اتالمىش قىزمەت 15 ماۋسىمدا مەملەكەتتىك تىركەۋدەن ءوتتى.
ەلىمىزدە ۇلتتىق گەولوگيالىق قىزمەت مەملەكەتتىك تىركەۋدەن ءوتتى. بۇل تۋرالى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ماجىلىستە وتكەن گەولوگيا سالاسىن دامىتۋ تاقىرىبىنا ارنالعان دوڭگەلەك ۇستەل بارىسىندا ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءقازىر سيفرلىق دامۋ، يندۋستريا جانە ينفراقۇرىلىمدىق دامۋ مينيسترلىكتەرىمەن بىرلەسىپ جەر قويناۋىن پايدالانۋ سالاسى بويىنشا ءبىرىڭعاي اقپاراتتىق جۇيە «Kaznedra» پلاتفورماسىن قۇرۋ بويىنشا جۇمىس ءجۇرىپ جاتىر. ءبىرىڭعاي پلاتفورما بارلىق پروسەستى ءبىر تەرەزە ارقىلى ينۆەستورلارعا كەشەندى سەرۆيستىك قولداۋ كورسەتەدى. بۇگىندە اتالعان جوبانى ىسكە اسىرۋ بويىنشا جول كارتاسى ۇكىمەت قاراۋىنا ەنگىزىلدى. سونداي-اق، پرەزيدەنتتىڭ تاپسىرماسى بويىنشا «قازگەواقپارات» جانە «قازگەولوگيا» بازاسىندا ۇلتتىق گەولوگيالىق قىزمەت قۇرىلدى»، - دەدى سەرىكقالي برەكەشيەۆ ءماجىلىس قابىرعاسىندا بايانداما جاساي وتىرىپ.
ءمينيستردىڭ ايتۋىنشا، ۇلتتىق گەولوگيالىق قىزمەت 15 ماۋسىمدا مەملەكەتتىك تىركەۋدەن ءوتتى.
«جالپى گەولوگيا سالاسىن مەملەكەتتىك تۇرعىدان رەتتەۋدە جەتەكشى ەلدەردە (اۆستراليا، اقش، ۇلىبريتانيا، كانادا، كورەيا جانە تاعى باسقا) ۇلتتىق گەولوگيالىق قىزمەت تابىستى جۇمىس اتقارىپ كەلەدى. اتالعان قىزمەتى سالاعا قاتىستى بارلىق اقپاراتتىڭ اشىق ءارى قولجەتىمدى بولۋىنا مۇمكىندىك بەرەدى. سونىمەن قاتار ۇلتتىق قىزمەتتى ەنگىزۋ اياسىندا مينەرالدىق رەسۋرستاردىڭ ۇلتتىق دەرەكتەر بازاسىن پايدالانۋ، گەولوگيا سالاسىنا قاتىستى اقپاراتتى جۇيەلەپ، تالداۋ ارقىلى ينۆەستورلارعا كەشەندى سەرۆيستىك قولداۋ كورسەتپەكپىز»، - دەيدى ول.
بۇعان دەيىن حابارلاعانىمىزداي، گەولوگيا سالاسىن دامىتۋدىڭ 2026 جىلعا دەيىنگى تۇجىرىمداماسى ازىرلەندى.