اگلومەراسيانى دامىتۋدىڭ كەشەندى جوسپارىن ازىرلەۋگە قاتىسادى.
بۇگىن سەناتتىڭ جالپى وتىرىسىندا «اگلومەراسيالاردى دامىتۋ تۋرالى» زاڭى مەن ىلەسپە قۇجات قابىلداندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءىرى قالالاردا حالىق سانى مەن جەر اۋماعىنىڭ ءوسۋى تۇرعىسىندا ءبىرقاتار پروبلەما بايقالىپ وتىر. وسى ورايدا ينفراقۇرىلىمنىڭ بارلىق تۇرلەرىنە جۇكتەمەنىڭ ارتۋى، قالانىڭ شەت ايماقتارىندا رەتسىز قۇرىلىس سالىنۋى، ەگجەي-تەگجەيلى جوسپارلاۋ جوبالارىنىڭ دۇرىس ىسكە اسپاۋى، ىڭعايلى كولىك جۇيەسىنىڭ بولماۋى، سونداي-اق ينفراقۇرىلىمدىق، الەۋمەتتىك، ونەركاسىپتىك جانە تاعى باسقا نىسانداردىڭ تاپشىلىعى سياقتى تاعى باسقا دا پروبلەمالار بار. اۋماقتاردىڭ ءتيىستى دەڭگەيدە ۇيلەستىرىلمەي دامۋىنىڭ نەگىزگى سەبەپتەرىنىڭ ءبىرى – اگلومەراسيالاردىڭ دامۋىن رەتتەيتىن نورماتيۆتىك قۇقىقتىق بازانىڭ بولماۋى. وسى ورايدا، ورتالىق قالا مەن ونىڭ ماڭىنداعى ايماق اراسىنداعى فۋنكسيالاردى زاڭنامالىق تۇرعىدان ءبولۋ قاجەت»، - دەدى ۇلتتىق ەكونوميكا ءمينيسترى الىبەك قۋانتىروۆ.
ونىڭ ايتۋىنشا، وسى سالانى رەتتەيتىن زاڭ جوبالارىن ازىرلەۋ ءۇشىن مەملەكەت باسشىسىنىڭ ءبىرقاتار تاپسىرماسى نەگىز بولدى. پرەزيدەنت 2021 جىلعى قازاقستان حالقىنا جولداۋىندا «اگلومەراسيالاردى دامىتۋ تۋرالى» زاڭدى ازىرلەۋدى تاپسىردى. بۇل تۇرعىدا ۇزدىك حالىقارالىق تاجىريبەنى قولدانا وتىرىپ، مينيسترلىك ءتيىستى زاڭ جوبالارىن ازىرلەدى.
«نەگىزگى زاڭ جوباسى اياسىندا «اگلومەراسيا» تەرمينىنىڭ انىقتاماسى جانە اگلومەراسيالاردى انىقتايتىن ءتيىستى كريتەرييلەر ەنگىزىلەدى. اگلومەراسيا قۇرامىن ۋاكىلەتتى ورگان، ياعني ۇلتتىق ەكونوميكا مينيسترلىگى قالىپتاستىراتىن بولادى جانە ول ۇكىمەتتىڭ قاۋلىسىمەن بەكىتىلەدى. سونىمەن بىرگە، ەلدى مەكەندەردى اگلومەراسيالاردىڭ قۇرامىنا ەنگىزۋ جانە ولاردىڭ تىزبەسىن جۇرگىزۋ قاعيدالارى مينيسترلىكتىڭ بۇيرىعىمەن بەكىتىلەتىن بولادى. وسى ورايدا، اگلومەراسيالاردى ايقىنداۋدىڭ نەگىزگى كريتەرييلەرى رەتىندە مىنالار تانىلادى: ورتالىق قالانىڭ اكىمشىلىك مارتەبەسى، دەموگرافيالىق سىيىمدىلىق، لوگيستيكالىق الەۋەت، ەكونوميكالىق الەۋەت. زاڭ جوباسى قابىلدانعاننان كەيىن، وسى ولشەمشارتتارعا سايكەس، «اگلومەراسيالار» رەتىندە الماتى، استانا، شىمكەنت، سونداي-اق باسقا دا وبلىس ورتالىقتارى ايقىندالادى»، - دەدى ۆەدومستۆو باسشىسى.
نەگىزگى جانە ىلەسپە زاڭ جوبالارى اياسىندا وڭىرلەردىڭ اكىمدىكتەرىنە 25 قوسىمشا وكىلەتتىك بەرىلمەك. نەگىزگى زاڭ جوباسى بويىنشا 11 وكىلەتتىك، ال ىلەسپە زاڭ جوباسى تۇرعىسىندا 14 وكىلەتتىك ەسكەرىلگەن.
«نەگىزگى زاڭ جوباسىنا سايكەس ورتالىق قالا مەن ىرگەلەس وبلىستاردىڭ اكىمدىكتەرى اگلومەراسيا اۋماعىنداعى جەرگىلىكتى ماڭىزى بار ماسەلەلەردى بىرلەسىپ شەشۋگە، ءتيىستى كەلىسىمدى دايىنداۋعا جانە وعان قول قويۋعا قاتىساتىن بولادى. سونداي-اق اكىمدىكتەر جەرگىلىكتى اگلومەراسيا كەڭەسىن قۇرۋعا جانە ونىڭ قىزمەتىنە، اگلومەراسيانى دامىتۋدىڭ كەشەندى جوسپارىن ازىرلەۋگە قاتىسادى. بۇدان باسقا، ورتالىق قالالاردىڭ جەرگىلىكتى اتقارۋشى ورگاندارى قالا ماڭى ايماعىن دامىتۋدىڭ باس جوسپارىن ىسكە اسىرۋ بويىنشا سۋبەكتىلەردىڭ قىزمەتىن ۇيلەستىرەدى، باس جوسپاردىڭ جوباسىن ازىرلەۋدى ۇيىمداستىرادى، سونداي-اق ساۋلەت، قالا قۇرىلىسى جانە قۇرىلىس قىزمەتى سالاسىنداعى مەملەكەتتىك نورماتيۆتەردىڭ جوبالارىنا كەلىسىم بەرەدى»، - دەپ ناقتىلادى مينيستر.
بۇدان بۇرىن حابارلانعانداي، كەيىنگى 10 جىل ىشىندە استانا قالاسىنىڭ حالقى 59 پايىزعا، الماتى قالاسىنىڭ حالقى 37 پايىزعا، شىمكەنت قالاسىنىڭ حالقى 67 پايىزعا ءوستى. استانا ەلوردا بولعالى جەر اۋماعى جاعىنان 3 ەسە كەڭەيدى، الماتى قالاسىنىڭ اۋماعى كەيىنگى ون جىلدا 2،5 ەسە، ال شىمكەنتتىڭ اۋماعى 3،5 ەسە ءوستى.