قازاندا قازاقستاندىقتار وفتالمولوگيالىق اۋرۋلاردى ەمدەۋ ءۇشىن زەينەتاقى جيناقتارىن پايدالانۋ جونىندە 15،4 مىڭ ءوتىنىش بەردى. ولاردىڭ جالپى سوماسى 13،3 ملرد تەڭگەگە جەتتى، - دەپ حابارلايدى aqshamnews.kz ءتىلشىسى ءبىرىنشى كرەديتتىك بيۋروعا سىلتەمە جاساپ.
بۇل كورسەتكىش قىركۇيەكپەن سالىستىرعاندا 10 ەسەگە جۋىق، ال 2025 جىلدىڭ قاڭتار-تامىز ايلارىنداعى ورتاشا دەڭگەيدەن 73 ەسەگە جوعارى بولدى. بۇعان دەيىن كوز ەمدەۋگە بايلانىستى جالپى تولەمدەر كولەمى ءبىر ايداعى قازىرگى ناتيجەگە ارەڭ جەتكەن ەدى.
تولەمدەردىڭ كۇرت ارتۋى قىركۇيەكتە كۇشىنە ەنگەن ستوماتولوگيالىق ەمگە زەينەتاقى جيناعىن پايدالانۋعا تىيىم سالۋمەن بايلانىستى. وسىعان دەيىن ەمگە بەرىلگەن تولەمدەردىڭ باسىم بولىگى ءتىس ەمدەۋگە ارنالعان بولاتىن.
"قازاندا ستوماتولوگيالىق ماقساتتاعى وتىنىشتەر ورىندالعان جوق، الايدا بۇرىن بەرىلگەن وتىنىشتەر بويىنشا قاراجاتتى قايتارۋ جالعاستى"، – دەپ اتاپ ءوتتى بيۋرو.
قاراجاتتى قايتارۋ ءوتىنىش بەرۋشى شەشىمىن وزگەرتكەن، قۇجات تاپسىرماعان نەمەسە قاراجاتتى ماقساتسىز پايدالانباق بولعان جاعدايلاردا جۇرگىزىلەدى. كوز اۋرۋلارىن ەمدەۋگە بايلانىستى دا مۇنداي جاعدايلار تىركەلگەن. بۇل – 730 ملن تەڭگە بولاتىن 901 ءوتىنىش نەمەسە قازان ايىنداعى جالپى تولەمدەردىڭ شامامەن 6%-ى.
زەينەتاقى جيناعىن تۇرعىن ءۇي جاعدايىن جاقسارتۋعا پايدالانۋ دا بەلسەندى تۇردە جالعاسۋدا:
- 138،4 مىڭ ءوتىنىش ورىندالدى (+7%)،
- جالپى سوما – 79،9 ملرد تەڭگە (+9%).
تۇرعىن ۇيگە بايلانىستى قاراجات قايتارۋ دا قالىپتى دەڭگەيدە – 12،6 ملرد تەڭگەگە 16،3 مىڭ ءوتىنىش.