بۇل تۋرالى ۇكىمەت جانە ۇقك باسشىسىنىڭ اتىنا ساۋال جولداعان دەپۋتات ەرمۇرات ءباپي ايتتى.
ءماجىلىس دەپۋتاتى ءوزىنىڭ دەپۋتاتتىق ساۋالىندا اتىراۋ، اقتوبە، ماڭعىستاۋ، ۇلىتاۋ، الماتى ءوڭىرىن ۋاحابشىلار – سالافيزم يدەياسىنا تابىنۋشىلار باسىپ بارا جاتقانىن ايتتى، دەپ حابارلايدى Almaty-akshamy.kz
ونىڭ ايتۋىنشا، تەرىس باعىتتىڭ دامۋىنا كەڭىنەن مۇمكىندىك بەرىپ، جان-جاقتى جاعداي جاساپ وتىرعان جەرگىلىكتى بيلىك وكىلدەرى بار.
ۇكىمەت باسشىسىنىڭ جانە ۇقك باسشىسىنىڭ اتىنا جولداعان دەپۋتاتتىق ساۋالىندا ماجىلىسمەن ۇلكەن قالالاردا مەكتەپ سالاتىن قۋىس قالماسا دا، مەشىت پەن حرام سالاتىن جەر تابىلىپ جاتقانىنا تاڭدانىسىن جاسىرمادى.
“سوڭعى بىرەر جىلدا يسلام ءدىنىن جامىلعان جات اعىمدار قازاقستاندىق قوعامعا الەۋمەتتىك-تۇرمىستىق جارقىشاق سالىپ، ول ساڭىلاۋ بارعان سايىن اجىراپ بارادى. ءتىپتى، قوعامنىڭ شىرقىن بۇزىپ، مەملەكەتتىك تۇتاستىققا اۋىز سالا باستاعان جارقىشاق قازاق حالقىنىڭ ۇلتتىق بىرلىگى مەن ۇلتتىق دامۋ داستۇرىنە جانە مىڭجىلدىق قازاقي يسلام سالتىنا قارسى شابۋىلعا اينالعان سىڭاي تانىتادى. بۇل تەرىس ءدىني ءۇردىس ساياسي سيپات الىپ بارا جاتقان جوق پا دەگەن دە قاتەر بار. سەبەبى حالىقتىڭ كەمشىن ءدىني ءبىلىم-تانىمىن پايدالانعان تەرىس ءدىني توپ جانتالاسىپ، قوعامعا جالعان رۋحاني قۇندىلىقتار مەن بوتەن داستۇرلەردى ءسىڭىرۋ قامىن جاساۋدا”، – دەيدى ەرمۇرات ءباپي.
دەپۋتاتتىڭ پىكىرىنشە، رينات زايىتوۆتىڭ ازاماتتىق پىكىرىنە قارسى شابۋىلدار وسىنداي ساياسي قاتەردىڭ سيپاتىن سەزدىرەدى.
“قوعامدى ارابتىق-ۋاحابتىق ءدىني ۇستانىم نەگىزدە بولشەكتەۋگە باعىتتالعان بۇل ارەكەتتەرگە بىزدەر – دەپۋتاتتار جايباراقات قاراپ وتىرا المايمىز! ءبىز مىڭجىلدىق دومبىرانى حارام قىلۋعا جول بەرمەيمىز! بۇل ارەكەتتەر ەلدىڭ ۇلتتىق قۇندىلىقتار جۇيەسى مەن رۋحاني نەگىزىنە جاسالىپ جاتقان شابۋىل دەپ ءتۇسىنۋ كەرەك! ءبىر وكىنىشتىسى – بۇل يسلامدىق سەكتا قازاقستاننىڭ ءبىراز ايماعىندا: اسىرەسە اتىراۋ، اقتوبە، ماڭعىستاۋ، ۇلىتاۋ، الماتى وڭىرىندە ەتەك جايىپ بارادى. بۇل وڭىرلەردىڭ شاعىن بيزنەسىن، اسىرەسە بازار ساۋداسى توڭىرەگىن ۋاحابشىلار – سالافيزم يدەياسىنا تابىنۋشىلار باسىپ بارادى. ياعني، تەرىس سەكتانىڭ دامۋىنا كەڭىنەن مۇمكىندىك بەرىپ، جان-جاقتى جاعداي جاساپ وتىرعان جەرگىلىكتى بيلىك وكىلدەرى بار دەگەن ءسوز”، – دەپ پايىمدايدى ول.
