پرەزيدەنت «تۇران» جانە «وڭتۇستىك-شىعىس» گاز جىلۋ ستانسيالارىنىڭ، سورعى-سۇزگى ستانسياسىنىڭ جانە ءۇشىنشى جەو-نىڭ قۇرىلىس جۇمىستارىنىڭ بارىسىمەن تانىستى، دەپ حابارلايدى Almaty-akshamy.kz قازاقپاراتقا سىلتەمە جاساپ.
استانا قالاسىنىڭ اكىمى جەڭىس قاسىمبەك مەملەكەت باسشىسىنا «وڭتۇستىك-شىعىس» گاز جىلۋ ستانسياسىنىڭ جانە جالپى قۋاتى ساعاتىنا 700 گيگاكالوريي بولاتىن «تۇران» گاز جىلۋ ستانسياسىنىڭ ءبىرىنشى كەزەڭىنىڭ قۇرىلىستارى اياقتالعانى تۋرالى مالىمەت بەردى. ونىڭ ايتۋىنشا، «وڭتۇستىك-شىعىس» ستانسياسى مىنجىلدىق اللەياسى، «نۇرلى جول» ۆوكزالى، «باعىستان» تۇرعىن الابى سياقتى قۇرىلىسى قارقىندى تۇردە ءجۇرىپ جاتقان اۋدانداردى، ال «تۇران» ستانسياسى قالانىڭ سول جاعالاۋىندا جاڭادان سالىنىپ جاتقان اۋماقتى تۇراقتى جىلۋمەن قامتاماسىز ەتەدى.
مەملەكەت باسشىسىنا اتالعان گاز جىلۋ ستانسيالارى بيىلعى جىلىتۋ ماۋسىمىنىڭ باسىنان باستاپ ىسكە قوسىلاتىنى جونىندە باياندالدى. جىل اياعىنا دەيىن ءۇشىنشى جەو-نىڭ قۇرىلىسى اياقتالادى. ءۇش جاڭا نىسان قالانى قوسىمشا جىلۋمەن قامتاماسىز ەتەدى. ونىڭ قۋاتى – ساعاتىنا 1140 گيگاكالوريي. «تۇران» گاز جىلۋ ستانسياسىنىڭ ەكىنشى كەزەڭىنىڭ سالىنۋى جانە «تەلمان» جاڭا گاز جىلۋ ستانسياسى قۋاتى ساعاتىنا 850 گيگاكالوريي بولاتىن قوسىمشا جىلۋ بەرەدى.
قۇرىلىس كومپانياسىنىڭ وكىلدەرى قازاقستاندا گاز جىلۋ ستانسيالارىنىڭ وندىرىستەگى وتاندىق ۇلەسىن ارتتىرۋ ءۇشىن گاز جابدىقتارىن ءوندىرۋشى كاسىپورىنمەن ارادا ۋاعدالاستىقتار بار ەكەنىن جەتكىزدى.
پرەزيدەنت گاز جىلۋ ستانسيالارىن كەزەڭ-كەزەڭمەن پايدالانۋعا بەرۋدى تاپسىردى.
«ەڭ الدىمەن، جوبالاردىڭ ساپاسى جوعارى بولۋعا ءتيىس. ءبىز ونى قاداعالايمىز. مۇنداي جوبالار قالاعا وتە قاجەت. مەن بۇل جەرگە وسى ماقساتپەن كەلدىم. ءار قالادا ءۇش نەگىزگى ماسەلە بار. ولار – جىلۋ، جارىق جانە سۋ. تۇرعىندار بۇل قاجەتتىلىكتەرمەن مىندەتتى تۇردە قامتاماسىز ەتىلۋى كەرەك. ونىڭ ۇستىنە، ءسوز ەلوردا تۋرالى بولىپ وتىر. ەشقانداي كىدىرىس بولماۋعا ءتيىس. بۇل، تۇپتەپ كەلگەندە، ءبىزدىڭ مەملەكەتىمىزدىڭ بەدەلى مەن يميدجىنە قاتىستى ماسەلە. سوندىقتان اتالعان ماسەلەنى ءبارىمىز جۇمىلىپ، مىندەتتى تۇردە تولىق شەشۋىمىز قاجەت»، – دەدى مەملەكەت باسشىسى.
جەڭىس قاسىمبەك پرەزيدەنتكە استانا سۋ قويماسىنان تارتىلاتىن سۋ قۇبىرىنىڭ جانە سورعى-سۇزگى ستانسياسىنىڭ ىسكە قوسىلۋى جونىندە ايتتى. ونىڭ مالىمەتى بويىنشا بيىلعى قاراشادا نۇرا جەراستى سۋ كوزىنەن قۋاتى 48 مىڭ تەكشە مەتر بولاتىن سۋ قۇبىرىن تارتۋ، سونداي-اق «تەلمان» سورعى ستانسياسىنىڭ قۋاتىن كۇنىنە 160 مىڭ تەكشە مەترگە دەيىن جەتكىزۋ جونىندەگى جوبالاۋ جۇمىستارى اياقتالادى.
قاسىم-جومارت توقايەۆ ەلوردا حالقىنىڭ سانى جىلدان-جىلعا كوبەيىپ كەلە جاتقانىنا بايلانىستى قوسىمشا سۋ كوزدەرىمەن قامتاماسىز ەتۋ جولدارىن ىزدەۋ قاجەتتىگىنە نازار اۋداردى. سونداي-اق قالاداعى جاڭا جىلۋ نىساندارىنىڭ قۇرىلىسىن ۋاقتىلى اياقتاۋدى تاپسىردى.