جاس يننوۆاتورلار ۆيكتور كوحنو مەن ماكسيم سۋرين اۆتونومدى دۋلىعانىڭ كومەگىمەن قالادا ءوز بەتىنشە جانە ءقاۋىپسىز قوزعالۋعا بولادى، وسىلايشا زاعيپ ادامداردىڭ كۇندەلىكتى ءومىرى ايتارلىقتاي جەڭىلدەيدى دەگەن قورىتىندىعا كەلدى.
كورۋ قابىلەتى ناشار ادامداردىڭ ماسەلەسىن شەشۋ ءۇشىن جاس اۆتورلار يننوۆاسيالىق دۋلىعا جاساپ شىعاردى، دەپ حابارلايدى Almaty-akshamy.kz «ۆەچەرنيي الماتى» گازەتىنە سىلتەمە جاساپ.
«ءوزىڭىزدى قاراڭعىلىقتا قالىپ قويدىم دەپ ەلەستەتىپ كورىڭىزشى، ءسىزدىڭ العاشقى ارەكەتتەرىڭىز قانداي بولادى؟ ءسىز دىبىستاردى تىڭداي باستايسىز، قايدا ەكەنىڭىزدى انىقتاۋ ءۇشىن اينالاڭىزداعى زاتتاردى ىزدەيسىز. بۇل ادىستەردى دۇنيە جۇزىندە 36 ميلليوننان استام زاعيپ ادام قولدانادى. ءاربىر زاعيپ ادام جاناسۋعا، دىبىستىق سيگنالدارعا، جەكە كومەكشىلەرگە جانە ەكراندى وقۋ قۇرالدارىنا تىكەلەي تاۋەلدى»، - دەيدى ۆيكتور.
تەك قازاقستاننىڭ وزىندە 160 مىڭ كورۋ قابىلەتى ناشار ادام بار. بۇل ماسەلەنى شەشۋ ءۇشىن جىگىتتەر سوقىرلارعا كەڭىستىكتە جۇرۋگە كومەكتەسەتىن كونسەپسيا – دۋلىعا ۇسىنادى.
يننوۆاسيالىق جۇمىس بارىسىندا اۆتورلار سوقىرلار قوعامىنا باردى. زاعيپ جاندارمەن ونداعان سۇحبات جۇرگىزگەننەن كەيىن جاس روبوتوتەحنيكتەر ءپروتوتيپتى جوبالاۋ فاكتورلارىن انىقتاپ العان.
«دۋلىعانىڭ ىسكە قوسۋ تۇيمەسى، كەڭ ەكراندى كامەراسى، ۆيزيتكانىڭ كولەمىندەي ءبىر پلاتالى كومپيۋتەرى جانە ەكى قۇلاققابى بار. دۋلىعا اۆتوكولىكتەردى، پويىزداردى، اۆتوبۋستاردى، باعدارشامدى، جول بەلگىلەرىن، ۆەلوسيپەدشىلەردى جانە باسقا دا كەدەرگىلەردى انىقتاۋعا قابىلەتتى»، - دەپ ءتۇسىندىردى جوبا اۆتورى.
بۇنىمەن قوسا ۆيكتور مەن ماكسيم سمارتفونعا ورناتىلعان See the Future اتتى دۋلىعاعا ارنالعان قوسىمشا جاساپ شىعاردى. قازىرگى ۋاقىتتا بۇل قوسىمشادا گەولوكاسيا، اۋا رايى، كومپاس، مۋزىكا، پودكاستتار جانە ءتىپتى اۋديوكىتاپتار تىڭداۋ سياقتى مۇمكىندىكتەر بار.