«دينامو» ستاديونىندا «ناشاقورلىققا جول جوق» ۇرانىمەن وتكەن ەسىرتكى جارنامالارىن جويۋ اكسياسىنا مىڭعا جۋىق ادام قاتىستى. ىشكى ىستەر ورگاندارىنىڭ قىزمەتكەرلەرىمەن قاتار پروكۋراتۋرا، اسكەري پوليسيا قىزمەتكەرلەرى، س.ج. اسفەندياروۆ اتىنداعى قازۇمۋ ستۋدەنتتەرى، ەرىكتىلەر ليگاسىنىڭ مۇشەلەرى جانە قالا تۇرعىندارى دا اكسياعا اتسالىستى.
– اۋقىمدى اكسيا پرەزيدەنتتىڭ تاپسىرمالارىن ورىنداۋ جانە 2023–2025 جىلدارعا ارنالعان ناشاقورلىق پەن ەسىرتكى بيزنەسىنە قارسى كۇرەس جونىندەگى كەشەندى جوسپاردى ىسكە اسىرۋ اياسىندا وتكىزىلۋدە. جىل باسىنان بەرى الماتىدا پوليسيا قىزمەتكەرلەرىنىڭ كۇشىمەن ەسىرتكى، پسيحوتروپتىق زاتتار جانە ولاردىڭ انالوگتارىن ناسيحاتتايتىن بەس مىڭنان استام حابارلامالار (ەسىرتكى گراففيتي) بويالىپ جويىلدى، – دەدى الماتى قالاسى پوليسيا دەپارتامەنتىنىڭ ەسىرتكى قىلمىسىنا قارسى كۇرەس باسقارماسىنىڭ اسا ماڭىزدى ىستەر جونىندەگى اعا جەدەل ۋاكىلى، پوليسيا پودپولكوۆنيگى داۋرەن كوبەيەۆ.
ونىڭ ايتۋىنشا، ەسىرتكى جارناماسىنا تەلەگرام-سىلتەمەلەر، QR-كودتار، سونداي-اق اپتاسىنا 500 مىڭنان 1،5 ميلليون تەڭگەگە دەيىنگى جوعارى جالاقى ۋادە ەتەتىن كۇدىكتى حابارلاندىرۋلار جاتادى.
قازاقستان رەسپۋبليكاسىنىڭ قىلمىستىق كودەكسىنىڭ 299-بابىنا سايكەس، ەسىرتكى قۇرالدارىن ناسيحاتتاۋ/جارنامالاۋ التى جىلعا دەيىن باس بوستاندىعىنان ايىرۋ جازاسىنا كەسىلەدى.
الماتىلىق ستۋدەنت رينات راحىمجانوۆ وسىنداي اكسيالارعا بىرنەشە رەت قاتىسقان.
– ەسىرتكىگە قارسى كۇرەسكە ءوز ۇلەسىمدى قوسقانىما قۋانىشتىمىن. ءوزىم سالاۋاتتى ءومىر سالتىن قولدايمىن جانە بارلىق ادامداردى سوعان شاقىرامىن، – دەپ اتاپ ءوتتى بەلسەندى.