استاناداعى بەيبىتشىلىك جانە كەلىسىم سارايىندا حالىقارالىق ۆولونتەرلەر فورۋمى ءوتىپ جاتىر.
وعان 34 ەلدەن 140-تان استام ەرىكتى قاتىسىپ جاتىر. اقپارات جانە قوعامدىق دامۋ ۆيسە-مينيسترى دانيار ءقادىروۆ كەيىنگى ءۇش جىلدا ۆولونتەرلەر سانى ءۇش ەسەگە كوبەيگەنىن اتاپ ءوتتى، دەپ حابارلايدى Almaty-akshamy.kz
«ەلىمىزدە ۆولونتەرلىك قىزمەتتىڭ دامۋىنا ۇلكەن ءمان بەرىلىپ جاتىر. 2019 جىلى ۆولونتەرلىك ۇيىمداردىڭ سانى 50-دەن استام بولسا، قازىرگى تاڭدا 680-گە جەتىپ وتىر.
سونىمەن بىرگە ۆولونتەردىڭ سانى 2019 جىلى 50 مىڭ بولسا، ءقازىر رەسپۋبليكا بويىنشا ۆولونتەرلەر سانى 200 مىڭنان اسىپ وتىر»، - دەدى ول.
ۆيسە-مينيستر بىلتىر قۇرىلعان ورتالىق ازيا ۆولونتەرلەر حابىنىڭ قالاي جۇمىس ىستەپ جاتقانىنا توقتالدى.
«جىل بويى حاب جۇمىس ىستەدى، ورتالىق ازيا ەلدەرىنىڭ ۆولونتەرلەرى وسى حابتىڭ ماڭىنا توپتاستى. بيىل كوپتەگەن وزگە ەلدەردەن ۇسىنىستار كەلىپ ءتۇسىپ جاتىر. ولار دا وسى حابقا قوسىلعىسى كەلەدى. تۇركيا مەن ازەربايجان دا وسى حابقا قوسىلىپ، تاجىريبە الماسقىسى كەلەدى. بۇگىنگى فورۋمدا وسى ماسەلە دە تالقىلانادى. كەشە استانادا حالىاقارلىق ۆولونتەرلىك ورتالىعى اشىلدى.
ورتالىق ازيا ەلدەرى ۆولونتەرلەرىنىڭ حابى قازاقشا ايتقاندا، اساردىڭ ءرولىن اتقارىپ وتىر. ءبىر اپات، ءزىلزالا بولسا، ءبىزدىڭ ۆولونتەرلەرىمىز حالىقارالىق دەڭگەيدەگى كومەكتى ۇيلەستىرۋ ءۇشىن جۇمىس ىستەيتىن بولادى. بۇل باعىتتا قازاقستان ورتالىق ازيا بويىنشا وتە جاقسى العا جىلجىدى دەۋگە بولادى»، - دەدى دانيار ءقادىروۆ.