ورىن تاپشىلىعى وتكىر بولىپ تۇر.
ءبىر جىل ىشىندە ەلىمىزدە ءۇش اۋىسىمدى مەكتەپتتەردىڭ سانى 5،6 پايىزعا ارتىپ كەتتى، دەپ حابارلايدى Almaty-akshamy.kz Ranking.kz cىلتەمە جاساپ.
پورتالدىڭ دەرەگىنشە، 2021-2022 وقۋ جىلىنىڭ باسىندا ەلىمىزدە 7،6 مىڭ مەكتەپ بولدى. ونىڭ 2،3 مىڭى قالادا، 5،3 مىڭى اۋىلدىق جەرلەردە ورنالاسقان. ولاردا 3،6 ملن وقۋشى بار، بۇل ءبىر جىل بۇرىنعىدان 3،3 پايىزعا كوپ. قالالاردا 2،1 ملن، اۋىلداردا 1،5 ملن وقۋشى مەكتەپكە بارادى.
ەلىمىزدىڭ ءبىلىم بەرۋ سالاسىندا ءبىرقاتار شەشىمىن تاپپاعان ماسەلە بار. ونىڭ ىشىندە وقۋشى ورنىنىڭ تاپشىلىعى وتكىر بولىپ تۇر. ءقازىر مەكتەپتەردىڭ كوپشىلىگى وقۋشىلاردى ەكى اۋىسىمدا وقىتادى. مۇنداي مەكتەپتەردىڭ سانى جىلدان-جىلعا ارتىپ كەلەدى. ماسەلەن، 2021-2022 وقۋ جىلىندا ەلىمىزدە 5،2 مىڭ وسىنداي مەكتەپ جۇمىس ىستەسە، 2020-2021 وقۋ جىلىندا — 5،1 مىڭ، ودان بەس جىل بۇرىن، 2017-2018 وقۋ جىلىندا 4،9 مىڭ ەكى اۋىسىمدى مەكتەپ بولعان.
سونىمەن قاتار، ەلىمىزدە ءۇش اۋىسىمدا وقىتاتىن مەكتەپتەر سانى دا ارتىپ كەلەدى. بۇل ونسىز دا داعدارىستى جاعدايدىڭ ناشارلاعانىن كورسەتەدى. ماسەلەن، 2021-2022 وقۋ جىلىندا قازاقستاندا 169 ءۇش اۋىسىمدى مەكتەپ جۇمىس ىستەدى. بۇل ءبىر جىل بۇرىنعىدان 5،6 پايىزعا (160 مەكتەپ) ارتىق، ال ءۇش جىل ىشىندە مۇنداي مەكتەپتەردىڭ سانى بىردەن 32 پايىزعا ءوستى.
ەگەر وقۋشى سانىنا قاتىستى جاعدايدى قاراستىراتىن بولساق، وندا ماسەلەنىڭ اۋقىمى ايقىنىراق كورىنەدى. ماسەلەن، سوڭعى مالىمەتتەر بويىنشا، ءۇش اۋىسىمدى مەكتەپتەردە 291،1 مىڭ وقۋشى ءبىلىم الىپ ءجۇر. بۇل وتكەن جىلمەن سالىستىرعاندا 4،9 پايىزعا كوپ. وڭىرلەر بويىنشا ءۇش اۋىسىمدى مەكتەپتەردىڭ ەڭ كوبى الماتىدا (59 مەكتەپ)، سونداي-اق ماڭعىستاۋ (18 مەكتەپ)، اتىراۋ (17 مەكتەپ)، تۇركىستان (15 مەكتەپ) جانە پاۆلودار (10 مەكتەپ) وبلىستارىندا بايقالادى.
ەلىمىزدەگى وقۋشىلار ورنىنىڭ، سونداي-اق ءۇش اۋىسىمدى جانە اپاتتى مەكتەپتەردىڭ تاپشىلىعى ماسەلەسىن شەشۋ ءۇشىن مەملەكەت باسشىسىنىڭ تاپسىرماسىمەن «جايلى مەكتەپ» ۇلتتىق پيلوتتىق جوباسى ىسكە قوسىلدى. ونى 2023 جىلدان 2025 جىلعا دەيىن ىسكە اسىرۋ جوسپارلانعان. ۇلتتىق جوبانىڭ ءبىرىڭعاي وپەراتورى رەتىندە «Samruk-Kazyna Construction» اق تاڭدالدى. ۇلتتىق جوبانى جۇزەگە اسىرۋدىڭ ارقاسىندا رەسپۋبليكادا 842 مىڭ وقۋشى وقيتىن 401 جاڭا مەكتەپ سالىنادى. 2023 جىلى 467،8 مىڭ وقۋشىعا ارنالعان 221 مەكتەپتىڭ قۇرىلىسىن باستاۋ جوسپارلانعان. جالپى، جوبانى جۇزەگە اسىرۋعا 2،6 ترلن تەڭگە مەملەكەت ينۆەستيسياسى باعىتتالادى.