ەلوردالىق جۇقپالى اۋرۋلار ورتالىعىنىڭ مەديسينا قىزمەتكەرلەرى ناۋقاستاردى ەمدەۋ بارىسىندا تۇسىرىلگەن ۆيدەولاردى جاريالادى.
كادرلاردا ءتۇرلى اپپاراتتاردىڭ استىندا جاتقان بالالاردى بايقاۋعا بولادى، دەپ حابارلايدى Almaty-akshamy.kz ەلوردا اكىمدىگىنىڭ رەسمي سايتىنا سىلتەمە جاساپ
سول سياقتى دارىگەرلەردىڭ ارنايى قورعانىس كوستيۋمدەرىن كيىپ، نارەستەنى قالاي تاماقتاندىرىپ جاتقانىن كورۋگە بولادى. نارەستە رەانيماسيادا جاتقاندىقتان («قىزىل ايماقتا»)، وعان تەك اۋرۋحانا دارىگەرلەرىنىڭ كىرۋىنە عانا رۇقسات بەرىلەدى.
نۇر-سۇلتاندا سوڭعى ايلاردا ستاسيوناردا ەم قابىلداپ جاتقان ناۋقاستار سانى 30 ەسەدەن استام ءوستى. سونىمەن قاتار، ۆيرۋس بالالار اراسىندا دا تەز تارالادى. وسى سەبەپتى رەانيماسياعا تۇسەتىندەر كورسەتكىشى ارتتى. دارىگەرلەر كەزەكتى رەت ۆيرۋستىڭ ءقاۋىپتى ەكەنى تاعى دە ەسكەرتتى.
«ءقازىر ءبىزدىڭ اۋرۋحانادا جاڭا تۋعان نارەستەدەن 18 جاسقا دەيىن 200-دەن استام ناۋقاس جاتىر. سوندىقتان نۇر-سۇلتان قالاسىنىڭ تۇرعىندارىنا ادام كوپ جينالاتىن ورىندارعا بارماۋعا، جەكە گيگيەنانى قاتاڭ ساقتاۋعا شاقىرامىن. اۋرۋ بەلگىلەرى بىلىنگەن جاعدايدا دارىگەردىڭ كومەگىنە جۇگىنۋ كەرەك. مەديسينالىق كومەك العاننان كەيىن، قاجەت بولعان جاعدايدا ۇيدە ەمدەلۋ كەرەك. ءوزىڭىزدى قورعاڭىز. ءقازىر وقۋشىلاردى Pfizer پرەپاراتىمەن ۆاكسينالاۋ باستالعانىن ايتقىم كەلەدى. سوندىقتان اۋرۋدىڭ الدىن الۋدىڭ ءبىر عانا ءادىسى بار، ول ۆاكسيناسيا. ەكپە الماعانداردى ۆاكسينادان وتۋگە شاقىرامىن. ريەۆاكسيناسيادان ءوتۋ ماڭىزدى»، - دەيدى №3 كوپبەيىندى قالالىق بالالار اۋرۋحاناسىنىڭ دارىگەرى، ءبولىم مەڭگەرۋشىسى جانار سامبەت قىزى.
سونداي-اق، كادردان ۇلكەن كىسىلەردىڭ دە ەمدەلىپ جاتقانىن بايقاۋعا بولادى. اۋرۋدىڭ اۋىر اعىمى بار ناۋقاستار تىنىس الۋ جۇيەسىنىڭ قوسالقى اپپاراتتارىنا قوسىلادى. دارىگەرلەر ىندەتتىڭ كۇشەيۋ سەبەبىن جاڭاجىلدىق مەرەكەلەرمەن جانە «وميكرون» شتامىنىڭ پايدا بولۋىمەن بايلانىستىرىپ وتىر.
«جاڭا جىلدان كەيىن بۇكىل ەل بويىنشا كوروناۆيرۋس ينفەكسياسىن جۇقتىرعاندار سانى كۇرت ءوستى. كۇن سايىن مىڭداعان ادام جەدەل مەديسينالىق كومەككە جۇگىنەدى، جۇزدەگەن ادام تاۋلىگىنە اۋرۋحاناعا جاتقىزىلادى. ءبىزدىڭ ۆاكسيناسيا عانا پاندەميادان قۇتقارا الادى!» - دەدى جوعارى ساناتتى دارىگەر-يرنفەكسيونيست ساۋلە اتىعايەۆا.
قالادا اشىلعان 2 200 توسەكتىڭ 876-سى عانا بوس. جاساندى تىنىس الۋ اپپاراتىنا 17 پاسيەنت قوسىلعان.
سونداي-اق، كۆي-مەن امبۋلاتوريالىق دەڭگەيدە ەمدەلەتىن تۇرعىندار بار، ولاردىڭ سانى قالا بويىنشا 33 مىڭنان اسادى.