الماتىدا زياندى ادەتكە قارسى جۇيەلى شارالار جۇرگىزىلۋدە
سوڭعى جىلدارى قازاقستاندا تەمەكى شەگەتىندەر سانى 30 پايىزعا ازايدى. بۇل كورسەتكىش — زياندى ادەتتىڭ الدىن الۋعا باعىتتالعان مەملەكەتتىك جانە قوعامدىق شارالاردىڭ تيىمدىلىگىن كورسەتەدى. بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىندا الماتى قالالىق پسيحيكالىق دەنساۋلىق ورتالىعى ديرەكتورىنىڭ ورىنباسارى روزا تاتييەۆا مالىمدەدى، دەپ حابارلايدى aqshamnews.kz
ونىڭ ايتۋىنشا، تەمەكىدەن باس تارتقان جاستاردىڭ سانى ارتىپ كەلەدى. كوپشىلىگى سپورتپەن اينالىسىپ، شىعارماشىلىققا بەت بۇرعان. الايدا سپيكەر ۆەيپ پەن ەلەكتروندى شىلىمعا اۋەستەردىڭ دە كوبەيىپ جاتقانىن، اسىرەسە بۇل ونىمدەردىڭ جاسوسپىرىمدەر اراسىندا كەڭ تاراعانىن اتاپ ءوتتى.
الماتىدا قانداي شارالار قابىلدانۋدا؟
قالادا نيكوتين ونىمدەرىنىڭ تارالۋىنا قارسى باعىتتالعان بىرنەشە جۇيەلى باستاما قولعا الىنعان:
قۇقىقتىق تەتىكتەردى كۇشەيتۋ
- «ۆەيپسىز جاستىق» جوباسىن ىسكە اسىرۋ. جاسوسپىرىمدەر مەن اتا-انالارعا ارنالعان اقپاراتتىق كامپانيالار.
- ۆەيپ-شوپتارعا جانە كاليان-بارلارعا رەيدتەر ۇيىمداستىرۋ.
- ساۋات اشۋ باعدارلامالارىن جۇزەگە اسىرۋ.اتاپ ايتقاندا، قوعامدىق ورىندا كاليان شەككەن 100 ادامعا ايىپپۇل سالىنعان.
- تەمەكىدەن باس تارتقىسى كەلەتىندەر ءۇشىن ەلىمىزدىڭ ەمحانالارىندا 86 ارنايى كەڭەس بەرۋ كابينەتى جۇمىس ىستەيدى.
- عالىمداردىڭ ايتۋىنشا، نيكوتين ءجاسوسپىرىم ميىنىڭ دامۋىنا كەرى اسەر ەتەدى:
- ەستە ساقتاۋ قابىلەتىن السىرەتەدى
- كۇيزەلىسكە بەيىمدىلىكتى ارتتىرادى
- تاۋەلدىلىككە جىلدام اكەلەدى
تەمەكى مەن ۆەيپتىڭ دەنساۋلىققا زيانى:
- جۇرەك-قان تامىر جۇيەسىنە زيان – نيكوتين تامىرلاردى تارىلتادى
- وكپە اۋرۋلارى – سوزىلمالى جوتەل، برونحيت، حوبل جانە استما ءورشيدى
- جۇكتىلىك كەزىندەگى ءقاۋىپ – گورموندىق بۇزىلۋلارعا اكەلۋى مۇمكىن
- يممۋنيتەت السىرەيدى – تەمەكى شەگەتىندەر ءجيى اۋىرادى
- كاليان: زيانسىز ەمەس، كەرىسىنشە — وتە ءقاۋىپتى
كەي جاستار كالياندى ءقاۋىپسىز دەپ قابىلدايدى. الايدا ساراپشىلاردىڭ ايتۋىنشا، ءبىر رەت كاليان شەگۋ — 100 تەمەكى تارتقانمەن تەڭ. ونىڭ تۇتىنىندە نيكوتين، شايىر جانە اۋىر مەتالداردىڭ مولشەرى تەمەكىدەن 3–5 ەسە كوپ بولۋى مۇمكىن.
كالياندى جابىق بولمەدە شەككەندە، ونىڭ ءتۇتىنى ينفەكسيالىق اۋرۋلاردىڭ تارالۋىنا جاعداي جاسايدى. ال ءبىر مۇشتىكتى بىرنەشە ادامنىڭ قولدانۋى — جۇقپالى اۋرۋلار ءۇشىن تىكەلەي جول.
«كاليان – اعزانى ۋلايتىن قۇرال عانا ەمەس، جاستاردى تاۋەلدىلىككە يتەرمەلەيتىن الەۋمەتتىك قۇبىلىس. ول تەمەكىدەن دە ءقاۋىپتى»، – دەدى روزا تاتييەۆا. ساراپشىلاردىڭ پىكىرىنشە، ادام زياندى ادەتتەن نەعۇرلىم ەرتەرەك باس تارتسا، وعان قايتا ورالۋ ىقتيمالدىعى سوعۇرلىم ازايادى. سوندىقتان جاستاردىڭ سالاۋاتتى ءومىر سالتىن ۇستانۋىنا جاعداي جاساۋ — مەملەكەت پەن قوعامنىڭ ورتاق ءارى ماڭىزدى مىندەتى.