋدارۋدى قولداۋ جونىندەگى مەملەكەتتىك شارالاردىڭ ىسكە اسىرىلۋ بارىسىن باقىلاۋ جۇيەسىن كۇشەيتۋ ءۇشىن باس پروكۋراتۋرا ق ر ۇكىمەتىنە قاداعالاۋ اكتىسىن ەنگىزدى.