تولەم اۆتوماتتى تۇردە تاعايىندالادى.
قازاقستان ۇكىمەتى كەلەر جىلدان باستاپ جۇمىسىنان ايىرىلعاندارعا تولەنەتىن جاردەماقى كولەمىن ءوسىرۋدى كوزدەپ وتىر، دەپ حابارلايدى Almaty-akshamy.kz.
«مەملەكەتتىك الەۋمەتتىك ساقتاندىرۋ قورىنان جۇمىسىنان ايىرىلۋىنا بايلانىستى جاردەماقى الۋشىلاردىڭ سانى 101 مىڭ ادامعا جەتتى. بۇل رەتتە بيىل 98،1 مىڭ ادامعا تولەم العاش رەت تاعايىندالعان»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
قولدانىستاعى زاڭناماعا سايكەس، جۇمىستان بوساتىلعان جۇمىسكەرلەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە سوڭعى 24 ايداعى تابىسىنا بايلانىستى 1 ايدان 6 ايعا دەيىن جۇمىسىنان ايىرىلۋى بويىنشا الەۋمەتتىك تولەم الادى.
جاردەماقى ايىرىلعان كىرىستىڭ 40%-ىنا دەيىنگى مولشەردە ءماسق قاراجاتى ەسەبىنەن تولەنەدى.
تولەم تاعايىنداۋ ءۇشىن جۇمىستان بوساتىلعان جۇمىسكەر:
- eGov.kz پورتالىندا اۆتوريزاسيالانۋ؛
- «جۇمىسقا ورنالاستىرۋ جانە جۇمىسپەن قامتۋ» بولىمىندە «جۇمىس ىزدەۋشى ادامداردى تىركەۋ» قىزمەتىن تاڭداۋ؛
- ونلاين-قىزمەتكە تاپسىرىس بەرىپ، بارلىق جولداردى تولتىرۋ جانە وعان ەسق-مەن قول قويىپ، ءوتىنىم جىبەرۋ قاجەت؛
- ءبىر كۇن ىشىندە تۇرعىلىقتى جەرىڭىزدەگى حالىقتى جۇمىسپەن قامتۋ ورتالىعى (بۇدان ءارى – حجقو) بوس جۇمىس ورىندارىن ۇسىنادى؛
- ەگەر جۇمىس تابىلماسا، 3 جۇمىس كۇنى ىشىندە قاشىقتان جۇمىسسىز مارتەبەسى بەرىلەدى (قاجەت بولعان جاعدايدا سىزگە حقو قىزمەتكەرى قوسىمشا اقپارات جيناۋ ءۇشىن حابارلاسادى)؛
بۇل قىزمەتتى ونلاين رەجيمدە ەلەكتروندى ەڭبەك بيرجاسى (enbek.kz) ارقىلى دا الۋعا بولادى.
جۇمىسسىز رەتىندە تىركەلۋ تۋرالى مالىمەتتەر بولعان كەزدە ەڭبەكمينىنىڭ اقپاراتتىق جۇيەسى پرواكتيۆتى فورماتتا ءماسق-تان تولەمدى تاعايىنداۋ بويىنشا قىزمەت كورسەتۋگە كەلىسۋ ءۇشىن ءموبيلدى تەلەفونعا SMS-حابارلاما جىبەرەدى.
كەلىسكەن جاعدايدا SMS-حابارلاماعا جاۋاپ بەرۋ قاجەت. تولەم اۆتوماتتى تۇردە تاعايىندالادى.
ەستەرىڭىزگە سالا كەتەيىك، ءماسق قاراجاتى ەسەبىنەن جۇمىستان ايىرىلعان جاعدايدا تولەنەتىن الەۋمەتتىك تولەم جۇمىستان شىعۋ سەبەپتەرىنە قاراماستان جۇزەگە اسىرىلادى جانە جۇمىسسىز ادامدى ول جۇمىس ىزدەگەن كەزەڭدە قولداۋعا ارنالعان.
مەملەكەت باسشىسىنىڭ بيىلعى جىلعى 1 قىركۇيەكتەگى جولداۋىن ىسكە اسىرۋ ءۇشىن 2023 جىلعى 1 قاڭتاردان باستاپ تابىستى الماستىرۋ كوەففيسيەنتىن 40%-دان 45%-عا دەيىن ۇلعايتۋ كوزدەلەدى.
بۇل رەتتە تولەم تاعايىنداۋ ءتارتىبى ساقتالادى جانە جۇمىسىنان ايىرىلعان جانە جۇمىسسىز مارتەبەسىن العان جۇيەگە قاتىسۋشىلارعا عانا قولدانىلادى.
جۇمىسىنان ايىرىلۋ بويىنشا الەۋمەتتىك تولەم مولشەرىن ارتتىرۋ، 2023 جىلعى 1 قاڭتارداعى جاعداي بويىنشا، جۇمىس ىستەپ تۇرعان الۋشىلارعا دا اسەر ەتەدى، ول اۆتوماتتى تۇردە جۇرگىزىلەدى.