قازاقستاندا بلوگەرلەرگە باقىلاۋ كۇشەيە مە؟
AMANAT فراكسياسىنىڭ دەپۋتاتتارى ينفليۋەنسەرلەر مەن الەۋمەتتىك جەلىلەردەگى زاڭسىز لوتەرەيالار مەن گيۆتەردى ۇيىمداستىرۋشىلارعا قاتاڭ باقىلاۋ ەنگىزۋدى ۇسىنادى، دەپ حابارلايدى aqshamnews.kz.
دەپۋتات ەرلان سايىروۆ بلوگەرلەر مەن كوۋچتاردىڭ الەۋمەتتىك جەلىلەردە جازىلۋشىلار ەسەبىنەن زاڭسىز اقشا تاۋىپ وتىرعانىن ايتتى. ءبىر جىل ىشىندە 100-دەن استام وسىنداي ۇتىس ويىنى انىقتالىپ، ولاردىڭ ۇيىمداستىرۋشىلارىنا 46 ميلليون تەڭگە ايىپپۇل سالىنعان.
«ولار بيلەت پەن تۇبىرتەكتەردى ساتىپ، تۋريستىك جولدامالار، تەحنيكا، زەرگەرلىك بۇيىمدار، ليۋكس جىلجىمايتىن مۇلىك پەن اۆتوموبيلدەردى ساتۋ تۇرىندە كونكۋرستار وتكىزەدى. مۇنداي كۇماندى اكسيالار زاڭسىز»، – دەدى دەپۋتات ءوز بايانداماسىندا.
ماجىلىسمەندەر بلوگەرلەردىڭ تابىسىنا سالىق سالۋ ماسەلەسىن كوتەردى. سايىروۆ مۇنداي تاجىريبە اقش، ۇلىبريتانيا جانە قىتايدا بار ەكەنىن اتاپ ءوتتى، ال كەيبىر ەلدەردە سالىق مولشەرلەمەسى 40%-عا دەيىن جەتەدى ەكەن.