ەرمۇرات ءباپي مەملەكەتتىك بيلىكتىڭ ءوز ىشىندە دە ۋاحابيزم مەن جات اعىمداردى ناسيحاتتاۋدى قولدايتىن جوعارى لاۋازىمدى مەملەكەتتىك قىزمەتكەرلەر بار دەگەن دەرەك ەستىگەنىن ايتتى.
“ەگەر وسى ءسوز قاڭقۋ ەمەس، ناقتى جاعداي وسىلاي بولسا، وندا ءبىزدىڭ تاۋەلسىز مەملەكەتتىگىمىزگە شىنىندا دا قاتەر تونگەنى. ءيا، وركەنيەت كوشىنە ەرگەن ءبىزدىڭ ەل ادام قۇقىعىن قادىرلەيدى. بۇل – دەموكراتيالىق پرينسيپتەردىڭ باستى قاعيداسى. ءبىراق سول ەركىن قۇقىق باس بەرمەي كەتىپ، ءبىزدىڭ ۇلتتىق جانە مەملەكەتتىك ءدىڭىمىزدى شايقالتا باستاسا، ءبىز بۇعان كوزجۇمبايلىقپەن قاراۋعا قاقىمىز جوق! ەل كونستيتۋسياسىنىڭ تالابى بويىنشا، مەملەكەتتىڭ زايىرلى دامۋ بولاشاعىن الدەبىر كۇشتەردىڭ يەمدەنىپ كەتۋىنە جول بەرمەۋىمىز كەرەك!”، – دەدى دەپۋتات.
ماجىلىسمەن ەندىگى جەردە «مەملەكەت – دىننەن بولەك» نەمەسە «ءدىن – مەملەكەتتەن بولەك» دەپ، سىرتتاي باقىلاۋشى بولىپ، سامارقاۋ وتىرۋعا بولمايتىنىن اتاپ ءوتتى.
“وسى ورايدا ءماجىلىس دەپۋتاتتارىنىڭ سىزگە جولدايتىن بىرنەشە ساۋالى بار. بىرىنشىدەن، ءسىز جانە ءسىزدىڭ كابينەتىڭىز قالىپتاسقان كۇردەلى جاعدايدى ءتۇيسىنىپ وتىر ما؟ قوعامنىڭ ءدىني نەگىزدە بولشەكتەنۋ قاۋپىنە قارسى ءىس-قيمىل جوسپارى بار ما؟ ەكىنشىدەن، ۇكىمەت پەن ۇلتتىق قاۋىپسىزدىك كوميتەتى جانە ۋاكىلەتتى ورگاندار بىرلەسىپ، تەرىس ءدىني اعىمدار تۋدىرىپ جاتقان ۇلتتىق الاۋىزدىقتى شۇعىل توقتاتۋدىڭ امال-ارەكەتتەرى ەل پرەزيدەنتىنىڭ نازارىنا ۇسىنىلدى ما؟ ۇشىنشىدەن، بۇدان 12 جىل بۇرىن – 2011 جىلدىڭ 11 قازانىندا قابىلدانعان «ءدىني قىزمەت جانە ءدىني بىرلەستىكتەر تۋرالى» زاڭعا ءتيىستى وزگەرىستەر مەن تولىقتىرۋلار ەنگىزۋدىڭ قوعامدىق قاجەتتىلىگىن كوتەرەتىن كەز كەلگەن جوق پا؟ تورتىنشىدەن، قالىپتاسقان وسى قوعامدىق جاعدايدا ءبىز بارلىق كۇش-جىگەرىمىزدى بىرىكتىرىپ، ۇلت بىرلىگى مەن مەملەكەتتىڭ تۇراقتى دامۋ جاعدايىن ساقتاۋعا ۇكىمەت پەن پارلامەنت مۇددەلى بولۋى كەرەك دەپ ەسەپتەيمىز”، – دەپ تۇيىندەدى ءسوزىن.