تەلەحيكايانىڭ ءتۇسىرىلىم جۇمىستارى الماتى جانە قوستاناي وبلىستارىندا ءوتتى
«قازاقستان» تەلەراديوكورپوراسياسى بۇگىن ەلوردادا الاش قايراتكەرى ءمىرجاقىپ دۋلاتۇلىنا ارنالعان «ءمىرجاقىپ. ويان، قازاق!» تاريحي تەلەحيكاياسىنىڭ تۇساۋكەسەرىن وتكىزدى. تۇساۋكەسەرگە دەپۋتاتتار، زيالى قاۋىم وكىلدەرى، تاريحشىلار مەن جۋرناليستەر قاتىستى، دەپ حابارلايدى Almaty-akshamy.kz.
التى ءبولىمدى تاريحي تۋىندىدا ءمىرجاقىپ دۋلات ۇلى ءومىرىنىڭ 1909-1935 جىلدارداعى كەزەڭى قامتىلادى. ءمىرجاقىپتىڭ «ويان، قازاق!» كىتابىنىڭ جارىققا شىعۋى، «باقىتسىز جامال» رومانىنىڭ جازىلۋى، ريەۆوليۋسيادان كەيىنگى جىلدارداعى، اشارشىلىق كەزىندەگى قوعامدىق-ساياسي قىزمەتى، قىزىلوردا، سەمەي، ماسكەۋدىڭ ايگىلى «بۋتىركا» اباقتىسىنداعى جىلدارى جانە جارى عاينيجامالمەن ماحاببات حيكاياسى سەريالدا كەزەك باياندالادى.
تاريحي تۋىندىنىڭ ماقساتى - ءمىرجاقىپ دۋلات ۇلىنىڭ ءومىرى مەن شىعارماشىلىعىن قىزىقتى سيۋجەتتىك جەلى ارقىلى كەڭىنەن ناسيحاتتاۋ ارقىلى جاستار بويىندا مەملەكەتشىلدىك رۋحتى قالىپتاستىرۋعا ىقپال ەتۋ.
«Qazaqstan» ارناسى تاۋەلسىزدىك كۇنى قارساڭىندا الاش قايراتكەرى ءمىرجاقىپ دۋلاتۇلىنا ارنالعان تاريحي تەلەحيكايانى كوپشىلىك نازارىنا ۇسىنىپ وتىر. سوڭعى جىلدارى وتاندىق تەلەارنالاردا ۇلت رۋحانياتىنىڭ ۇلى تۇلعارىن ۇلىقتاۋعا ارنالعان، تاريحي تاقىرىپتاردان تامىر تارتقان ءتۇرلى تۋىندىلار كورسەتىلۋدە. مازمۇندىق ءارى ساپالىق تۇرعىدا ولاردىڭ كوپشىلىگى تالعامپاز كورەرمەننىڭ جوعارى باعاسىنا يە بولىپ وتىر. بۇگىنگى «ءمىرجاقىپ. ويان، قازاق!» تەلەحيكاياسى سول تاعىلىمدى ءۇردىستى جالعاپ، ءوز ۇدەسىنەن شىعادى دەپ سەنەمىن. جالپى، ءمىرجاقىپ دۋلات ۇلىنىڭ شىعارماشىلىق بولمىسىن زەردەلەۋدە جاسالىپ جاتقان وسىنداي ۇلكەن ىزدەنىستەر لايىقتى باعاسىن الۋعا ءتيىس»، - دەدى اقپارات جانە قوعامدىق دامۋ ءمينيسترى دارحان ءقىدىرالى.
تەلەحيكايانىڭ رەجيسسەرى - مۇرات ەسجان، پروديۋسەرى - ايساۋلە ابىلدايەۆا. سەناريي اۆتورلارى - مۇرات ەسجان، اقىن، دراماتۋرگ ۇلاربەك نۇرعالىم ۇلى جانە الاشتانۋشى عالىم ۇشقىن ءسايدىراحمان.
سەريالدا باس كەيىپكەر ءمىرجاقىپ دۋلاتوۆتىڭ ءرولىن باقىت قاجىبايەۆ، جارى عاينيجامالدىڭ ءرولىن زارينا كارمەن، قىزى گۇلنار دۋلاتوۆانىڭ ءرولىن گۇلجاس اپسەتوۆا وينايدى. احمەت بايتۇرسىن ۇلى مەن ءاليحان بوكەيحانوۆ بەينەسىن «Qazaqstan» تەلەارناسى تۇسىرگەن «احمەت. ۇلت ۇستازى» تەلەحيكاياسىنىڭ باستى كەيىپكەرلەرى بايعالي ەسەنالى مەن باۋىرجان قاپتاعاي سومدايدى.
تەلەحيكايانىڭ ءتۇسىرىلىم جۇمىستارى الماتى جانە قوستاناي وبلىستارىندا ءوتتى. «ءمىرجاقىپ. ويان، قازاق!» تەلەحيكاياسى «Qazaqstan» تەلەارناسىنان 16-17 جەلتوقسان كۇندەرى 18:00-دە ەفيرگە شىعادى.
«بۇل – «قازاقستان» تەلەراديوكورپوراسياسىنىڭ سوڭعى ەكى جىلدا تۇسىرگەن 11ء-شى تاريحي تەلەحيكاياسى. ەكى جىل ىشىندە كورەرمەنگە ءتۇرلى جانردا 500-گە جۋىق بولىمنەن تۇراتىن 33 تەلەحيكايا ۇسىندىق. ءقازىر ءبىز ءۇشىن دە، سەريالدار وندىرىسىمەن اينالىساتىن پروداكشن كومپانيالار ءۇشىن دە شىڭدالۋ كەزەڭى. تاريحي سەريالدارعا قاتىستى وتكەن جىلى كورەرمەن تاراپىنان ايتىلعان كەيبىر كەمشىلىكتەردى، قاتەلىكتەردى قايتالاماۋعا تىرىستىق. جالپى، تەليەۆيزيالىق سەريال وندىرىسىندە قويعان ماقساتىمىز – الدىمەن، وزىق قوعامدىق قۇندىلىقتاردى، تۇلعالارىمىزدىڭ ءومىرىن ناسيحاتتاۋ بولسا، ەكىنشىدەن اۋديتوريانىڭ ءوز وتاندىق ونىمدەرىمىزبەن ماقتاناتىن دەڭگەيگە جەتۋ»، - دەدى باسقارما ءتورايىمى ءلاززات تانىسباي تۇساۋكەسەر شاراسىندا سويلەگەن سوزىندە.
باسقارما ءتورايىمى «ءمىرجاقىپ. ويان قازاق!» تەلەحيكاياسىنىڭ تۇساۋكەسەرىنەن كەيىن «قازاقستان» تەلەراديوكورپوراسياسىنىڭ تاريحشى، عالىم الكەي مارعۇلان تۇلعاسىنا ارنالعان 4 بولىمنەن تۇراتىن «الكەي. عۇلاما عۇمىر» سەريالى ەفيرگە شىعاتىنىن جەتكىزدى. ال قىرعىزستان جانە وزبەكستانمەن بىرلەسە ءتۇسىرىپ جاتقان «قورقىت اتا» سەريالى 2023 جىلى جارىققا شىقپاق.